နှစ်စဉ် ပြည်ပမှ စားအုန်းဆီတန်ချိန်(၇၀၀၀၀)ကျော်အထိ တိုးမြှင့်တင်သွင်းရန် စီစဥ်ညှိနှိုင်းနေ
ယွန်း (NP News) - ဒီဇင်ဘာ ၂၁
နှစ်စဥ် ပြည်ပမှစားအုန်းဆီတန်ချိန် (၇၀၀၀၀)ကျော် အထိ တိုးမြှင့်တင်သွင်းရန် စီစဥ်ညှိနှိုင်းနေကြောင်း မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း ဥက္ကဋ္ဌ ဦးဆန်းလင်းက ပြောသည်။
ဥက္ကဋ္ဌ ဦးဆန်းလင်းက ယနေ့(ဒီဇင်ဘာလ ၂၁ ရက်)တွင် ကုန်သည်စက်မှုအသင်းချုပ်၌ ကျင်းပခဲ့သည့် မြန်မာ နိုင်ငံဆီကုန်သည်နှင့် ဆီလုပ်ငန်းရှင်များအသင်း၏ အလုပ်အမှုဆောင်နှင့် ဗဟိုအလုပ်အမှုဆောင်ရွေးချယ်ပွဲတွင် အထက်ပါကဲ့သို့ ပြောကြားခဲ့ခြင်းဖြစ်သည်။
ယခင်က နှစ်စဥ်ပြည်ပမှ စားအုန်းဆီတန်ချိန်(၅၀၀၀၀) ခန့်တင်သွင်းလျက်ရှိရာ လက်ရှိတွင် တန်ချိန်(၇၀၀၀၀) ကျော်အထိတိုး၍ တင်သွင်းနိုင်ရန် ဆီလုပ်ငန်းရှင်အသင်းအနေဖြင့် သက်ဆိုင်ရာဝန်ကြီးဌာနများနှင့် စီစဥ်ဆောင်ရွက်လျက်ရှိကြောင်း သိရသည်။
“ပြည်ပကနေယခင်က စားအုန်းဆီ တန်(၅၀၀၀၀)တင်သွင်းနေရာကနေ အခုချိန်မှာတော့ တန်ချိန်(၇၀၀၀၀) ကျော်လောက် တိုးပြီးတင်သွင်းနိုင်ဖို့ သက်ဆိုင်ရာဝန်ကြီးဌာနနဲ့စီစဥ်ဆောင်ရွက်နေပြီဖြစ်ပါတယ်။ အဲဒီလိုပြည်ပကနေပြီးတော့ တင်သွင်းလာတဲ့စားသုံးဆီများကိုလည်း စံချိန်စံညွှန်းကိုက်ညီဖို့စစ်ဆေးပြီးတော့ ဆီကန်တွေမှာသိုလှောင်မှုအပိုင်းတွေကို ဆောင်ရွက်ပါတယ်” ဟု ဥက္ကဋ္ဌ ဦးဆန်းလင်းက ပြောသည်။
ထိုသို့ ပြည်ပမှတင်သွင်းလာသည့် စားအုန်းဆီများကို ပြည်တွင်းရှိ တိုင်းဒေသကြီး နှင့် ပြည်နယ်အသီးသီးသို့ ခွဲဝေဖြန့်ဖြူးပေးလျက်ရှိပြီး လက်လီလက်ကားရောင်းချသည့် ကုန်သည်များအနေဖြင့် သတ်မှတ်ရည်ညွှန်းဈေးအပေါ်၌ အသားတင်စားရိတ်ပေါင်း၍ အမြတ်(၂) ရာခိုင် နှုန်းဖြင့်သာ ပြန်လည်ရောင်းချရန် ၎င်းကသုံးသပ်ပြောကြားထားသည်။
“စားသုံးဆီလက်လီလက်ကားရောင်းချပေးနေတဲ့ကုန်သည်များအနေနဲ့လည်း ဝယ်ယူရရှိတဲ့ စားသုံးဆီများကို အခွင့်အရေးတစ်ရပ်အနေနဲ့ မဟုတ်ဘဲ မိမိတို့ရဲ့သက်ဆိုင်ရာတိုင်းဒေသကြီးနဲ့ပြည်နယ်များမှာရှိတဲ့ စားသုံးသူများထံကို သတ်မှတ်ရည်ညွှန်းဈေးပေါ်မှာ သင့်တင့် မျှတတဲ့ဈေးနှုန်း(၂)ရာခိုင်နှုန်းပဲပေါင်းပြီးတော့ မှန်မှန်ကန်ကန်ရောင်းချပေးဖို့ မေတ္တာရပ်ခံချင်ပါတယ်” ဟု ဦးဆန်းလင်းက ပြောသည်။
သတ်မှတ်ရည်ညွှန်းဈေးထက် ကျော်လွန်၍ ဈေးနှုန်းများကို အဆမတန်အမြတ်တင်၍ ရောင်းချပါက သက်ဆိုင် ရာတိုင်းဒေသကြီးနှင့် ပြည်နယ်များရှိ သက်ဆိုင်ရာအဖွဲ့အစည်းများမှ စစ်ဆေးမှုများဆောင်ရွက်သွားမည်ဖြစ် ကြောင်း သိရသည်။
စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီး ကြပ်ရေးကော်မတီက ဒီဇင်ဘာလ(၁၈)ရက်မှ ဒီဇင်ဘာ လ(၂၅)ရက်အထိ စားအုန်းဆီ အခြေခံလက်ကားရည် ညွှန်းဈေးကို တစ်ပိဿာလျှင်ငွေကျပ်(၄၈၁၀)သတ်မှတ်ထားသော်လည်း ပြင်ပဈေးကွက်၌ ပြည်သူများအနေ ဖြင့် စားအုန်းဆီတစ်ပိဿာလျှင် ငွေကျပ်(၉၀၀၀)နှုန်းဖြင့် ဝယ်ယူစားသုံးနေရသည်။
မြန်မာနိုင်ငံအနေဖြင့် ပြည်တွင်းလိုအပ်သည့် စားသုံးဆီများကို ပြည်ပမှနှစ်စဉ် အမေရိကန်ဒေါ်လာသန်း(၆၀၀) ကျော်ဖိုးခန့် တင်းသွင်းနေရသဖြင့် နိုင်ငံခြားငွေသုံးစွဲမှုများပြားလျက်ရှိကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ရန်ကုန်-မန္တလေးအမြန်လမ်း၌ Hijet ကားအား Van ကားတစ်စီးမှဝင်တိုက်ခဲ့ရာ (၁၀)ဦးထက်မနည်း ထိခိုက်ဒဏ်ရာရရှိ
RELATED POSTS
20 Sep 2024 | စီးပွားရေး,ပြည်တွင်း
20 Sep 2024 | စီးပွားရေး,ပြည်တွင်း
14 Sep 2024 | စီးပွားရေး,ပြည်တွင်း
14 Sep 2024 | စီးပွားရေး,နိုင်ငံတကာ