ဂျန်ဇက် (NSS) - မတ် ၃ 

ထိုင်းလွှတ်တော်မှာကျင်းပခဲ့တဲ့ မြန်မာအရေးတွေ့ဆုံဆွေးနွေးပွဲက နှစ်နိုင်ငံကြားဆက်ဆံရေးကို အနုတ်လက္ခဏာ ဆောင်တဲ့သက်ရောက်မှုတွေ ရှိလာနိုင်ကြောင်း မြန်မာအစိုးရက တုံ့ပြန်ပြောဆိုလိုက်ကြောင်း သိရပါတယ်။

ရိုက်တာသတင်းဌာနဟာ ထိုင်းလွှတ်တော်အတွင်း ကျင်းပခဲ့တဲ့ မြန်မာအရေးတွေ့ဆုံဆွေးနွေးပွဲနဲ့ပတ်သက်ပြီး မြန်မာနိုင်ငံခြားရေးဝန်ကြီးဌာနကို စာပို့မေးမြန်းခဲ့ရာ မြန်မာနိုင်ငံခြားရေးဝန်ကြီးဌာနက ပြန်လည်ဖြေဆိုချိန်မှာ ထည့်သွင်းဖော်ပြခဲ့တာဖြစ်တယ်လို့ ဆိုပါတယ်။

မြန်မာနိုင်ငံခြားရေးဝန်ကြီးဌာနက ထိုင်းလွှတ်တော်အတွင်း ကျင်းပခဲ့တဲ့  မြန်မာအရေး ဆွေးနွေးပွဲကို ကန့်ကွက် လိုက်ကြောင်း နှစ်နိုင်ငံကြား အပြန်အလှန်ဆက်ဆံရေးကို အနုတ်လက္ခဏာဆောင်သော သက်ရောက်မှုများ ရှိလာ နိုင်ကြောင်း ပြန်လည်ဖြေဆိုထားတယ်လို့ ရိုက်တာသတင်းမှာ ဖော်ပြထားပါတယ်။

ထိုင်းနိုင်ငံမှာ မတ်လ ၂ ရက်က မြန်မာအရေးဆွေးနွေးပွဲကျင်းပခဲ့ပြီး NUG အဖွဲ့အပြင် တိုင်းရင်းသား လက်နက်ကိုင် အဖွဲ့ကိုယ်စားလှယ်တွေ တက်ရောက်ခဲ့တယ်လို့ ဆိုပါတယ်။

ဒါပေမယ့် မြန်မာအစိုးရ ကိုယ်စားလှယ်တွေ တက်ရောက်ခဲ့တာမျိုးတော့မရှိကြောင်း သိရပါတယ်။ ထိုင်းနိုင်ငံ ခြားရေးဝန်ကြီးဟာ ထိုင်းလွှတ်တော်အတွင်းကျင်းပတဲ့ မြန်မာအရေးတွေ့ဆုံဆွေးနွေးပွဲမှာ လာရောက်စကားပြော ဆိုဖို့ အစောပိုင်းက စီစဉ်ခဲ့ပေမယ့်နောက်ပိုင်းမှာ ဖျက်သိမ်းခဲ့ကြောင်း၊ ဖျက်သိမ်းခဲ့တဲ့အကြောင်းအရင်းကိုလည်း ရှင်းလင်းတာမျိုးမရှိကြောင်း ဆိုပါတယ်။ ထိုင်းလွှတ်တော်ကိုယ်စားလှယ်တစ်ဦးကတော့  ဒီနေ့ ကျင်းပခဲ့တဲ့ မြန်မာအရေးဆွေးနွေးပွဲဟာ မြန်မာနိုင်ငံရေး အငြင်းပွားမှုတွေမှာ ပါဝင်နေတဲ့အားလုံးကြားတစ်ဦးနဲ့တစ်ဦး တွေ့ဆုံ ဆွေးနွေးနိုင်အောင်ပြုလုပ်တဲ့ ပထမ အဆင့်ဖြစ်ပြီး၊ မြန်မာနိုင်ငံအတွက် ငြိမ်းချမ်းပြီး ရေရှည်တည်တံစေမယ့် နိုင်ငံရေးအဖြေတစ်ခုရဖို့ လမ်းခင်းပေးနိုင်ဖွယ်ရှိနေကြောင်း ပြောပါတယ်။