ယွန်း (NSS) - ဇူလိုင် ၃ဝ

၂၀၂၄ ခုနှစ် တက္ကသိုလ်ဝင်စာမေးပွဲတွင် စနစ်ဟောင်း/စနစ်သစ်ကျရှုံးခဲ့သူများကို လာမည့်စာမေးပွဲ၌ ပြင်ပဖြေအဖြစ် ဝင်ရောက်ဖြေဆိုခွင့်ပြုမည်ဖြစ်ကြောင်း မြန်မာနိုင်ငံစာစစ် ဦးစီးဌာနက ဇူလိုင် (၂၄) ရက်နေ့တွင် အသိပေး ထုတ်ပြန်ထားသည်။

မြန်မာနိုင်ငံစာစစ်ဦးစီးဌာနအနေဖြင့်ပြီးခဲ့သည့် (၂၀၂၄)ခုနှစ်တွင် စတင်ကျင်းပသည့် စနစ်သစ် (Grade-12) အဆင့် တက္ကသိုလ်ဝင်စာမေးပွဲတွင် စနစ်ဟောင်း နဝမတန်းအောင်မြင်ပြီး အကြောင်းအမျိုးမျိုးကြောင့် တက္ကသိုလ်ဝင်စာမေးပွဲ ဝင်ရောက်ဖြေဆိုခဲ့ ခြင်းမရှိသည့် ကျောင်းသားကျောင်းသူများနှင့် စနစ်ဟောင်းတက္ကသိုလ်ဝင်စာမေးပွဲ ကျရှုံးသူများကို ပြင်ပဖြေအဖြစ် ဝင်ရောက်ဖြေဆိုခွင့်ပြုခဲ့သည်။

ထို့ကြောင့် လာမည့် ၂၀၂၅ ခုနှစ် တက္ကသိုလ်ဝင် စာမေးပွဲတွင် စနစ်ဟောင်းနဝမတန်းအောင်မြင်ပြီး အကြောင်း အမျိုးမျိုးကြောင့် တက္ကသိုလ်ဝင်စာမေးပွဲ ဝင်ရောက်ဖြေဆိုခဲ့ခြင်းမရှိသော ကျောင်းသား ကျောင်းသူများနှင့် စနစ် ဟောင်း/စနစ်သစ် တက္ကသိုလ်ဝင် စာမေးပွဲကျရှုံးသူများသည် ပြင်ပဖြေအဖြစ် ဝင်ရောက်ဖြေဆိုနိုင်ကြောင်း ထုတ်ပြန်ချက်တွင် အသိပေးထား သည်။

၂၀၂၅ ခုနှစ် တက္ကသိုလ်ဝင်စာမေးပွဲကို ပြင်ပဖြေအဖြစ် ဝင်ရောက်ဖြေဆိုမည့်သူများအနေဖြင့် စနစ်သစ် ဘာသာ တွဲများအနက် တစ်ခုကို ရွေးချယ် လျှောက်ထားနိုင်ကြောင်း မြန်မာနိုင်ငံစာစစ်ဦးစီးဌာန က ဆိုထားသည်။

‘ပြင်ပဖြေတွေအတွက် လျှောက်လွှာက လော လောဆယ်တော့ တင်လို့မရသေးဘူး။ အခုက အသိ ပေးတာပေါ့။ စာဖြေဖို့က လိုသေးတယ်လေ။ G-10၊ 11၊ 12 အထက်တန်းဆင့်မှာ G-10 မှာ သုံးလအတွင်း ဘာသာတွဲပြောင်းလို့ရမယ်။ သုံးလကျော်ရင် ဘာသာ တွဲပြောင်းလို့မရဘူးဆိုပြီး တရားဝင်စာထွက်ထားပါတယ်။ အထက်တန်းအဆင့်က သုံးတန်းရှိ တဲ့အတွက် တစ်တန်းမှာ သိပ္ပံယူတယ်။ နောက်တစ်တန်းမှာ ဝိဇ္ဇာယူတယ်ဆိုရင် အဆင်မပြေဘူး။ အဲဒီတော့ G-10 မှာ သုံးလအတွင်း ကြိုက်သလိုပြောင်းလို့ရတယ်။ အဲဒီတော့ ကျောင်းတွင်းစစ်ဖြေနေတဲ့သူတွေကတော့ ပြောင်းလို့မရဘူး’ ဟု မြန်မာနိုင် ငံ စာစစ်ဦးစီးဌာနမှ တာဝန်ရှိသူတစ်ဦးက NSS ကို ပြောသည်။

ထို့ပြင် ပြီးခဲ့သည့်နှစ် တက္ကသိုလ်ဝင်စာမေးပွဲတွင် ဖြေဆိုရန်မှတ်ပုံတင်ထားပြီးဖြစ်သော်လည်း လုံခြုံရေးအခြေအနေအရ ဖြေဆိုခွင့်မရသည့်ဒေသအချို့ရှိ ကျောင်းသား၊ ကျောင်းသူများလည်းရှိခဲ့ရာ ၎င်းတို့ ကို သတ်မှတ်ထားသည့် အခြေခံပညာ ကျောင်းများရှိ စာစစ်ဌာနများသို့ ကျောင်းသားကျောင်း သူများကို စုစည်းခေါ်ယူကာ စာမေးပွဲဖြေဆိုမှုများ ပြုလုပ်ခဲ့ရသည်။

၂၀၂၃-၂၀၂၄ ပညာသင်နှစ် တက္ကသိုလ်ဝင်စာမေးပွဲတွင် ဝင်ရောက်ဖြေဆိုသူဦးရေ ၁၂၈,၆၃၅ ဦးရှိခဲ့ပြီး ၇၄,၅၉၂ ဦးအောင်မြင်ခဲ့သည့်အတွက် ၅၇ ဒသမ ၉၀ ရာခိုင်နှုန်းအောင်မြင်ခဲ့သည်။