Pika (NSS) - ဇန်နဝါရီ ၁ဝ

ရုရှားနိုင်ငံသည် ကုန်သွယ်မှုနှင့် စီးပွားရေး ပူးပေါင်းဆောင်ရွက်မှုများတွင် အနောက်အုပ်စုနိုင်ငံများအား သွေဖယ်ကာ ကမ္ဘာ့အရှေ့ခြမ်း နှင့် တောင်ခြမ်းတို့သို့ ပြန်လည်ဦးတည်ရန် အာရုံစိုက်နေကြောင်း စီးပွားရေးအခွင့်အရေး ဆိုင်ရာဥက္ကဋ္ဌကော်မရှင်နာ ဘောရစ်တီတော့ဗ်က ပြောကြားခဲ့သည်။

ရုရှားနိုင်ငံ၏ ဆုံးဖြတ်ချက်မှာ နိုင်ငံရေးဆိုင်ရာဆုံးဖြတ်ချက် (သို့မဟုတ်) အငြိုးထားကာ လုပ်ဆောင်ခြင်းမျိုး မဟုတ်ဘဲ စီးပွားရေးအကြောင်းပြချက်ဖြင့် ရွေးချယ်ထားသော လမ်းကြောင်းတစ်ခုဖြစ်ကြောင်း ဘောရစ်တီတော့ဗ် က ပြောကြားခဲ့သည်။

"ဒါက အနောက်အုပ်စုဟာ တံခါးပိတ်ထားတဲ့အခန်းတစ်ခန်းဖြစ်နေပြီဆိုတာကို ပြသနေတာပါ။ အနောက်အုပ်စု ဟာ လူသားတွေအတွက် အတိတ်တစ်ခုလိုပဲဖြစ်သွားတော့မှာပါ။ အနာဂတ်ကတော့ ကမ္ဘာ့အရှေ့ ခြမ်း နဲ့ တောင်ခြမ်းတို့ဖြစ်လာမှာပါ။ လာမယ့်အနာဂတ်မှာ ရုရှားဟာ အနောက်အုပ်စုနိုင်ငံတွေနဲ့ စီးပွားရေး ပူးပေါင်း ဆောင်ရွက်မှုတွေလုပ်ဆောင်ဖို့က မဖြစ်နိုင်တော့ပါဘူး။မနက်ဖြန်မှာ အမေရိကန်နဲ့ နေတိုးတို့ဟာ ယူကရိန်း ပဋိပက္ခနဲ့ပတ်သက်ပြီး ရုရှားအပေါ်ချမှတ်ထားတဲ့ပိတ်ဆို့အရေးယူမှုတွေကို ဖယ်ရှားပေးလိုက်မယ်ဆိုရင်တောင် ကျွန်တော်တို့ဟာ အနောက်အုပ်စုဘက်ကို ဘယ်တော့မှပြန်လှည့်တော့မှာ မဟုတ်ပါဘူး။ အနောက်အုပ်စုဆီကို ပြန်လှည့်တာမျိုး ဘယ်တော့မှရှိလာမှာမဟုတ်ပါဘူး။ ဘာကြောင့်လဲဆိုတော့ အနောက်အုပ်စုရဲ့ ရုရှားအပေါ် လုပ်ရပ်တွေက လက်မခံနိုင်စရာ လုပ်ရပ်တွေဖြစ်နေလို့ပါ" ဟု ၎င်းက ပြောခဲ့သည်။

ထို့အပြင် အရှေ့နိုင်ငံများသည် ပိုမိုဖွံ့ဖြိုးတိုးတက်လျက်ရှိပြီး ပိုမိုအားကောင်းသည့်လူသားအရင်းအမြစ်များ ပိုင်ဆိုင် ထားသည့်အပြင် နောက်ဆုံးပေါ်နည်းပညာများ ဖွံ့ဖြိုးတိုးတက်နေသည့်နေရာတစ်ခုဖြစ်ကြောင်း ဘောရစ်တီတော့ဗ် က ပြောကြားခဲ့သည်။

၎င်းက "ဒီနေရာဟာ ရုရှားနဲ့ ကုန်သွယ်မှု၊ စီးပွားရေးဆက်ဆံမှုတွေကို မြှင့်တင်လိုသူတွေ၊ မိတ်ဖက်ဖြစ်လိုသူတွေ ရှိတဲ့နေရာတစ်ခုပါ" ဟု ဆိုခဲ့သည်။

ပြီးခဲ့သည့်နှစ်များအတွင်း ရုရှားအစိုးရသည် ကမ္ဘာ့အရှေ့ခြမ်းနှင့် တောင်ခြမ်းတို့ရှိ နိုင်ငံများနှင့်ဆက်ဆံရေးကို ပိုမိုချဲ့ထွင်ခဲ့ကြောင်းလည်း သိရသည်။ ယူကရိန်းပဋိပက္ခနှင့်ပတ်သက်ပြီး ရုရှားအပေါ် အနောက်အုပ်စုနိုင်ငံများ၏ ပိတ်ဆို့အရေးယူမှုများကြောင့် အဆိုပါလုပ်ငန်းစဉ်မှာ အရှိန်အဟုန်ဖြင့် ကျယ်ပြန့်လာခဲ့ကြောင်းလည်း သိရသည်။