Pika (NSS) - ဒီဇင်ဘာ ၂၆ 

ဒရုန်းများ သယ်ဆောင်လာသည်ဟု ယူဆရသော ရုရှားရေတပ်သင်္ဘောတစ်စီးကို ခရိုင်းမီးယားကျွန်းဆွယ်တွင် ဖျက်ဆီးပစ်ခဲ့ကြောင်း ယူကရိန်းလေတပ်က ဒီဇင်ဘာလ(၂၆)ရက်တွင် ထုတ်ပြန်ပြောကြားခဲ့သည်။ 

ယူကရိန်းလေတပ်က "ဒီဇင်ဘာလ(၂၆)ရက် နံနက်(၂)နာရီခွဲအချိန်မှာ ယူကရိန်းလေတပ် တပ်ဖွဲ့ဝင်တွေဟာ ဖီအိုဒိုစီးယားမြို့အနီးမှာ ရုရှားပင်လယ်နက်ရေယာဉ်စုရဲ့အဓိကသင်္ဘောတစ်စီးဖြစ်တဲ့ Novocherkassk သင်္ဘောကို ခရုဇ်ဒုံးကျည်တွေနဲ့ပစ်ခတ်တိုက်ခိုက်ပြီး ဖျက်ဆီးပစ်နိုင်ခဲ့ပါတယ်" ဟု ပြောခဲ့သည်။

ဖီအိုဒိုစီးယားမြို့သည် ခရိုင်းမီးယားကျွန်းဆွယ်ရှိ ရုရှားရေတပ်၏ အဓိကအခြေစိုက်စခန်းတစ်ခုဖြစ်ကြောင်းလည်း သိရသည်။ ယူကရိန်းလေတပ် တပ်မှူးချုပ် Mykola Olechtchouk သည် ဖီအိုဒိုစီးယားမြို့ရှိ ရုရှားရေတပ်အခြေစိုက် စခန်းတွင် ပေါက်ကွဲမှုများဖြစ်ပွားနေသည့် ဗီဒီယိုဖိုင်တစ်ခုကို ဆိုရှယ်မီဒီယာပေါ်တွင် တင်ခဲ့ကြောင်းလည်း သိရသည်။ 

"ယူကရိန်းတပ်ဖွဲ့တွေဟာ ဖီအိုဒိုစီးယားမြို့ကို တိုက်ခိုက်မှုတွေလုပ်ဆောင်ခဲ့ပါတယ်။ လက်ရှိအချိန်မှာတော့ ဆိပ်ကမ်းဧရိယာကို ပိတ်ဆို့ထားပါတယ်။ ပေါက်ကွဲတာတွေတော့ ရပ်သွားပါပြီ။ ပြီးတော့ မီးလောင်ကျွမ်းမှုတွေ ကိုလည်း ငြိမ်းသတ်နိုင်ခဲ့ပါပြီ။ သက်ဆိုင်ရာဝန်ဆောင်မှုဌာနတွေအားလုံးလည်း ပေါက်ကွဲမှုတွေဖြစ်ပွားခဲ့တဲ့ နေရာမှာ ရောက်နေပါပြီ။ အနီးအနားက နေအိမ်တွေမှာရှိနေတဲ့ဒေသခံတွေအားလုံးကိုလည်း ဘေးလွတ်ကင်းရာကို ရွှေ့ပြောင်းပေးသွားမှာပါ" ဟု ခရိုင်းမီးယားကျွန်းဆွယ်အကြီးအကဲ Sergey Aksyonov က ပြောခဲ့သည်။ 

ယူကရိန်းတပ်ဖွဲ့များသည် ရုရှားစစ်တပ်ကို အဓိကပစ်မှတ်ထားကာ ခရိုင်းမီးယားကျွန်းဆွယ်ကို တိုက်ခိုက်မှုများ မကြာခဏလုပ်ဆောင်လေ့ရှိကြောင်း သိရသည်။ ထို့အပြင် ယူကရိန်းတပ်ဖွဲ့များသည် ၂ဝ၂၂ ခုနှစ် ဧပြီလတွင် ရုရှားပင်လယ်နက်ရေယာဉ်စု၏ အထင်ကရသင်္ဘောတစ်စီးဖြစ်သော Moskva ကို ဖျက်ဆီး နှစ်မြုပ်ပစ်နိုင်ခဲ့ကြောင်း လည်းသိရသည်။