Pearl (NSS) - မတ် ၁၇

NCA ရေးထိုးထားသည့် EAOs (၇) ဖွဲ့က ကိုယ်ပိုင်ထိန်းချုပ်နယ်မြေအသီးသီးတွင် အုပ်ချုပ်ရေးစနစ် စတင်သွားမည်ဟု RCSS ဥက္ကဌ ဗိုလ်ချုပ်ကြီးယွက်စစ်က ပြောသည်။

NCA ရေးထိုးထားသည့် EAOs (၇) ဖွဲ့၏ ထိပ်သီးအစည်းအဝေး (7 NCA-S EAO Summit) ကို ယနေ့ (မတ်လ ၁၇ ရက်) တွင် ထိုင်းနိုင်ငံ၊ ချင်းမိုင်မြို့၌ စတင်ကျင်းပလျက်ရှိပြီး မတ်လ (၁၉) ရက်အထိ (၃) ရက်ကြာ ကျင်းပသွားမည်ဖြစ်ကြောင်း သိရသည်။ 

အဆိုပါအစည်းအဝေးသည် NCA လက်မှတ်ရေးထိုးထားသည့် KNU/KNLA – PC၊ DKBA၊  PNLO၊  LDU၊   ALP၊  NMSP နှင့်  RCSS တို့၏ ထိပ်သီးအစည်းအဝေးဖြစ်ပြီး  KNU ဥက္ကဋ္ဌဟောင်း ဗိုလ်ချုပ်ကြီးစောမူတူးစေးဖိုးလည်း တတ်ရောက်ခဲ့ကြောင်း သိရသည်။

အစည်းအဝေးတွင် ပြင်ဆင်ရေးအလုပ်အဖွဲ့က ပြင်ဆင်ထားသည့် နိုင်ငံရေးဆိုင်ရာအဆိုပြုချက်များ (မူကြမ်း)နှင့် စုဖွဲ့မှုအသစ်၏ ဖွဲ့စည်းပုံစည်းမျဉ်း (မူကြမ်း)တို့ကိုဆွေးနွေး၍ အတည်ပြုနိုင်ရန်ဆောင်ရွက်မည်ဖြစ်ပြီး အတည်ပြု နိုင်ပါက စုဖွဲ့မှုအသစ်ကိုဖွဲ့စည်းသွားမည်ဟု RCSS ဥက္ကဋ္ဌဗိုလ်ချုပ်ကြီးယွက်စစ်က ပြောသည်။ 

ထို့ပြင် လက်ရှိနိုင်ငံရေး အခြေအနေသုံးသပ်ခြင်း အပါအဝင် အခြားအရေးပါသည့်အကြောင်းအရာများကိုလည်း ဆွေးနွေးမည်ဖြစ်ကြောင်း ၎င်းက ဆက်လက်ပြောသည်။

“စုဖွဲ့မှုအသစ်ကို ဖွဲ့စည်းပြီးပါက ပြဌာန်းထားတဲ့ စည်းမျဉ်းစည်းကမ်းအတိုင်း သေချာစွာလိုက်နာဆောင်ရွက်နိုင်မှ သာ အလုပ်ဖြစ်မှာဖြစ်ပါတယ်။ နိုင်ငံရေး၊ စစ်ရေးအခြေအနေများက နေ့စဉ်နဲ့အမျှပြောင်းလဲနေပြီး မိမိတို့ (၇)ဖွဲ့ထဲ က တချို့အဖွဲ့ဆိုရင် တိုက်ပွဲဝင်နေတာတွေ ရှိခဲ့ပါတယ်။ ဒီအချက်တွေက လက်ရှိအခြေအနေကို မီးမောင်းထိုးပြ တာဖြစ်ပါတယ်။ လက်ရှိအခြေအနေတွေဟာ ထိလွယ်ရှလွယ်တဲ့အနေအထားမှာ ရှိနေပါတယ်။ ယနေ့ကာလမှာ နိုင်ငံရေးဘောင်ကျဉ်းပြီး စစ်ရေးဘောင်ကျယ်တဲ့အနေအထားမှာ ရှိနေပါတယ်။ မိမိတို့ (၇)ဖွဲ့အနေနဲ့ EAO (၁၂)ဖွဲ့ လက်ခံထားတဲ့ ဖက်ဒရယ်မူကို စွဲကိုင်ပြီး ရှေ့ခရီးကို ဆက်လက်ချီတက်မှာ ဖြစ်ပါတယ်။ မိမိတို့ (၇)ဖွဲ့ရဲ့ ထိန်းချုပ် တဲ့နယ်မြေဒေသအသီးသီးတွေမှာ မိမိတို့ကိုယ်ပိုင်ပြဌာန်းခွင့်ရဲ့အုပ်ချုပ်ရေးစနစ်နဲ့ စတင်အုပ်ချုပ်သွားရမှာ ဖြစ်ပါ တယ်” ဟု ဗိုလ်ချုပ်ကြီးယွက်စစ်က ပြောသည်။ 

ထို့ပြင်  ၎င်းတို့ ဒေသရှိ လူထုအတွက် အုပ်ချုပ်ရေး၊ လုံခြုံရေး၊ စီးပွားရေး၊ ပညာရေး၊ ကျန်းမာရေး၊ စားဝတ်နေရေး အပါအဝင် အခြားဝန်ဆောင်မှုလုပ်ငန်းများကို ဆောင်ရွက်မည်ဖြစ်ပြီး ဖက်ဒရယ်ဒီမိုကရေစီပြည်ထောင်စုကို တဆင့်ပြီးတဆင့် တည်ဆောက်မည်ဟု  ၎င်းက ဆက်လက်ပြောသည်။ 

ပြီးခဲ့သော ၂၀၂၂ ခုနှစ်တွင်လည်း ထိုင်းနိုင်ငံ၊ ချင်းမိုင်မြို့၌ NCA - S EAO ထိပ်သီးခေါင်းဆောင်များညီလာခံကို ကျင်းပခဲ့ဖူးသည်။