ဂျန်ဇက် (NSS) - ဇန်နဝါရီ ၉ 

ငွေကြေးထောင်ချောက်နဲ့ရင်ဆိုင်နေရတဲ့ ကျူးဘားအစိုးရက ၎င်းတို့အနေနဲ့ လာမယ့်ဖေဖော်ဝါရီ ၁ ရက်က စတင်ပြီး လောင်စာဆီဈေးနှုန်းကို ၅ဝဝ ရာခိုင်နှုန်းတိုးမြှင့်သွားမှာဖြစ်ကြောင်း ထုတ်ဖော်ပြောဆိုလိုက်ပါတယ်။ 

အမေရိကန်အစိုးရရဲ့ပိတ်ဆို့မှုကိုရင်ဆိုင်နေရတဲ့ ကျူးဘားအစိုးရဟာ လိုငွေပြမှုတွေကို လျော့ချနိုင်ဖို့ ရည်ရွယ်ချက် နဲ့ စီးပွားရေးအစီအစဉ်များကို အပြောင်းအလဲလုပ်ဆောင်ဖို့ ပြင်ဆင်နေရာ လောင်စာဆီဈေးနှုန်းကိုလည်း ယခင်ထက် တိုးမြှင့်သွားဖို့ စီစဉ်နေကြောင်း သိရပါတယ်။

ဓါတ်ဆီတစ်လီတာကို ယခင်က ၂၅ ပီဆိုသာ ကောက်ခံခဲ့ပေမယ့် ၁၃၂ ပီဆိုအထိ တိုးမြှင့်ရောင်းချသွားမှာဖြစ်သလို ပရီမီယံဓါတ်ဆီတစ်လီတာကို ယခင်က ၃ဝ ပီဆိုနှုန်းသာ ရောင်းချပေမယ့် ၁၅၆ ပီဆိုအထိ တိုးမြှင့်ရောင်းချသွားဖို့ စီစဉ်ထားကြောင်း သိရပါတယ်။ ကျူးဘားနိုင်ငံဟာ လောင်စာဆီတွေအတွက် နိုင်ငံခြားငွေကြေးပေးချေဖို့ ရုန်းကန် နေရကြောင်း သိရပါတယ်။

ကျူးဘားနိုင်ငံရဲ့စီးပွားရေးကျဆင်းမှုနဲ့အတူ ငွေကြေးဖောင်းပွမှုနှုန်းကလည်း ၃ဝ ရာခိုင်နှုန်းအထိ မြင့်တက်လာနေ ကြောင်း သိရပါတယ်။ ကျူးဘားစီးပွားရေးဝန်ကြီး Alejandro Gil  က အစိုးရဟာ လောင်စာဆီတွေကို အရှုံးခံကာ ဈေးလျော့ရောင်းချပေးဖို့ အချိန်အတန်ကြာလုပ်ဆောင်နိုင်မှာမဟုတ်ကြောင်း၊ ကျူးဘားနိုင်ငံဟာ နိုင်ငံခြား ငွေကြေး လိုအပ်ချက်ရှိနေတဲ့အပြင် အမေရိကန်အစိုးရရဲ့ဆယ်စုနှစ်နဲ့ချီပြီး ပိတ်ဆို့မှုတွေချမှတ်ခဲ့ခြင်းကြောင့် လောင်စာဆီတွေကို ဈေးပေါပေါနဲ့ရောင်းချပေးနိုင်မှာမဟုတ်ကြောင်း ပြောပါတယ်။ 

ကျူးဘားစီးပွားရေးဝန်ကြီးက "ကျူးဘားနိုင်ငံဟာ လောင်စာဆီဈေးနှုန်းတွေကို အလွန်ဈေးပေါတဲ့နှုန်းနဲ့ ရောင်းချပေးမှာ မဟုတ်ဘူး။ ကျူးဘားနိုင်ငံမှာ ရောင်းချတဲ့ လောင်စာဆီဈေးနှုန်းဟာ အခြားနိုင်ငံတွေနဲ့ နှိုင်းယှဉ် ရင် များစွာ ဈေးအနိမ့်ဆုံးဖြစ်နေတယ်။ လက်ရှိအချိန်မှာတော့ လောင်စာဆီဈေးနှုန်းတွေကို ယခင်နှုန်းအတိုင်း မရောင်းချပေးနိုင်တော့ဘူး" လို့ ပြောပါတယ်။