Pearl (NSS) - ဇန်နဝါရီ ၂၅

ရပ်စောက်မြို့နယ်တွင်  ၆ ဘီးမော်တော်ယာဉ်ပေါ် မီးသွေးအိတ်များဖြင့် ဖုံးအုပ်သယ်ဆောင်လာသည့် ငွေကျပ် ၁၂ ဘီလျံကျော်တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့ပြီး ကွင်းဆက်ကျူးလွန်သူများကို ဆက်လက်ဖော်ထုတ်နေကြောင်း  မြန်မာ နိုင်ငံ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ထံမှ သတင်းရရှိသည်။ 

အဆိုပါ စိတ်ကြွရူးသွပ်ဆေးပြားများကို ပြီးခဲ့သည့် ဇန်နဝါရီလ ၁၇ ရက်၊ ညပိုင်း ၇ နာရီခွဲအချိန်ခန့်က ရှမ်းပြည်နယ်(တောင်ပိုင်း)၊ ရပ်စောက်မြို့နယ်၊ ရပ်စောက်-အင်တောသွားကားလမ်း၊ ထင်းကွင်းကျေးရွာအနီးတွင် ဖမ်းဆီးရမိခဲ့ခြင်း ဖြစ်ကြောင်း သိရသည်။ 

မော်တော်ယာဉ် ၂ စီးဖြင့် မူးယစ်ဆေးဝါးများ သယ်ဆောင်မည်ဖြစ်ကြောင်း သတင်းအရ လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့သည် အဆိုပါကျေးရွာအနီးတွင်  စောင့်ဆိုင်းစဉ် အင်တောမှ ရပ်စောက်ဘက်သို့  ဇော်ဝင်းသိန်း မောင်းနှင်ပြီး ထူးဝင့်မောင် လိုက်ပါလာသည့် HILUX မော်တော်ယာဉ်နှင့် အောင်ပြည့်စုံဦး(ခ)ပြည့်စုံ မောင်းနှင်ပြီး မထူးထူးအောင် တို့လိုက်ပါလာသည့် CANTER ၆ ဘီး မော်တော်ယာဉ်တို့ ရောက်ရှိလာသဖြင့် ရှာဖွေစစ်ဆေးမှုများ ပြုလုပ်ခဲ့ကြောင်း သိရသည်။ 

ထိုသို့ ရှာဖွေခဲ့ရာ CANTER  ၆ ဘီး မော်တော်ယာဉ်ပေါ်တွင် မီးသွေးအိတ်များဖြင့် ဖုံးအုပ်သယ်ဆောင်လာသည့် ဒေသကာလ တန်ဖိုးငွေကျပ် ၁၂ ဒသမ ၅ ဘီလျံတန်ဖိုးရှိ စိတ်ကြွရူးသွပ်ဆေးပြား ၂၅ သန်း သိမ်းဆည်းရမိခဲ့ကြောင်း သိရသည်။ 

ဖမ်းဆီးရမိသူများ၏ ဖော်ထုတ်ချက်အရ ယင်းနေ့ ညပိုင်း ၁၁ နာရီခွဲအချိန်တွင် စိတ်ကြွရူးသွပ်ဆေးပြားများအား တာဝန်ခံသယ်ဆောင်ခိုင်းသူ အောင်ကျော်မျိုး(ခ)ရဲထွဋ်(ခ)ရှမ်းလေးကို ရွှေညောင်မြို့၊ ပြည်ထောင်စုလမ်း၊ နယ်မြေ(၂)ရှိ ၎င်း၏နေအိမ်တွင် ဆက်လက်ဖမ်းဆီးရမိခဲ့ကြောင်း သိရသည်။ 

သိမ်းဆည်းရမိ စိတ်ကြွရူးသွပ်ဆေးပြားများသည် ရပ်စောက်မြို့ နယ်၊ ကျောက်ဂူကျေးရွာမှ တောင်ကြီးမြို့နယ်၊ ရွှေညောင်မြို့သို့ သယ်ဆောင်ခြင်းဖြစ်ကြောင်း ဖမ်းမိသူများအား စစ်ဆေးဖော်ထုတ်ချက်အရ သိရှိရသည်ဟု ရဲတပ်ဖွဲ့က ဆိုသည်။ 

လက်ရှိတွင်ဖမ်းဆီးရသူများအား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများကို ဆက်လက်စစ်ဆေးဖော်ထုတ်နေကြောင်း သိရသည်။