Pika (NSS) - ဒီဇင်ဘာ ၁၅ 

အီရန်နိုင်ငံ အရှေ့တောင်ပိုင်းရှိ ရဲစခန်းတစ်ခုတွင် ခွဲထွက်ရေးအဖွဲ့ဝင်များဟု သံသယရှိသူများ၏ သေနတ်ဖြင့် ပစ်ခတ်မှုများကြောင့် အနည်းဆုံးလူ(၁၁)ဦးသေဆုံးခဲ့ပြီး အခြားလူအများအပြား ထိခိုက်ဒဏ်ရာရရှိခဲ့ကြောင်း သိရသည်။

အဆိုပါတိုက်ခိုက်မှုသည် တီဟီရန်မြို့မှ ကီလိုမီတာ(၁၄ဝဝ)အကွာတွင်ရှိသော Rask မြို့တွင် ဒီဇင်ဘာလ(၁၅)ရက်  နံနက်(၂)နာရီအချိန်က ဖြစ်ပွားခဲ့ခြင်းဖြစ်ပြီး သေဆုံးသူများထဲတွင် အကြီးတန်းရဲအရာရှိများနှင့် စစ်သားများ ပါဝင်ကြောင်း သိရသည်။ 

ထို့အပြင် တိုက်ခိုက်မှုအတွင်း သေနတ်သမားအချို့လည်း သေဆုံးခဲ့ကြောင်း  Sistan နှင့် Baluchestan ပြည်နယ် ဒုအုပ်ချုပ်ရေးမှူး Ali Reza Marhemati က ပြောကြားခဲ့သည်။ ၎င်းက "Rask မြို့မှာရှိတဲ့ ရဲဌာနချုပ်ဟာ အကြမ်းဖက်တွေရဲ့တိုက်ခိုက်မှုကိုခံခဲ့ရပြီး အနည်းဆုံးလူ(၁၁)ဦး သေဆုံးကာ အခြားလူအများအပြား ထိခိုက်ဒဏ်ရာရရှိခဲ့ပါတယ်" ဟု ပြောခဲ့သည်။

အဆိုပါတိုက်ခိုက်မှုကို အစ္စလာမ်မစ်အဖွဲ့ Jaish al-Adl က လုပ်ဆောင်ခဲ့ခြင်းဖြစ်ကြောင်း နိုင်ငံပိုင်ရုပ်သံလိုင်းက ပြောကြားခဲ့သည်။ ထို့အပြင် Baloch လူမျိုးစုအတွက် ကောင်းမွန်သောနေထိုင်ခွင့်အခြေအနေများ နှင့် အခွင့်အရေး များကို ရှာဖွေနေသော Jaish al-Adl အဖွဲ့သည် ၂ဝ၁၉ ခုနှစ်က အီရန်လုံခြုံရေးတပ်ဖွဲ့ဝင်(၂၇)ဦး သေဆုံးစေခဲ့သည့် ဘတ်စ်ကားတစ်စီးပေါ်တွင် အသေခံဗုံးခွဲမှုအတွက် ၎င်းတို့တွင် တာဝန်ရှိကြောင်း အခိုင်အမာပြောဆိုခဲ့သည်။ 

အာဖဂန်နစ္စတန်နိုင်ငံ၊ ပါကစ္စတန်နိုင်ငံတို့နှင့် ထိစပ်နေသော ဆင်းရဲနွမ်းပါးသည့် Sistan-Baluchestan ပြည်နယ်တွင် ဆွန်နီမွတ်စလင်အများစုနေထိုင်ကြောင်းလည်း သိရသည်။ အဆိုပါဒေသသည် ပြီးခဲ့သည့်နှစ်တွင် ရဲတပ်ဖွဲ့များ၏ ရိုက်နှက်မှုကြောင့် အချုပ်ထဲတွင် သေဆုံးသွားခဲ့သော အသက်(၂၂)နှစ်အရွယ် မာရှာအေမီနီ၏ သေဆုံးမှုနှင့်ပတ်သက်ပြီး ဖြစ်ပွားခဲ့သောဆန္ဒပြပွဲများကို ပြင်းထန်စွာဖြိုခွင်းခဲ့သည့် နေရာတစ်ခုဖြစ်ကြောင်းလည်း သိရသည်။