သုတဇော် (NSS) - ဇန်နဝါရီ ၂၅

မူးယစ်ဆေးဝါးချက်လုပ်ရာတွင် အသုံးပြုနေသည့် ဓာတုပစ္စည်းများဖမ်းဆီးရမိမှုသည် မူးယစ်ဆေးဝါး ဖမ်းဆီးရမိမှုများနှင့်နှိုင်းယှဉ်ပါက လွန်စွာနည်းပါးနေကြောင်း ရဲမှူးချုပ် ဝင်းနိုင်၏ ပြောကြားချက်အရ သိရသည်။ 

၎င်းက (၇)ကြိမ်မြောက် မြန်မာ-အိန္ဒိယ နှစ်နိုင်ငံ မူးယစ်ဆေးဝါးပူးပေါင်းထိန်းချုပ်ရေး ညွှန်ကြားရေးမှူးချုပ်အဆင့် အစည်းအဝေးကို ဇန်နဝါရီလ ၂၄ ရက်က မြန်မာနိုင်ငံမှ အလှည့်ကျအိမ်ရှင်အဖြစ် ကျင်းပရာတွင် ဗီဒီယိုကွန်ဖ ရင့်စနစ်ဖြင့် တက်ရောက်ရာ၌ အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။ 

ယနေ့ခေတ်တွင် နည်းပညာဆန်းသစ်မှုပြောင်းလဲလာသော အခြေအနေများအရ မူးယစ်ဆေးဝါးပြဿနာသည် လွန်စွာရှုပ်ထွေးလာပြီး ကမ္ဘာ့နိုင်ငံတိုင်းကြုံတွေ့နေရသည့် အခက်အခဲပြဿနာများစွာထဲတွင် အကြီးမားဆုံး စိန် ခေါ်မှုပြဿနာတစ်ရပ်ဖြစ်ကြောင်း၊ နိုင်ငံအသီးသီးက နည်းလမ်းမျိုးစုံဖြင့် မူးယစ်ဆေးဝါးအန္တရာယ်ကို ထိန်းချုပ်တားဆီးမှုများ လုပ်ဆောင်နေသော် လည်း အခက်အခဲပေါင်းများစွာ၊ စိန်ခေါ်မှုများစွာနှင့် ဆက်လက်ကြုံတွေ့နေရဆဲဖြစ်ကြောင်း ရဲမှူးချုပ်ဝင်းနိုင်က ပြောသည်။ 

မူးယစ်ဂိုဏ်းအဖွဲ့များ၏ မူးယစ်ဆေးဝါး သယ်ဆောင်ရောင်းဝယ်မှုနည်းစနစ်နှင့် လမ်းကြောင်းများ အမြဲပြောင်းလဲ၍ ဆောင်ရွက်လာသည့်အတွက် နိုင်ငံအားလုံး ရေရှည်ပူးပေါင်းဖြေရှင်း ဆောင်ရွက်သွားရမည့် အရေးကြီးလုပ်ငန်းတာဝန်တစ်ရပ်ဖြစ်ပြီး နိုင်ငံဖြတ်ကျော် မှုခင်းကျူးလွန်သူ ဂိုဏ်းအဖွဲ့များ သည် မူးယစ်ဆေးဝါးကုန်သွယ်မှုကို အဓိကစီးပွားရေးလုပ်ငန်းအဖြစ် ဆက် လက်တိုးမြှင့် လုပ်ကိုင်ဆောင်ရွက်လာသဖြင့် မူးယစ်ဆေးဝါး ပြဿနာသည် လျော့ကျသွားခြင်းမရှိသည့်အပြင် ပိုမိုကျယ်ပြန့်လာခြင်းနှင့်အတူ ဒေသအပြင်ဘက်မှ မူးယစ်ဂိုဏ်းအဖွဲ့များက ကွန်ရက်များတည် ဆောက်ပြီး ဈေးကွက်ချဲ့ထွင်လာကြကြောင်း ၎င်းကဆက်လက်ပြောသည်။

