မျိုးကြီး (NSS) - ဒီဇင်ဘာ ၁၉

ရန်ကုန်မြို့၌ AA လက်နက်ကိုင်အဖွဲ့မှ ပါဝင်ပတ်သက်နေသည့် မူးယစ်မှောင်ခိုဂိုဏ်းကို ဖော်ထုတ်ဖမ်းဆီးနိုင်ခဲ့ပြီး ငွေကျပ်ဘီလျံ (၅၀)ကျော်တန်ဖိုးရှိ မူးယစ်ဆေးများကို စံချိန်တင်သိမ်းဆည်းရရှိခဲ့ကြောင်း သိရသည်။

ယင်းကဲ့သို့ ဖော်ထုတ်ဖမ်းဆီးနိုင်ခဲ့သော မူးယစ်မှောင်ခိုဂိုဏ်း၏ အခြေအနေနှင့်ပတ်သက်၍ မူးယစ်ဆေးဝါးတားဆီးနှိပ်နင်းရေးရဲတပ်ဖွဲ့က ယမန်နေ့(ဒီဇင်ဘာလ ၁၈ ရက်)ညပိုင်းတွင် အသိ ပေးထုတ်ပြန်ခဲ့သည်။

လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့သည် ဒီဇင်ဘာ လ ၃ ရက်၊ မွန်းလွဲ ၁ နာရီအချိန်တွင် ရှမ်းပြည်နယ် (တောင်ပိုင်း)၊ ရွာငံမြို့နယ်၊ မြို့ကြီးကျေးရွာအနီးတွင် ရန်နိုင်စိုး၊ မအိအိခင် နှင့် မမေဦးကိုကိုတို့ မောင်းနှင်လိုက်ပါလာသော ALPHARD ကားကို သတင်းအရ ရှာဖွေစစ်ဆေးခဲ့ကြောင်း ရဲတပ်ဖွဲ့က ဆို သည်။

ထိုသို့ ရှာဖွေစစ်ဆေးရာတွင် ကားပေါ်မှ အိုက်စ်(မက်သ်အဖက်တမင်း) (၆၅)ကီလိုကို သိမ်းဆည်းရရှိခဲ့ကြောင်း သိရသည်။

ထို့နောက် ၎င်းတို့အား ဆက်လက်စစ်ဆေးဖော်ထုတ်ချက်အရ ဒီဇင်ဘာလ ၄ ရက်၊ နေ့လည် ၁၂ နာရီအချိန်တွင် ရန်ကုန်တိုင်း၊ ရွှေပြည်သာမြို့နယ်၊ (၁)ရပ်ကွက်၊ ပုလဲလမ်း၌ အထက်ပါအိုက်စ်မူးယစ်ဆေးဝါးများကို သယ်ဆောင်ရာတွင် ပူးပေါင်းပါဝင်သော AA အဖွဲ့မှ ဒုဗိုလ်အဆင့်ရှိသူများဖြစ်သည့် နေလင်းထွန်းနှင့် စိုးထွန်းတို့ကို ALPHARD ကားနှင့်အတူ ထပ်မံဖမ်းဆီးရရှိခဲ့ကြောင်း သိရသည်။

ထို့ပြင် ရွှေပြည်သာမြို့နယ် (၁)ရပ်ကွက်၊ ကနောင်မင်းသားကြီးလမ်းရှိ ဂိုဒေါင်တစ်ခု၌ AA အဖွဲ့မှ ဗိုလ်အဆင့်ရှိ ထွန်းလင်းကို အိုက်စ် (၈၆၅)ကီလိုနှင့်အတူ ဆက်လက်ဖမ်းဆီးနိုင်ခဲ့ကြောင်း ရဲတပ်ဖွဲ့က ထုတ်ပြန်ထားသည်။

ဆက်လက်ပြီး ဒီဇင်ဘာလ ၄ ရက်၊ ည ၇ နာရီအချိန်တွင်လည်း အထက်ပါမူးယစ်ဆေးဝါးများနှင့်ပတ်သက်နေသူ ဇော်မင်းထွေးနှင့် မသင်းမြတ်ဆွေတို့ကိုလည်း အောင်မင်္ဂလာအဝေးပြေးကားဝင်း၌ အသီးသီးဖမ်းဆီးရရှိခဲ့ကြောင်း သိရသည်။

ယင်းကဲ့သို့ ဖမ်းဆီးရမိခဲ့သူများ၏ ဖော်ထုတ်ချက်အရ ဒီဇင်ဘာ လ ၆ ရက်တွင် အိုက်စ်များကို ရန်ကုန်မြို့၌ လက်ခံ၍ ပြည်ပသို့ ရေကြောင်းမှ သယ်ဆောင်ရာတွင် စီမံခန့်ခွဲနေသူဖြစ်သော ဦးလှဝင်းကို ပဲခူးတိုင်း၊ တောင်ငူမြို့၊ အမှတ်(၁၁)ရပ်ကွက်ရှိ ဟိုတယ် ၌ ဆက်လက်ဖမ်းဆီးနိုင်ခဲ့ကြောင်း သိရသည်။

