ကျော်(NSS) - ဒီဇင်ဘာ ၂၀

စစ်ကိုင်းတိုင်း၊ စစ်ကိုင်းတောင်ရိုးပေါ်၌ဖွင့်လှစ်ထားသည့် အပြည်ပြည်ဆိုင်ရာဗုဒ္ဓဘာသာပညာရေးစင်တာ (IBEC)၌ ပညာသင်ကြားရန် စာရင်းပေးသွင်းတက်ရောက်နေသည့် စစ်ဘေးရှောင်ဒေသများမှ ကျောင်း သား၊ ကျောင်းသူ(၆၀)ဦးကျော်ရှိနေကြောင်း IBEC ၏ ရုံးအဖွဲ့မှူးထံမှ သိရသည်။

စစ်ဘေးရှောင်ဒေသမှ ကလေးငယ်များပညာဆက်လက်သင်ကြားနိုင်စေရန်၊ ကျောင်းနေအရွယ်ကလေးများအားလုံး ခွဲခြားမှုမရှိဘဲ လွတ်လပ်ငြိမ်းချမ်းစွာ ပညာသင်ယူနိုင်ရန်ရည်ရွယ်၍ "လိုသမျှပေးပညာ ရေး" အစီအစဥ်ကို ဆရာတော်ကြီး၏ တိုက်ရိုက်တာဝန်ပေးချက်အရ IBEC ၏ဌာနမှူးများဦးဆောင်သည့် ပညာရေးဘုတ်အဖွဲ့မှ စတင်အကောင်အထည်ဖော်ဆောင်ရွက်ခဲ့ကြကြောင်း သိရသည်။

"စစ်ဘေးရှောင်နေရင်း ပညာရေးတစ်ပိုင်းတစ်စဖြစ်နေတဲ့ စစ်ဘေးရှောင်ဒေသက ကလေးတွေဆက်လက်ပညာသင်ယူနိုင်ဖို့အတွက် ဆရာတော်ကြီးက အထူးအစီအစဥ်အနေနဲ့ဆောင်ရွက်ပေးတော်မူတာပါ။ ကျွန်တော်တို့ကိုလည်း တတ်နိုင်သမျှနည်းလမ်းနဲ့ကူညီပေးပါလို့မိန့်ကြားထားတယ်"ဟု ရုံးအဖွဲ့မှူးဦးကိုကိုက NSS ကိုပြောသည်။

ကောလင်းဒေသနှင့်ထီးချိုင့်ဒေသတို့အပါအဝင် စစ်ဘေးရှောင်ဒေသများမှ ပညာရေးတစ်ပိုင်းတစ်စဖြစ်နေသည့် ကလေးငယ်များအား IBEC ၌ ပညာဆက်လက်သင် ကြားနိုင်ရေးအတွက် ကျောင်းအပ်လက်ခံခြင်းနှင့်စာရင်းပေးသွင်းခြင်းကို ပြီးခဲ့သည့် ဒီဇင်ဘာလ ၁၂ ရက်၊ နံနက် ၉ နာရီမှစတင်၍ ခရိုင်ပညာရေးမှူးထောက်ခံချက်ဖြင့် ၂၀၂၃-၂၄ ပညာသင်နှစ်၏ ဒုတိယနှစ်ဝက်ပညာသင်ကာလအား ပြုလုပ်ခဲ့ကြောင်း သိရသည်။

