Pika (NSS) - ဒီဇင်ဘာ ၂၆ 

အိန္ဒိယအာဏာပိုင်များက ဖမ်းဆီးထားသော  Vivo ဖုန်းကုမ္ပဏီဝန်ထမ်း တရုတ်နိုင်ငံသားနှစ်ဦးအတွက် ကောင်စစ်ဝန်ကာကွယ်ရေး နှင့် အကူအညီများ ထောက်ပံ့ပေးသွားမည်ဖြစ်ကြောင်း တရုတ်အစိုးရက ထုတ်ဖော်ပြောခဲ့သည်။ 

တရုတ်ကုမ္ပဏီများအား ခွဲခြားဆက်ဆံခြင်းမျိုး မပြုလုပ်ရန် အိန္ဒိယအစိုးရကို တိုက်တွန်းတောင်းဆိုထားကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူတစ်ဦးက ဒီဇင်ဘာလ(၂၅)ရက်တွင် ပြောကြားခဲ့သည်။ 

"အိန္ဒိယအစိုးရပြောဆိုခဲ့တဲ့စကားတွေအတိုင်း ကျွန်မတို့ အနီးကပ်လုပ်ဆောင်နေပါတယ်။ တရားဝင်အခွင့်အရေးနဲ့ အကျိုးစီးပွားတွေကို ကာကွယ်ဖို့အတွက်  တရုတ်ကုမ္ပဏီတွေကို အစိုးရကအပြည့်အဝထောက်ခံပါတယ်" ဟု တရုတ်နိုင်ငံခြားရေးဝန်ကြီးဌာနပြောရေးဆိုခွင့်ရှိသူမာအိုနင်က ပြောခဲ့သည်။

အိန္ဒိယ၏ ဘဏ္ဍာရေးရာဇ၀တ်မှုတိုက်ဖျက်ရေးအေဂျင်စီသည်  အိန္ဒိယရှိ Vivo ဖုန်းကုမ္ပဏီ အကြီးတန်းဝန်ထမ်း နှစ်ဦးကို ပြီးခဲ့သည့်သီတင်းပတ်က ဖမ်းဆီးခဲ့ခြင်းဖြစ်ကြောင်း သိရသည်။ ထို့အပြင် အဆိုပါအမှုကို ဖြေရှင်းရန် အတွက် ဥပဒေနည်းလမ်းအားလုံးကို အသုံးပြုသွားမည်ဖြစ်ကြောင်း Vivo ဖုန်းကုမ္ပဏီက ပြောကြားခဲ့သည်။ 

အိန္ဒိယအာဏာပိုင်များသည် ဒီဇင်ဘာလ(၂၃)ရက်တွင် အဆိုပါဝန်ထမ်းနှစ်ဦးကို ဒေလီမြို့တရားရုံးသို့ခေါ်ဆောင် သွားခဲ့ပြီးနောက် အချုပ်ထဲသို့ ထည့်ခဲ့ခြင်းဖြစ်ကြောင်း အဆိုပါကိစ္စနှင့်နီးစပ်သည့်လူတစ်ဦးက ပြောကြားခဲ့သည်။ အဆိုပါဝန်ထမ်းနှစ်ဦးကို ဒီနေ့ ဒီဇင်ဘာလ(၂၆)ရက်တွင် ရုံးထုတ်ခဲ့ကြောင်း သတင်းရင်းမြစ်တစ်ခုက ပြောကြားခဲ့သည်။ 

အိန္ဒိယ၏ စုံစမ်းစစ်ဆေးရေးညွှန်ကြားမှုဦးစီးဌာနသည် ငွေကြေးခဝါချမှုစွပ်စွဲချက်ဖြင့် အိန္ဒိယရှိ  Vivo ဖုန်းကုမ္ပဏီ အတွက် အလုပ်လုပ်နေသော တရုတ်နိုင်ငံသားတစ်ဦး အပါအဝင် စက်မှုလုပ်ငန်းအမှုဆောင်အရာရှိ(၄)ဦးကို ဖမ်းဆီးခဲ့ပြီးနောက် နှစ်လအကြာတွင် ယခုကဲ့သို့ဖမ်းဆီးမှုများ ထပ်မံလုပ်ဆောင်ခဲ့ခြင်းဖြစ်ကြောင်း သိရသည်၊၊ သို့သော်လည်း အိန္ဒိယအစိုးရ၏ စွပ်စွဲပြောဆိုချက်များကို Vivo ဖုန်းကုမ္ပဏီက ငြင်းဆိုထားကြောင်းလည်း သိရသည်။ 

၂ဝ၂ဝ ပြည့်နှစ်တွင် တရုတ် နှင့် အိန္ဒိယကြား နယ်စပ်တိုက်ပွဲများဖြစ်ပွားခဲ့ပြီးနောက် အိန္ဒိယအစိုးရသည် နိုင်ငံ အတွင်းရှိ တရုတ်စီးပွားရေးများနှင့် ရင်းနှီးမြှုပ်နှံမှုများကို စစ်ဆေးမှုများအား ပိုမိုအရှိန်မြှင့်လုပ်ဆောင်လာခဲ့ကြောင်းသိရသည်။