Pika (NSS) - ဒီဇင်ဘာ ၂၁ 

ရုရှားဖက်ဒရယ်လုံခြုံရေးဝန်ဆောင်မှု(FSB) ၏ တာဝန်ရှိသူများသည် ဥရောပသမဂ္ဂသို့ မှောင်ခိုတင်သွင်းရန် ရည်ရွယ်ထားသည့် လက်တင်အမေရိက ကိုကင်း(၆၇၃)ကီလိုဂရမ်ကို ဖမ်းမိခဲ့ကြောင်း သိရသည်။

ထို့အပြင် ဖမ်းဆီးရမိသော ကိုကင်းများ၏ ခန့်မှန်းခြေတန်ဖိုးမှာ အမေရိကန်ဒေါ်လာ(၇၂)သန်းခန့် ရှိကြောင်း FSB က ထုတ်ပြန်ခဲ့သည်။ ထုတ်ပြန်ချက်တွင် "ရုရှားပိုင်နက်ကို အသုံးပြုပြီး ကူးသန်းရောင်းဝယ်ရေးနဲ့ မူးယစ်ဆေးဝါး ဖြန့်ဖြူးမှုတွေအတွက် နိုင်ငံတကာရာဇဝတ်ဂိုဏ်းတစ်ခုရဲ့ နောက်ထပ်ကြိုးပမ်းမှုတစ်ခုက ပျက်ပြားသွားခဲ့ပါတယ်" ဟု ရေးသားဖော်ပြထားသည်။

ရုရှားနိုင်ငံ နယ်စပ်ဒေသများမှ အမျိုးသားနှစ်ဦးကို မူးယစ်ဆေးဝါးများနှင့်အတူ မော်စကိုမြို့တွင် ဖမ်းဆီးခဲ့ခြင်းဖြစ်  ကြောင်း FSB က ပြောကြားခဲ့သည်။ အဆိုပါအမျိုးသားနှစ်ဦးသည် မူးယစ်ဆေးဝါးများကို စုဆောင်းရန်အတွက် မော်စကိုမြို့သို့ရောက်ရှိလာခဲ့ပြီး ဥရောပသမဂ္ဂသို့ မှောင်ခိုတင်သွင်းမည့်နေရာသို့ မူးယစ်ဆေးဝါးများကို ပို့ဆောင်ခဲ့သည်ဟု စွပ်စွဲခံထားရကြောင်း သိရသည်။ 

၎င်းတို့သည် မူးယစ်ဆေးဝါးဖြန့်ဖြူးရေး လုပ်ငန်းများလုပ်ဆောင်ရန်အတွက် ငှားရမ်းထားသောကား၊ ID နှင့် ယာဉ်မောင်းလိုင်စင်အတုများကို အသုံးပြုခဲ့ကြောင်း FSB ၏ ထုတ်ပြန်ချက်တွင် ရေးသားဖော်ပြထားသည်။ FSB က ဆိုရှယ်မီဒီယာပေါ်တွင် တင်ထားသော ဗီဒီယိုဖိုင်ထဲတွင် ကိုကင်းများထည့်ထားသည်ဟု ယူဆရသော အိတ်များ နှင့် သေတ္တာများပါရှိသည့် SUV ကားကို တွေ့မြင်ခဲ့ရသည်။

သို့သော်လည်း အဆိုပါအထုပ်များထဲတွင် မည်သည့်အရာများပါရှိသည်ဆိုသည့်အချက်ကို လုံးဝ မသိရှိထားကြောင်း ဖမ်းဆီးခံထားရသည့် အမျိုးသားနှစ်ဦးက ပြောကြားခဲ့သည်။ အမျိုးသားတစ်ဦးက "ကျွန်တော်တို့ကို ပိုက်ဆံပေးပြီး ဒီသေတ္တာတွေကိုပဲ ပို့ဆောင်ခိုင်းခဲ့တာပါ" ဟု ပြောခဲ့သည်။

မူးယစ်ဆေးဝါးရောင်းဝယ်ဖောက်ကားမှုသည် ရုရှားနိုင်ငံတွင် ကြီးလေးသောရာဇဝတ်မှုတစ်ခုဖြစ်ကြောင်း နှင့် ပြစ်မှုကျူးလွန်သူများကို ထောင်ဒဏ်အနှစ်(၂ဝ) သို့မဟုတ် တစ်သက်တစ်ကျွန်းအထိ ပြစ်ဒဏ်ချမှတ်နိုင်ကြောင်း (FSB) က ပြောကြားခဲ့သည်။