"ဒီအစီအစဥ်ကိုကြော်ငြာပြီးတဲ့အချိန်ကစပြီး ဖုန်းနဲ့ဆက်သွယ်မေးမြန်းတဲ့လူက ရာကျော်ရှိနေပါပြီ။ သို့သော်သူတို့က ကိုယ်တိုင်လာရောက်အပ်နှံနိုင်ခြင်းမရှိသေးပါဘူး။ အကြောင်းရင်းက သူတို့စစ်ဘေးရှောင်နေတဲ့နေရာကနေ မထွက်လာနိုင်ကြသေးတဲ့အတွက်လို့ပြောကြတယ်။ ကျောင်းမှာကိုယ်တိုင်လာပြီးအပ်နှံထားတဲ့ ကျောင်းသား၊ ကျောင်းသူအရေအတွက်က လက်ရှိအချိန်အထိဆိုရင် (၆၀)ဦးကျော်လောက်ရှိပါပြီ။ သူတို့ကအခုကျောင်းတက်နေကြပါပြီ"ဟု ရုံးအဖွဲ့မှူးဦးကိုကိုကပြောသည်။

IBEC ၌ ၂၀၂၃-၂၄ ပညာသင်နှစ်၏ ဒုတိယနှစ်ဝက်ပညာ သင်ကာလတက်ရောက်နေသည့် စစ်ဘေးရှောင်ဒေသများမှ ကျောင်းသား၊ ကျောင်းသူ (၆၀)ဦးကျော်ရှိပြီးပညာသင်နှစ်စတင်ချိန်မှစ၍ တက်ရောက်ပညာသင်ကြားနေသည့် စစ်ဘေးရှောင်ဒေသများမှ ကျောင်းသား၊ကျောင်းသူအရေအတွက်သည်လည်း (၁၀၀၀)ဦးဝန်း ကျင်ခန့်ရှိနေကြောင်း ရုံးအဖွဲ့မှူးဦးကိုကို၏ပြောကြားချက်အရ သိရသည်။

ဒုတိယနှစ်ဝက်ပညာသင်ကာလအတွက် ကျောင်းတက်ရောက်နေပြီဖြစ်သည့် စစ်ဘေးရှောင်ဒေသများမှလာရောက်ရသည့် ကျောင်းသား၊ ကျောင်းသူများ၏ နေထိုင်စားသောက်မှုအား IBEC မှတာဝန်ယူပေးနိုင်ခြင်းမရှိသေးသည့်အတွက် ကျောင်းသား၊ ကျောင်းသူများသည်ကျေးရွာအတွင်းရှိ ဘုန်းတော်ကြီးကျောင်းများ၊ သီလ ရှင်ကျောင်းများ၊ အဆောင်များနှင့်ဆွေမျိုးမိတ်ဆွေများထံတွင်နေထိုင်ကာ ပညာဆက်လက်သင်ကြားနေကြရကြောင်း သိရသည်။

"အနာဂတ်မြန်မာနိုင်ငံကြီးတည်ဆောက်ရေးအတွက် ပညာရေးဟာ အင်မတန်အရေးကြီးတယ်။ တိုင်းပြည်ကို ပညာနဲ့တည်ဆောက်နိုင်လေလေ တိုင်းပြည်တိုးတက်ကြီးပွားလေပဲ။ တိုင်းပြည်မှာ ပညာတတ်/ပညာရှင်တွေပေါများလေလေ တိုင်းပြည်သာယာဝပြောလေပဲ"ဟု IBEC ဆရာတော်က မိန့်ကြားထားသည်။

ထို့ပြင် IBEC ဆရာတော်မှ တိုင်းပြည်ကိုချစ်၍ နောင်မျိုး ဆက်သစ်များကို မွေးထုတ်ပေးနေခြင်းဖြစ်ပြီး ပညာရည်နှလုံးရည်ပြည့်ဝသော မျိုးဆက်သစ်လူငယ်များကို မွေးထုတ်ပေးနေခြင်းသည်လည်း တိုင်းပြည်ကိုချစ်ခြင်းကြောင့်ဖြစ်ကာ ပညာရေးကိုအနှောင့်အယှက်ပေးသူ၊ ပညာသင်ကြားခြင်းကိုမလိုလားသူများသည် တိုင်းပြည်ကိုဖျက်ဆီးနေခြင်းပင်ဖြစ်သည်ဟုလည်း ဆရာတော်ကမိန့်ကြားထားတော်မူသည်။