Pika (NSS) - ဒီဇင်ဘာ ၂၇ 

အမေရိကန်တပ်ဖွဲ့များသည် ပင်လယ်နီအတွင်းရှိ ကုန်တင်သင်္ဘောများကို ပစ်မှတ်ထားတိုက်ခိုက်ခဲ့သည့် ယီမင်အခြေစိုက် ဟူသီလက်နက်ကိုင်အဖွဲ့၏ တိုက်ခိုက်ရေးဒရုန်း တစ်ဒါဇင် နှင့် ဒုံးကျည်အများအပြားကို ပစ်ချခဲ့ကြောင်း အမေရိကန်စစ်ဌာနချုပ်ပင်တဂွန်က ဒီဇင်ဘာလ(၂၆)ရက်တွင် ထုတ်ပြန်ပြောကြားခဲ့သည်။

ပင်တဂွန်စစ်ဌာချုပ်၏ ကွပ်ကဲမှုဌာနက "အဲဒီတိုက်ခိုက်မှုအတွင်း သင်္ဘောတွေပျက်စီးတာ ဒါမှမဟုတ် လူထိခိုက် ဒဏ်ရာရရှိတာမျိုးတွေ မရှိခဲ့ပါဘူး။ နာရီပေါင်း(၁ဝ)နာရီအတွင်းမှာ  ဒရုန်း(၁၂)စင်း၊ ဖျက်သင်္ဘော ပဲ့ထိန်း ဒုံးကျည် (၃)စင်း၊ မြေပြင်တိုက်ခိုက်ရေးဒုံးကျည်(၂)စင်းတို့ကို အမေရိကန်တပ်ဖွဲ့တွေက ပစ်ချနိုင်ခဲ့ပါတယ်" ဟု ပြောခဲ့သည်။

ပင်လယ်နီအတွင်း သွားလာနေသော သင်္ဘောတစ်စင်းကို ဒုံးကျည်ဖြင့်တိုက်ခိုက်ခြင်း နှင့် အစ္စရေးကို ပစ်မှတ်ထားကာ ဒရုန်းတစ်စင်းဖြင့် တိုက်ခိုက်ခြင်းတို့အတွက် ၎င်းတို့တွင် တာဝန်ရှိကြောင်း ဟူသီလက်နက်ကိုင်အဖွဲ့က အစောပိုင်းတွင် ထုတ်ပြန်ပြောခဲ့သည်။

အဆိုပါထုတ်ပြန်ချက်တွင် "MSC UNITED လို့အမည်ရတဲ့ ကုန်တင်သင်္ဘောတစ်စီးကို ကျွန်တော်တို့ ပစ်မှတ်ထား တိုက်ခိုက်ခဲ့ပါတယ်။ ပြီးတော့ အစ္စရေးနိုင်ငံတောင်ပိုင်းမှာရှိတဲ့ စစ်ဖက်ဆိုင်ရာ ပစ်မှတ်တွေကို တိုက်ခိုက်ဖို့ ဒရုန်း အများအပြားလည်း လွှတ်တင်ခဲ့ပါတယ်" ဟု ရေးသားထားသည်။ 

အစ္စရေး-ဟားမက်လက်နက်ကိုင်အဖွဲ့ကြား စစ်ပွဲစတင်ခဲ့သည့် အောက်တိုဘာလ(၇)ရက်ကတည်းက ဟူသီလက်နက်ကိုင်အဖွဲ့သည် ပင်လယ်နီဒေသတွင် ဒရုန်းများ၊ ဒုံးကျည်များဖြင့်် ပစ်ခတ်တိုက်ခိုက်မှုများကို လုပ်ဆောင်နေခဲ့ကြောင်း သိရသည်။ ဂါဇာကမ်းမြောင်ဒေသအပေါ် လုပ်ဆောင်နေသော အစ္စရေး၏ ထိုးစစ်ဆင်မှု များ ရပ်တန့်စေရန်အတွက် အစ္စရေးနိုင်ငံအပြင် ၎င်းတို့နှင့်ဆက်နွယ်နေသော သင်္ဘောများကို ပစ်မှတ်ထား တိုက်ခိုက်နေခြင်းဖြစ်ကြောင်း ဟူသီလက်နက်ကိုင်အဖွဲ့က အစောပိုင်းတွင် ထုတ်ပြန်ပြောခဲ့သည်။

ထို့အပြင် ဒီဇင်ဘာလ(၂၆)ရက် အစောပိုင်းတွင် ယီမင်နိုင်ငံ အနောက်ဖက်ကမ်းရိုးတန်းရှိ Hodeida ဆိပ်ကမ်း အနီးတွင် ပေါက်ကွဲသံများကြားခဲ့ရကြောင်း ဗြိတိန်ရေကြောင်း ကုန်သွယ်ရေးလုပ်ငန်း(UKMTO) က ပြောကြားခဲ့ သည်။ 

သို့သော်လည်း ဆိပ်ကမ်းအနီးရှိ ကုန်တင်သင်္ဘောပျက်စီးခြင်းမျိုး နှင့် သင်္ဘောအမှုထမ်းများ ထိခိုက်ဒဏ်ရာရရှိခြင်း မျိုးမရှိခဲ့ကြောင်း (UKMTO) က ပြောကြားခဲ့သည်။ ဒီဇင်ဘာလ(၂၆)ရက် အစောပိုင်းတွင် Hodeida ကမ်းလွန် ပင်လယ်ပြင်ရှိ သင်္ဘောတစ်စီးအနီးတွင် ပေါက်ကွဲမှုနှစ်ခုဖြစ်ပွားခဲ့ပြီးနောက် အဆိုပါပေါက်ကွဲမှုထပ်မံဖြစ်ပွားခဲ့ခြင်း ဖြစ်ကြောင်း ဗြိတိန်ရေကြောင်း အာဏာပိုင်များက ပြောကြားခဲ့သည်။

ထို့အပြင် အစ္စရေး-ဟားမက် စတင်ဖြစ်ပွားခဲ့သည့်နောက်ပိုင်းတည်းက ဟူသီလက်နက်ကိုင်အဖွဲ့သည် ဒရုန်းများ နှင့် ဒုံးကျည်အစင်းရေ(၁ဝဝ)ကျော်ဖြင့် ကုန်တင်သင်္ဘော(၁ဝ)စီးကို ပစ်မှတ်ထားတိုက်ခိုက်ခဲ့ကြောင်း ပင်တဂွန် က ပြောကြားခဲ့သည်။

အဆိုပါတိုက်ခိုက်မှုများသည် ကမ္ဘာလုံးဆိုင်ရာကုန်သွယ်မှုများ၏ (၁၂)ရာခိုင်နှုန်းရှိသော သယ်ယူပို့ဆောင်ရေး လမ်းကြောင်းကို အန္တရာယ်ဖြစ်စေခဲ့ကြောင်းလည်း သိရသည်။ ထို့ကြောင့် အမေရိကန်နိုင်ငံသည် ကုန်တင်သင်္ဘော များကို ဟူသီလက်နက်ကိုင်အဖွဲ့၏ တိုက်ခိုက်မှုများမှ ကာကွယ်နိုင်ရန်အတွက်နိုင်ငံပေါင်း(၂ဝ)ခန့် ပါဝင်သော  ညွန့်ပေါင်းအဖွဲ့ကို ဖွဲ့စည်းကာ ကင်းလှည့်နေခဲ့ကြောင်း သိရသည်။