ယနေ့ကမ္ဘာ့နိုင်ငံများကို ခြိမ်းခြောက်လျက်ရှိသည့် အဓိကပြဿနာသည် လူလုပ်မူးယစ်ဆေးဝါး (Synthetic Drug) ပြဿနာဖြစ်ပြီး ထုတ်လုပ်၊ သယ်ဆောင်၊ ရောင်းဝယ်မှုများ ပိုမိုကြီးမားကျယ်ပြန့်လာခဲ့ကြောင်း၊ အလားတူ ဈေးကွက်အတွင်းတွင် အရည်အသွေးကောင်းမွန်ပြီး ဈေးနှုန်းချိုသာသည့် လူလုပ်မူးယစ်ဆေးဝါးများ လွယ်ကူစွာဝယ်ယူရရှိမှုများကြောင့် သုံးစွဲသူဦးရေ များပြားလာသည်ကို တွေ့ရှိရမည်ဖြစ်ကြောင်း ၎င်းက ဆက်လက်ပြောသည်။ 

မြန်မာနိုင်ငံအနေဖြင့် မူးယစ်ဆေးဝါးပြဿနာကို ဖြေရှင်းနိုင်ရန် လူလုပ်မူး ယစ်ဆေးဝါးထုတ်လုပ်ရာတွင် မရှိမဖြစ်လိုအပ်သည့် ပရီကာဆာထိန်းချုပ်ရေးကို အဓိကဦးစားပေးဆောင်ရွက်ရမည်ဖြစ်ကြောင်း၊ ဒေသတွင်းသို့ ပရီကာဆာဓာတုပစ္စည်းများ တရားမဝင် ဝင်ရောက်နေမှုများနှင့် လမ်းလွဲရောက်ရှိမှုများမှာလည်း မူးယစ်ဆေးဝါးတိုက်ဖျက်ရေးလုပ်ငန်းများအတွက် အဓိက စိန်ခေါ်မှုတစ်ရပ်ဖြစ်နေသည်ကို တွေ့ရှိရကြောင်း ရဲမှူးချုပ် ဝင်းနိုင်က ပြောသည်။ 

မူးယစ်ဆေးဝါးချက်လုပ်ရာတွင် အသုံးပြုနေသည့် ဓာတုပစ္စည်းများဖမ်းဆီးရမိမှုသည် မူးယစ်ဆေးဝါး ဖမ်းဆီးရမိမှုများနှင့် နှိုင်းယှဉ်ပါက လွန်စွာနည်း ပါးနေသည့်အတွက် နှစ်နိုင်ငံ နယ်နိမိတ်ထိစပ်နေသည့် နယ်စပ်ဒေသများမှ ပရီကာဆာဓာတုပစ္စည်းများ တရားမဝင် ဝင်ရောက်မှုမရှိစေရေးကို ယခုထက်ပိုမို တိုးမြှင့်ပူးပေါင်းဆောင်ရွက်သွားရမည် ဖြစ်ကြောင်း၊ နှစ်နိုင်ငံအကြား မူးယစ်တရားခံပြေးများ၊ ကွင်းဆက်တရားခံများ၊ ပရီကာဆာဓာတုပစ္စည်းများ တရားမဝင် သယ်ဆောင်ရောင်းဝယ်မှုဆိုင်ရာ သတင်းအချက်အလက်များ၊ မူးယစ်ကုန်ကူးသူများ၏ လှုပ်ရှားဆောင်ရွက်မှုများနှင့်ပတ်သက်ပြီး သတင်းအချက်အလက်များရရှိပါက အချိန်နှင့်တစ်ပြေးညီ သတင်းဖလှယ်ပေးပို့စေလိုကြောင်းလည်း ရဲမှူးချုပ် ၎င်းက ဆွေးနွေးပြောကြားခဲ့ကြောင်း သိရသည်။