ထို့နောက် ဒီဇင်ဘာလ ၇ ရက်တွင် ရန်ကုန်တိုင်း၊ တောင်ဥက္ကလာပမြို့နယ်၊ (၉)ရပ်ကွက်၊ မေတ္တာလမ်း၌ ဦးလှဝင်း ပိုင်ဆိုင် သော CANTER BOX ကားပေါ်မှ အိုက်စ် (၁၁၄၀)ကီလို၊ ထိန်း ချုပ်ဓာတုပစ္စည်းကဖင်း (၈၀၀)ကီလိုတို့ကိုလည်း ထပ်မံသိမ်းနိုင်ခဲ့သည်ဟု ရဲတပ်ဖွဲ့က ထုတ်ပြန်ထားသည်။

ဆက်လက်ပြီး ဒီဇင်ဘာလ ၉ ရက်တွင် ကမာရွတ်မြို့နယ်၊ ဆင်မလိုက်သင်္ဘောကျင်း၌ စိုးပိုင်၊ ဌေးလင်းဇော်၊ ကျော်ဌေးစိုး နှင့် AA အဖွဲ့မှ တပ်ကြပ်ကြီးအဆင့်ရှိ ဦးကျော်ဟန်၊ တပ်သားအဆင့်ရှိ ကျော်လင်းဆန်း နှင့် ဦးထွန်းနုတို့ (၆)ဦးတို့ကိုလည်း ပြည်ပသို့ မူးယစ်ဆေးဝါးများသယ်ဆောင်ရာတွင် အသုံးပြုသော တနင်္သာရီ (၁)အမည်ရှိ သံခွံကုန်တင်သင်္ဘောတစ်စီးနှင့်အတူ ထပ်မံဖော် ထုတ်ဖမ်းဆီးနိုင်ခဲ့ကြောင်း သိရသည်။

ယခုကဲ့သို့ ဖော်ထုတ်ဖမ်းဆီးနိုင်ခဲ့သော အိုက်စ်စုစုပေါင်း ၂ ဒသမ ၀၇ တန်သည် မူးယစ်မှောင်ခိုဂိုဏ်းဖွဲ့၍ ရှမ်းပြည်နယ်မှ ရန်ကုန်သို့ သယ်ဆောင်ကာ ပင်လယ်ရေကြောင်းဖြင့် ပြည်ပသို့ သယ် ဆောင်ရောင်းဝယ်ခြင်းဖြစ်ကြောင်း ရဲတပ်ဖွဲ့က ထုတ်ဖော်အသိ ပေးထားသည်။

ထိုသို့ သိမ်းဆည်းရမိခဲ့သော မူးယစ်ဆေးဝါးများနှင့် ထိန်းချုပ်ဓာတုပစ္စည်းများကို AA အဖွဲ့မှ ဗိုလ်မှူးကြီးအဆင့်ရှိသူ ကျော် မြတ်ဦး(ခ)ဝေသာထွန်း၏ ဦးစီးစီမံခန့်ခွဲမှုဖြင့် သယ်ဆောင်ခြင်းဖြစ်ကြောင်း ရဲတပ်ဖွဲ့က ဆိုသည်။

လက်ရှိတွင် အထက်ပါမူးယစ်မှောင်ခိုဂိုဏ်းအဖွဲ့ကို ဥပဒေအရ အရေးယူထားပြီး ကွင်းဆက်ကျူးလွန်နေသူများကို ဆက်လက်စစ်ဆေးဖော်ထုတ်နေကြောင်း သိရသည်။

ထို့ပြင် ၎င်းတို့ မူးယစ်ဆေးဝါးသယ်ဆောင်ရောင်းဝယ်ရာတွင် ရရှိခဲ့သော ငွေကြေးအကျိုးအမြတ်များ၊ ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းနိုင်ရေးအတွက် ငွေကြေးခဝါချမှုတိုက်ဖျက်ရေးဥပဒေဖြင့် ထပ်မံအရေးယူရန် ပြင်ဆင်နေလျက်ရှိကြောင်း သိရသည်။

ပြီးခဲ့သော ရက်ပိုင်းအတွင်းတွင်လည်း ငွေကျပ် (၁၀)ဘီလျံကျော် တန်ဖိုးရှိ မူးယစ်ဆေးဝါးများကို သယ်ဆောင်ရောင်းဝယ်ရန်ပြင် ဆင်နေသည့် မူးယစ်မှောင်ခိုဂိုဏ်းတစ်ခုကိုလည်း ရဲတပ်ဖွဲ့က ဖော်ထုတ်ဖမ်းဆီးထားသည်။