ဂျန်ဇက် (NSS) - ဒီဇင်ဘာ ၁၈ 

ဗြိတိန်အစိုးရနဲ့ ဂျာမနီအစိုးရတို့ဟာ ဂါဇာဒေသစစ်ပွဲ အပစ်ခတ်ရပ်စဲရေးအတွက် တိုက်တွန်းတောင်းဆိုလိုက်ကြောင်း သိရပါတယ်။

ဗြိတိန်နိုင်ငံခြားရေးဝန်ကြီး ဒေးဗစ်ကင်မရွန်း နဲ့ ဂျာမနီနိုင်ငံခြားရေးဝန်ကြီး ဘာဘော့စ့်တို့ဟာ ဂါဇာဒေသစစ်ပွဲ အတွင်းမှာ အရပ်သားတွေ သေဆုံးမှုအရေအတွက်က အလွန်များနေတယ်လို့ ဆိုပါတယ်။ အဆိုပါ  ဂျာမနီ နိုင်ငံခြား ရေးဝန်ကြီး နဲ့ ဗြိတိန်နိုင်ငံခြားရေးဝန်ကြီးတို့ဟာ ဗြိတိန်အခြေစိုက် Sunday Times သတင်းစာမှာ ပူးတွဲဖော်ပြတဲ့ ဆောင်းပါးမှာ အခုလိုမျိုးရေးသားဖော်ပြခဲ့တာဖြစ်ကြောင်း သိရပါတယ်။

၎င်းတို့နှစ်ဦး ရေးသားတဲ့ဆောင်းပါးထဲမှာ "စစ်ပွဲအတွင်းမှာ အရပ်သားတွေ သေဆုံးတာများနေတယ်။ ဟားမက်စ် အဖွဲ့ကို ထိုးစစ်ဆင်နေတဲ့ အစ္စရေးကို အပြောင်းလဲဖြစ်အောင်လုပ်ဆောင်ရမယ်။ ရေရှည်တည်တံ့တဲ့ အပစ်ခတ် ရပ်စဲရေးရယူဖို့လည်း လိုအပ်တယ်" လို့ ထည့်သွင်းတောင်းဆိုရေးသားခဲ့ပါတယ်။ 

ဒါ့အပြင် ဂါဇာစစ်ပွဲနဲ့ပတ်သက်ပြီး ရေရှည်တည်တံ့တဲ့ အပစ်ခတ်ရပ်စဲရေးကို အမြန်ဆုံးရရယူမှာဖြစ်ပြီး အပစ်ခတ် ရပ်စဲရေးရယူနိုင်ဖို့ဖြစ်နိုင်ဖွယ်ရှိတဲ့အရာအားလုံးကို လုပ်ဆောင်သွားမယ်လို့လည်း ဂျာမနီ နဲ့ ဗြိတိန်နိုင်ငံခြားရေးဝန်ကြီး က ပြောပါတယ်။ 

ဗြိတိန်နိုင်ငံဟာ ပြီးခဲ့တဲ့ရက်ပိုင်းက ကျင်းပခဲ့တဲ့ ကုလသမဂ္ဂအထွေထွေညီလာခံမှာ ဂါဇာစစ်ပွဲ အပစ်ခတ်ရပ်စဲရေး တောင်းဆိုခဲ့ပြီး နိုင်ငံအများစု မဲပေးထောက်ခံခဲ့ပြီး ဗြိတိန်နိုင်ငံက ကြားနေမဲသာပေးခဲ့ကြောင်း သိရပါတယ်။ အစ္စရေးဟာ ဟားမက်စ်လက်နက်ကိုင်အဖွဲ့ထိန်းချုပ်ထားတဲ့ဂါဇာဒေသကို တိုက်ခိုက်မှုတွေ စတင်ခဲ့ပြီးနောက်ပိုင်း ကတည်းက မဟာမိတ်နိုင်ငံတွေရဲ့ဖိအားတွေ နဲ့ ရင်ဆိုင်လာရကြောင်း သိရပါတယ်။

အစ္စရေး နဲ့ ဟားမက်စ်လက်နက်ကိုင်အဖွဲ့ကြား စစ်ပွဲစတင်ခဲ့ပြီးနောက်ပိုင်းကတည်းက ဂါဇာဒေသမှာ ပါလက်စတိုင်းလူမျိုးအနည်းဆုံး ၁၈ဝဝဝ ကျော် သေဆုံးထားကြောင်း ဆိုပါတယ်။ ဒါပေမယ့် အစ္စရေးအစိုးရက သေဆုံးခဲ့တဲ့ ပါလက်စတိုင်းတွေထဲမှာ ဟားမက်စ်အဖွဲ့ဝင်တွေလည်း ပါဝင်နေကြောင်း ပြောပါတယ်။