ယွန်း (NSS)  - စက်တင်ဘာ ၁၂

နေပြည်တော်၌ အကောင်အထည်ဖော်မည့် ဝါးအထူးစံပြဇုန် ဖြစ်ပေါ်လာပါက ဝါးလက်မှုပစ္စည်းများကို နိုင်ငံတကာဈေးကွက် ထိုးဖောက်နိုင်သည်အထိ ကြိုးပမ်းသွားမည်ဖြစ်ကြောင်း ဝါးစိုက်ပျိုးထုတ်လုပ်သည့်လုပ်ငန်းရှင် ဦးကျော်ဝင်းထံ NSS က ဆက်သွယ်မေးမြန်းထားချက်အရ သိရသည်။

လက်ရှိတွင် ဝါးနှင့်ပတ်သက်သည့် လက်မှုပစ္စည်းများ ထုတ်လုပ်နိုင်ရေးအတွက် ပြည်ပနိုင်ငံများအပါအဝင် ပြည်တွင်းမှ တောင်းဆိုမှုများရှိနေ သော် လည်း ဈေးကွက်နှင့် နေ့စားခရရှိမှုမကိုက်ညီခြင်းကြောင့် ထုတ်လုပ်သူအရေအတွက်မှာ အနည်းငယ်သာရှိကြောင်း သိရသည်။

“လက်မှုပစ္စည်းလုပ်တဲ့လူလည်းရှိတယ်။ စျေးကွက်လည်းရှိတယ်။ ပြည်ပကရော၊ ပြည်တွင်းကပါ တောင်းဆိုမှုတွေရှိတယ်။ ဒါပေမဲ့ လုပ်တဲ့သူက နည်းနေတာ။ အသေးစားစက်မှုလက်မှုအိမ်တွင်းမှုဦးစီးဌာနဆိုတာ ရှိတယ်လေ။ အဲဒီက သင်တန်းပေးပြီး ဝါးနဲ့လက်မှုပစ္စည်းလေးတွေ လုပ်ကြတယ်။ ဝါးလက်မှုပစ္စည်းက အနုစိပ်တယ်။ ဈေးကွက်နဲ့ နေ့စားခနဲ့က အရမ်းမကိုက်ဘူး။ တချို့နိုင်ငံတွေမှာက လက်မှုပစ္စည်းကို သူ့ရဲ့တန်ရာတန်ကြေးရကြတယ်။ တချို့ကျတော့လည်း လက်ရာကောင်းတော့ ဈေးကောင်းရပေမယ့် တချို့ကကျတော့ လက်ရာကတန်းမဝင်သေးတော့ ရတာနည်းတော့ ဈေး ကွက်လိုအပ်ချက်ကများပြီး လုပ်တဲ့သူကနည်းနေတာပေါ့”ဟု ဦးကျော်ဝင်းက ဆိုသည်။

ထို့ကြောင့် အဆိုပါလက်မှုပစ္စည်းများ တိုးချဲ့ထုတ်လုပ်နိုင်ရေးအတွက် နေပြည်တော်၌ အကောင်အထည်ဖော်မည့် ဝါးအထူးစံပြဇုန်ကို အောင်မြင်ရေးကြိုးပမ်းရန်လိုပြီး အဆိုပါဝါးအထူးဇုန် ဖြစ်ပေါ်လာပါက လက်မှုပစ္စည်းများကို နိုင်ငံတကာဈေးကွက် ထိုး‌ဖောက်နိုင်သည်အထိ ဆောင်ရွက်မည်ဖြစ်ကြောင်း သိရသည်။

“တိုးချဲ့ဖို့ကတော့ လုပ်သွားမှာပါ။ နေပြည်တော်မှာ ဝါးနဲ့ပတ်သက်တဲ့ ဇုန်တစ်ခုဖြစ်အောင် ကြိုးစားနေတာရှိတယ်။ အောင်မြင်သွားမယ်ဆိုရင် အဲဒီကနေပြီးတော့ မျိုးဆက်သစ်တွေမွေးတာတို့၊ ဈေးကွက်ရှာတာတို့ လုပ်ရမှာပေါ့။ ဝါးဇုန်တစ်ခုလောက်ပေါ်မှ ပိုအဆင်ပြေနိုင်မှာပေါ့။ သူ့နည်းသူ့ဟန်နဲ့တော့ ရပ်တည်နေကြတာပေါ့။ တကယ့်နိုင်ငံတကာဈေးကွက်ကို သွားချင်ရင်တော့ ဝါးဇုန်မရှိရင်တော့ မလွယ်ဘူးလေ။ နေပြည်တော်က ဝါးဇုန်ဖြစ်မြောက်လာရင်တော့ နိုင်ငံတကာဈေးကွက်ကို ထိုးဖောက်နိုင်တဲ့အထိ လုပ်သွားမှာပါ” ဟု ၎င်းက ဆက်လက်ပြောသည်။

လက်ရှိတွင် ဝါးလက်မှုပစ္စည်းများကို ပြည်ပနိုင်ငံများကို တစ်နိုင်တစ်ပိုင်တင်ပို့လျက်ရှိပြီး ဥရောပနိုင်ငံများကို အဓိကတင်ပို့နေကြောင်း သိရသည်။

ဝါးအထူးစံပြဇုန်အတွင်း မျှစ်နှင့်ပတ်သက်သော ထုတ်ကုန်များ ထုတ်လုပ်ရန်အတွက် နည်းပညာများ ဖြန့်ဝေခြင်း၊ မျိုးများဖြန့်ချိခြင်း၊ ဝါးလက်မှု စင်တာများပါဝင်မည်ဖြစ်ကာ လက်ရှိတွင် တာဝန်ရှိသူများထံ လျှောက်ထားတင်ပြထားဆဲ အနေအထားဖြစ်ကြောင်း သိရသည်။