ဂျန်ဇက် (NSS) - ဒီဇင်ဘာ ၂၂

ဟူသီလက်နက်ကိုင်အဖွဲ့တွေ ကြီးစိုးထားတဲ့ ပင်လယ်နီဒေသကို တိုက်ခိုက်မှုများရှိလာနေခြင်းကြောင့် ကမ္ဘာ့ကုန်သွယ်ရေးထိခိုက်ဖွယ်ရှိနေပြီး ကုန်စည်သင်္ဘောတွေဟာ ပင်လယ်နီဒေသရေလမ်းကြောင်းကို ရှောင်ရှားသွားရဖွယ်ရှိနေကြောင်း သိရပါတယ်။

ဂျာမနီ သင်္ဘောကုမ္ပဏီတွေဖြစ်တဲ့ Hapag-Lloyd နဲ့ ဟောင်ကောင်အခြေစိုက် OOCL ကုမ္ပဏီတို့ဟာ အဆိုပါ ပင်လယ်နီဒေသရေလမ်းကြောင်းကို ရှောင်ရှားသွားဖို့ စီစဉ်ထားကြောင်း သိရပါတယ်။ စူးအက်တူးမြောင်းကိုဖြတ်သန်းကာ ပင်လယ်နီဒေသ ရေလမ်းကြောင်းကို အ သုံးပြုနေတဲ့ သင်္ဘောအရေအတွက်ဟာ ကမ္ဘာ့ကုန် သွယ်ရေးရဲ့ ၁၂ ရာခိုင်နှုန်းရှိနေကြောင်းသိရပါတယ်။ စူးအက်တူးမြောင်းဟာ အာရှတိုက် နဲ့ ဥရောပတိုက်ကြား ကုန်သွယ်ရေးအတွက် အဓိကအရေးပါတဲ့ လမ်းကြောင်းတစ်ခုဖြစ်နေပါတယ်။

အစ္စရေးနဲ့ဟားမက်စ်လက်နက်ကိုင်အဖွဲ့ကြား စစ်ပွဲဖြစ် လာခဲ့ပြီးနောက်ပိုင်း ယီမင်အခြေစိုက်ဟူသီလက်နက် ကိုင်အဖွဲ့ဟာ ပါလက်စတိုင်းလူမျိုးတွေကို အားပေးထောက်ခံကြောင်း ပြသဖို့အတွက် ပင်လယ်နီဒေသကိုဖြတ်သန်းတဲ့ ကုန်စည်သင်္ဘောတွေကို ဒရုန်းတွေ၊ ရော့ကဒ်ဒုံးကျည်တွေနဲ့ပစ်ခတ်တိုက်ခိုက်ခဲ့ရာတင်းမာမှုအရှိန်မြင့်တက်လာခဲ့ပါတယ်။ အမေရိကန်အစိုးရဟာ ပင်လယ်နီဒေသမှာတိုက်ခိုက်နေတဲ့ ဟူသီလက်နက် ကိုင်အဖွဲ့ကို နှိမ်နှင်းနိုင်ဖို့ ညွန့်ပေါင်းအဖွဲ့ဖွဲ့စည်းပြီးပင်လယ်နီဒေသကင်းလှည့်မှုတွေ လုပ်ဆောင်သွားမှာဖြစ်ရာ နှစ်ဖက်တင်းမာမှုမြင့်တက်လာခဲ့ပါတယ်။ 

ဟူသီလက်နက်ကိုင်အဖွဲ့က အဆိုပါညွန့်ပေါင်းအုပ်စုထဲမှာပါဝင်တဲ့ နိုင်ငံတွေရဲ့သင်္ဘောတွေကို တိုက်ခိုက်သွားမယ်လို့ ထပ်မံသတိပေးထားပါတယ်။ CH Robinson Worldwide ကုမ္ပဏီက ဒီနှစ်မှာ ပင်လယ်နီဒေသကိုအသုံးပြုနေတဲ့ ကုန်စည်သင်္ဘောအားလုံးရဲ့ ၂၅ ရာခိုင် နှုန်းဟာ သင်္ဘောလမ်းကြောင်းပြောင်းလဲလာဖွယ်ရှိနေကြောင်းဆိုပါတယ်။ ဟူသီလက်နက်ကိုင်အုပ်စုဟာ ပြီးခဲ့တဲ့သီတင်းပတ်တွေအတွင်းက ပင်လယ်နီဒေသ တောင်ဘက် Bab al-Mandab ရေလက်ကြားကိုဖြတ်သန်းတဲ့ ကုန်စည်သင်္ဘောတွေကို အဓိကထားတိုက်ခိုက်နေကြောင်းသိရပါတယ်။