ရောင်နီ (NSS) - ဒီဇင်ဘာ ၂၁

စင်ကာပူနိုင်ငံဟာ နိုင်ငံခြားသားခရီးသွားဧည့်သည်တွေ ဝင်ရောက်မှုတိုးမြှင့်ဖို့ ရည်ရွယ်ပြီး ချန်ဂီလေဆိပ် Terminal 2 မှာ အနည်းဆုံး အခန်းပေါင်း ၂၂ဝ ပါရှိတဲ့ ဟိုတယ်အသစ်ကို ၂ဝ၂၇ ခုနှစ်မှာ အပြီးတည်ဆောက်သွား မယ်လို့  သိရပါတယ်။    

၎င်းဟာ လေဆိပ်မှာရှိတဲ့ တတိယမြောက် ဟိုတယ်ဖြစ်လာမှာဖြစ်ပြီး အသစ်ပြန်ဖွင့်တဲ့ T2 ရဲ့ တောင်ဘက်စွန်း Landside မှာ တည်ဆောက်မှာဖြစ်ပါတယ်။ လက်ရှိ အဆိုပါနေရာအနီးမှာ Landside ဟိုတယ်တွေဖြစ်တဲ့ ၂ဝ၁၉ ခုနှစ်က ဖွင့်လှစ်ခဲ့တဲ့ အခန်းပေါင်း ၁၃ဝ ရှိ Yotelair Singapore Changi Airport Hotel ၊ ၂ဝဝ၈ ခုနှစ်က ဖွင့်လှစ်ခဲ့ တဲ့ အခန်းပေါင်း ၅၆၃ ခုရှိ Crowne Plaza Changi Airport Hotel တို့ တည်ရှိပါတယ်။ 

ဒါ့အပြင်စီးပွားရေးအရ အရေးပါတဲ့ ခရီးသည်တွေကို ဝန်ဆောင်မှုပေးနေတဲ့ Air side ဟိုတယ်တွေအဖြစ် T1၊ T2၊ T3 နဲ့ JetQuay terminal ဆိုတဲ့ ဟိုတယ်လေးခုလည်း တည်ရှိပါသေးတယ်။ လေဆိပ်အော်ပရေတာ Changi Airport Group (CAG) ဟာ T2 မှာ ဟိုတယ်အသစ်ကို အကောင်အထည်ဖော်ဖို့ သြဂုတ်လက တင်ဒါခေါ်ယူခဲ့ပြီး ၂ဝ၂၄ ခုနှစ် ဧပြီလမှာ စာချုပ်ချုပ်ဆိုဖို့ စီစဉ်ထားပါတယ်။    

တင်ဒါစာရွက်စာတမ်းတွေအရ CAG က အသစ်ဆောက်လုပ်မယ့် ဟိုတယ်ဟာ နိုင်ငံ ခရီးသွားလုပ်ငန်း ဖွံ့ဖြိုး တိုးတက်စေဖို့နဲ့  နိုင်ငံခြားသားခရီးသွားဝင်ရောက်မှု သန်း ၅ဝ ခန့် ထပ်တိုးဖို့ ရည်ရွယ်တယ်လို့ သိရပါတယ်။ အသေးစိတ်အချက်အလက်တွေကိုတော့ မသိရသေးပါဘူး။ အဆိုပါဟိုတယ်ကို ကြယ်သုံးပွင့်မှ လေးပွင့်အဆင့်ရှိ ဟိုတယ်စံချိန်စံညွှန်းတွေအတိုင်း ထားရှိမှာဖြစ်ပြီး ချန်ဂီလေဆိပ်ရဲ့ကမ္ဘာ့အဆင့်မီပုံရိပ်ကို ပံ့ပိုးပေးနိုင်မယ်လို့ ယုံကြည်ထားပါတယ်။