ဂျန်ဇက် (NSS) - ဒီဇင်ဘာ ၁၇ 

ရုရှားသမ္မတပူတင်ဟာ လာမယ့်သမ္မတရွေးကောက်ပွဲမှာ ပါတီကိုယ်စားပြု ယှဉ်ပြိုင်မှာမဟုတ်ဘဲ တစ်သီးပုဂ္ဂလကိုယ်စားလှယ်လောင်းအဖြစ် ပါဝင်ယှဉ်ပြိုင်မယ်လို့ သိရပါတယ်။

ရုရှားသမ္မတပူတင်ဟာ ရုရှားနိုင်ငံအစိုးရအဖွဲ့မှာ နှစ်ပေါင်း ၂ဝ ကျော်ကြာ သမ္မတ နဲ့ ဝန်ကြီးချုပ်တာဝန်များကို ထမ်းဆောင်ခဲ့သူဖြစ်ပြီး လာမယ့် နှစ် မတ်လမှာ ကျင်းပမယ့် သမ္မတရွေးကောက်ပွဲကို ထပ်မံယှဉ်ပြိုင်ဖို့ စီစဉ်နေကာ အနိုင်ရဖို့မျှော်လင့်နေကြောင်း သိရပါတယ်။

ပူတင်ဟာ လာမယ့်သမ္မတရွေးကောက်ပွဲမှာ ထပ်မံအနိုင်ရခဲ့ပါက သမ္မတအဖြစ် နောက်ထပ် ၆ နှစ်သက်တမ်း ထပ်မံ တာဝန်ယူခွင့်ရမှာဖြစ်ကြောင်း သိရပါတယ်။ အာဏာရပါတီဖြစ်တဲ့  United Russia (UR) ပါတီရဲ့ အကြီးတန်း တာဝန်ရှိသူတစ်ဦးက ပူတင်ဟာ ပါတီကိုယ်စားပြုပြီး ပါဝင်ယှဉ်ပြိုင်တော့မှာ မဟုတ်ကြောင်း ပြောပါတယ်။

အသက် ၇၁ နှစ်အရွယ်ရှိ ပူတင်ဟာ လာမယ့်ရွေးကောက်ပွဲမှာ အနိုင်ရဖို့ အလားလာများနေကြောင်း ပူတင်ကို အားပေးထောက်ခံသူတွေက ပြောပါတယ်။ ရုရှားသမ္မတပူတင်ဟာ ဆိုဗီယက်ပြည်ထောင်စုပြိုကွဲပြီးနောက် စီးပွားရေး ထိခိုက်ပျက်စီးမှုများစွာတွေ့ကြုံခဲ့ရတဲ့ ရုရှားနိုင်ငံကို ကမ္ဘာ့အလယ်မှာ သြဇာလွှမ်းမိုးမှုရှိတဲ့နိုင်ငံ တစ်နိုင်ငံဖြစ်လာစေဖို့ စစ်ရေးနဲ့ စီးပွားရေးကောင်းမွန်စေအာင် အဓိကကြိုးပမ်းခဲ့သူဖြစ်ရာ လူကြိုက်များနေကြောင်း သိရပါတယ်။

ရုရှားသမ္မတပူတင်ဟာ လာမယ့်ရွေးကောက်ပွဲမှာ အနိုင်ရဖို့ စည်းကမ်းများ ကြိုတင်ထုတ်ပြန်ပြီး ကန့်သတ်မှုများ လုပ်ဆောင်နေကြောင်း ဝေဖန်မှုများလည်း ရှိနေပါတယ်။ လာမယ့်နှစ် မတ်လအတွင်း ကျင်းပမယ့် ရုရှားသမ္မတရွေးကောက်ပွဲကို သုံးရက်ဆက်တိုက် ကျင်းပသွားမှာဖြစ်ပြီး လွတ်လပ်ပွင့်လင်းမှု ပိုမိုဖြစ်စေအောင်လုပ်ဆောင်မယ်လို့ ရုရှားရွေးကောက်ပွဲကော်မရှင်က ပြောပါတယ်။