ဂျန်ဇက် (NSS) - ဒီဇင်ဘာ ၁၉ 

အမေရိကန်နိုင်ငံ ဆန်ဖရန်စစ်စကိုမြို့ အစိုးရရှေ့နေတွေဟာ ဂါဇာစစ်ပွဲ အပစ်ခတ်ရပ်စဲရေးနဲ့ပတ်သက်ပြီး ဆန္ဒပြခဲ့သူ ၈ဝ ဦးကို စွဲချက်တင်ခဲ့ကြောင်း သိရပါတယ်။ 

ဆန်ဖရန်စစ်စကိုမြို့ တံတားကို ပိတ်ဆို့ပြီး ဆန္ဒပြခဲ့ခြင်းကြောင့် လူပေါင်း ၈ဝ ကျော်ကို စွဲချက်တင်ခဲ့ခြင်းဖြစ်ကြောင်း သိရပါတယ်။ ဆန်ဖရန်စစ်စကိုမြို့ဟာ ပြီးခဲ့တဲ့လက အမေရိကန်သမ္မတ ဂျိုးဘိုင်ဒန် အပါအဝင် ကမ္ဘာ့ခေါင်းဆောင်တွေတက်ရောက်တဲ့ အာရှ-ပစိဖိတ် စီးပွားရေးပူးပေါင်းဆောင်ရွက်မှု ထိပ်သီးအစည်းအဝေးကျင်းပခဲ့တဲ့မြို့ဖြစ်ပါတယ်။ 

ဆန်ဖရန်စစ်စကိုမြို့ရှေ့နေတွေက အဲဒီသူတွေဟာ လမ်းတွေကို ပိတ်ဆို့တားဆီးခြင်း၊ ဥပဒေနဲ့မညီတဲ့ ဆန္ဒပြပွဲများပြုလုပ်ခြင်း၊ ငြိမ်းချမ်းစွာဆန္ဒပြဖို့တောင်းဆိုချက်တွေကို ငြင်းဆန်ခြင်း စတဲ့အချက်တွေကို ကျူးလွန်ခဲ့ကြောင်း ဆိုပါတယ်။

အစ္စရေးနဲ့ ဟားမက်စ်လက်နက်ကိုင်အဖွဲ့ကြားစစ်ပွဲဖြစ်လာခဲ့ပြီးနောက်ပိုင်း ဆန်ဖရန်စစ်စကိုမြို့မှာ ပါလက်စတိုင်းလိုလားတဲ့ပြည်သူတွေဟာ “ဂါဇာစစ်ပွဲအပစ်ခတ်ရပ်စဲစေလိုကြောင်း၊ ပါလက်စတိုင်း ပြည်သူတွေ လွတ်မြောက်ပါစေ” စတဲ့ ကြွေးကြော်သံတွေကိုကြွေးကြော်ပြီး လမ်းတွေကို ပိတ်ဆို့ကာ ဆန္ဒပြခဲ့ကြောင်း သိရပါတယ်။

ပါလက်စတိုင်းပြည်သူများအရေး လှုပ်ရှားသူတစ်ဦးဖြစ်တဲ့ Aisha Nizar  စွဲချက်တင်ခံရသူတွေထဲမှာ ပါဝင်ခဲ့ပေမယ့် ဆန္ဒပြမှုတွေကို ရပ်တန့်သွားမှာမဟုတ်ကြောင်း၊ ဂါဇာဒေသ  အပစ်ခတ်ရပ်စဲရေးကို ယခင်ထက် ပိုမိုတောင်းဆိုသွားမှာဖြစ်ကြောင်း ပြောပါတယ်။

အစ္စရေးနဲ့ ဟားမက်စ်လက်နက်ကိုင်အဖွဲ့ကြား အောက်တိုဘာ ၇ ရက်မှ စစ်ပွဲစတင်ခဲ့ပြီးနောက် အစ္စရေးရဲ့တိုက်ခိုက်မှုတွေကိုရပ်တန့်ဖို့ အမေရိကန်နိုင်ငံ အပါအဝင် ကမ္ဘာတဝန်းရှိ မြို့ကြီးတွေမှာ အပစ်ခတ်ရပ်စဲရေးတောင်းဆိုဆန္ဒပြခဲ့ပေမယ့် တိုက်ခိုက်မှုတွေ ဆက်လက်ဖြစ်နေဆဲဖြစ်ကြောင်း သိရပါတယ်။

ဟားမက်စ်လက်နက်ကိုင်အဖွဲ့ရဲ့တိုက်ခိုက်မှုကြောင့် အစ္စရေးနိုင်ငံသား ၁၄ဝဝ နီးပါး သေဆုံးခဲ့ပြီးနောက် အစ္စရေးဟာ ဟားမက်စ်လက်နက်ကိုင်အဖွဲ့ကို ချေမှုန်းနိုင်ဖို့ ဂါဇာဒေသကို လက်တုံ့ပြန်တိုက်ခိုက်ခဲ့ရာ ပါလက်စတိုင်းလူမျိုး အနည်းဆုံး ၁၉ဝဝဝ နီးပါး သေဆုံးထားကြောင်း သိရပါတယ်။