ရထားတွဲမီးလောင်မှုနှင့်ပတ်သက်ပြီး အတိုက်အခံပါတီအဖွဲ့ဝင်များကို ဘင်္ဂလားဒေ့ရှ်ရဲတပ်ဖွဲ့ဖမ်းဆီး
Pika (NSS) - ဇန်နဝါရီ ၇
ဘင်္ဂလားဒေ့ရှ်နိုင်ငံတွင် ရွေးကောက်ပွဲမတိုင်မီ လူ(၄)ဦးသေဆုံးကာ အခြားလူ(၈)ဦးကို ထိခိုက်ဒဏ်ရာရရှိစေခဲ့သည့် ရထားတစ်စင်းမီးလောင်မှုနှင့်ပတ်သက်ပြီး အတိုက်အခံပါတီအဖွဲ့ဝင်(၇)ဦးကို ဇန်နဝါရီလ(၆)ရက်တွင် ဖမ်းဆီးခဲ့ကြောင်း ရဲတပ်ဖွဲ့က ပြောကြားခဲ့သည်။
အဆိုပါရထားတွဲ မီးလောင်မှုသည် ရည်ရွယ်ကာလုပ်ဆောင်သည့် လုပ်ရပ်တစ်ခုဖြစ်သည်ဟု သံသယရှိကြောင်း ရဲတပ်ဖွဲ့က ထုတ်ဖော်ပြောဆိုခဲ့ပြီးနောက် ယခုကဲ့သို့ ဖမ်းဆီးမှုများလုပ်ဆောင်ခဲ့ခြင်းဖြစ်သည်။
Benapole Express ရထားတွဲသည် ဇန်နဝါရီလ(၅)ရက် ညတွင် ဒါကာမြို့လယ်မှာ မီးလောင်ခဲ့ခြင်းဖြစ်ပြီး အနည်းဆုံး ရထားတွဲလေးစင်းခန့် မီးလောင်ကျွမ်းသွားခဲ့ကြောင်း တာဝန်ရှိသူများက ပြောကြားခဲ့သည်။
ထို့အပြင် ရာနှင့်ချီသော လူများသည် မီးလောင်ကျွမ်းနေသော ရထားတွဲအတွင်းမှ လူများကို ဆွဲထုတ်ရန်အတွက် အပြေးအလွှား လာရောက်ကူညီခဲ့ကြကြောင်းလည်း သိရသည်။ ဇန်နဝါရီလ(၇)ရက် ရွေးကောက်ပွဲမတိုင်မီ ဘင်္ဂလားဒေ့ရှ်အမျိုးသားရေးပါတီ (BNP) ၏ လူသေဆုံးစေခဲ့သည့် အဖျက်လုပ်ရပ်များကို ရဲတပ်ဖွဲ့က ပြစ်တင် ဝေဖန်ခဲ့ကြောင်းလည်း သိရသည်။ ဒါကာမြို့ရှိ BNP ပါတီအကြီးတန်းအရာရှိ Nabiullah Nabi နှင့် အခြားအတိုက် အခံပါတီတက်ကြွလှုပ်ရှားသူ(၆)ဦးကို ဇန်နဝါရီလ(၆)ရက် အစောပိုင်ငးတွင် ဖမ်းဆီးခဲ့ကြောင်း ရဲတပ်ဖွဲ့က ပြောကြားခဲ့သည်။
ဒါကာမြို့ရဲတပ်ဖွဲ့ပြောရေးဆိုခွင့်ရှိသူ Faruk Hossain က "BNP ပါတီအကြီးတန်းအရာရှိ Nabiullah Nabi ဟာ တိုက်ခိုက်မှုအတွက် ငွေကြေးထောက်ပံ့မှုတွေလုပ်ဆောင်ခဲ့ပြီး အဲဒီတိုက်ခိုက်မှုကို စီစဉ်ညွှန်ကြားခဲ့တာပါ" ဟု ပြောခဲ့သည်။
BNP ပါတီ အပါအဝင် အခြားအတိုက်အခံပါတီ ဒါဇင်ပေါင်းများစွာသည် ဇန်နဝါရီလ(၇)ရက်တွင် ကျင်းပမည့် ရွေးကောက်ပွဲကို အတုအယောင်ရွေးကောက်ပွဲသာဖြစ်ကြောင်း ပြောဆိုကာ သပိတ်မှောက်ခဲ့ကြကြောင်းလည်း သိရသည်။ ရထားတွဲမီးလောင်ကျွမ်းမှုနှင့်ပတ်သက်ပြီး တာဝန်ရှိသည်ဆိုသည့် စွပ်စွဲပြောဆိုချက်များကို BNP ပါတီက ငြင်းဆန်ပယ်ချခဲ့ကာ အဆိုပါဖြစ်ရပ်နှင့်ပတ်သက်ပြီး စုံစမ်းစစ်ဆေးမှုများ လုပ်ဆောင်ရန် နိုင်ငံတကာကို တောင်းဆိုခဲ့ကြောင်းလည်း သိရသည်။
BNP ပါတီပြောရေးဆိုခွင့်ရှိသူ A K M Wahiduzzaman က "ဒါဟာ BNP ပါတီရဲ့အကြမ်းမဖက်တဲ့လှုပ်ရှားမှုတွေကို သိက္ခာချဖို့ ရည်ရွယ်တဲ့ အစိုးရအရာရှိတွေရဲ့အဖျက်လုပ်ရပ်တွေပဲဖြစ်ပါတယ်။ အစိုးရဟာ အတုအယောင် ရွေးကောက်ပွဲကနေ ပြည်သူတွေရဲ့အာရုံတွေကို လွှဲနိုင်ဖို့အတွက် ဒီလိုပူးပေါင်းကြံစည်မှုတွေကို အကောင်အထည် ဖော်မှာကို စိုးရိမ်မိတယ်လို့ ကျွန်တော်တို့ပါတီအကြီးအကဲ Tarique Rahman က ပြောဆိုခဲ့ဖူးပါတယ်" ဟု ပြောခဲ့သည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
လက်နက်ကိုင်ပဋိပက္ခကို ဖြေရှင်းနိုင်ရန် အခြေခံဥပဒေကို ကျော်လွန်စဉ်းစားသင့်ကြောင်း တပ်ချုပ်အား ရခိုင့်ဦးဆောင်ပါတီ အကြံပြုခဲ့
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