မျိုးကြီး (NSS) - ဒီဇင်ဘာ ၁၃ 

နိုင်ငံအတွင်း ဖြစ်ပွားနေဆဲ ပဋိပက္ခများကြောင့်  မဖွင့်လှစ်နိုင်သော စာသင်ကျောင်းများရှိနေပြီး စာသင်ကျောင်းများကို Safe Zone အဖြစ် သတ်မှတ်ပေးရန် တောင်းဆိုမှုများရှိနေသည်။

၂၀၂၁ ခုနှစ် ဖေဖော်ဝါရီလမှစတင်၍  တပ်မတော်က နိုင်ငံတော်အာဏာရယူခဲ့ပြီးနောက်ပိုင်းတွင် နိုင်ငံအတွင်း၌ စာသင်ကျောင်းများ မီးရှို့ဖျက်ဆီးခံရခြင်း၊ မိုင်းထောင် ဖောက်ခွဲခံရခြင်းများရှိနေသည့်အပြင် ဆရာ၊ ဆရာမ ပညာရေးဝန်ထမ်းများသည်လည်း ခြိမ်းခြောက်သတ်ဖြတ်ခံရမှုများ ရှိနေသည်။

ထို့ပြင် နိုင်ငံအတွင်း၌ တပ်မတော်နှင့် တိုင်းရင်းသား လက်နက် ကိုင်အဖွဲ့၊ PDF အဖွဲ့များကြားတွင်လည်း တိုက်ပွဲများဖြစ်ပေါ်လျက်ရှိပြီး ယင်းတိုက်ပွဲများကြောင့် စာသင်ကျောင်းများ ပိတ်ထားရထားသည့် အခြေအနေ များ ဖြစ်ပေါ်လျက်ရှိနေသည်။

ယင်းကဲ့သို့ ပဋိပက္ခများကြောင့် နိုင်ငံတော်၏ ပညာရေးကဏ္ဍတွင် ထိခိုက်နစ်နာမှုများရှိနေသည့်အတွက် စာသင်ကျောင်းများကို Safe Zone အဖြစ် သတ်မှတ်ပေးရန် ပညာရေးအသိုင်းအဝိုင်းနှင့် ရဟန်းသံဃာများက တောင်းဆိုမှုများရှိနေသည်။

"လက်ရှိမှာ Safe Zone က အကျိုးသက်ရောက်မှုများမယ်။ ဘာလို့လဲဆိုတော့  ဒီနိုင်ငံက ပျက်စီးနေတယ်။  ပြန်ပြင်ဖို့ဆိုရင် ပညာတတ် အမြောက်အများလိုအပ်တယ်။ အဲဒီတော့ ကလေးငယ်တွေက အချိန်နဲ့ အသက်အရွယ်နဲ့ လိုက်ဖက်တဲ့ ပညာသင်ကြားမှုရမယ်။ နောက်ပြီး ပညာသင်ကြားတဲ့အခါမှာ ဘယ်သူရဲ့ အနှောက်အယှက်မှ မရှိတဲ့ အခါကျတော့ သူတို့တွေလည်း ပညာသင်ကြားလို့ ရတာပေါ့။ ဘယ်သူကမှ မနှောက်ယှက်ဘူး။ အသက်အန္တရာယ်လည်း မစိုးရိမ်ရဘူးဆိုတော့ လွတ်လွတ်လပ်လပ်စာကြိုးစားလို့ရတယ်ပေါ့။  အခုတော့ ဘယ်အချိန်များလာ ဗုံးကြဲ မလဲဆိုတဲ့စိတ်နဲ့ စာသင်နေရတာ" ဟု စစ်ကိုင်းတိုင်း အတွင်းရှိ ကျောင်းဆရာတစ်ဦးက ပြောသည်။

လက်ရှိ ပဋိပက္ခများအတွင်း၌ လက်နက်ကိုင် အဖွဲ့အစည်းများ သည် စာသင်ကျောင်းများအတွင်း ဝင်ရောက်နေထိုင်သော ဖြစ် စဉ်များရှိနေပြီး စာသင်ကျောင်းတစ်ဝိုက်၌ပင် ပစ်ခတ်တိုက်ခိုက်မှုများလည်း ရှိနေသည်။

ထို့ပြင် နိုင်ငံအတွင်းရှိ စာသင်ကျောင်းများကိုလည်း ပိတ်ထားရန် NUG လက်အောက်ခံ PDF အဖွဲ့အစည်းများက ခြိမ်းခြောက်မှုများ ရှိနေသည်။

လတ်တလောတွင် စစ်ကိုင်းတိုင်း၊ မကွေးတိုင်း၊ ပဲခူးတိုင်း နှင့် ချင်းပြည်နယ်အတွင်းရှိ ပဋိပက္ခဖြစ်ပွားရာ ဒေသများတွင် စာသင်ကျောင်းများ ပိတ်ထားရလျက်ရှိကြောင်း သိရသည်။

ထို့ကြောင့် နိုင်ငံတကာအပါအဝင် သက်ဆိုင်ရာ လက်နက်ကိုင်အဖွဲ့အစည်းများအနေဖြင့် နိုင်ငံအတွင်းရှိ စာသင်ကျောင်းများကို Safe Zone အဖြစ် သတ်မှတ်ပေးရန် ပညာရေးအသိုင်းအဝိုင်းနှင့် ရဟန်းသံဃာအချို့က တောင်းဆိုထားသည်။

"စစ်ကိုင်းတိုင်းမှာက  ၈၀ ရာခိုင်နှုန်းလောက်ရှိတယ်။ ဘယ်ဘက်ကမှ သေချာပညာမသင်ကြားနိုင်ဘူး။ နိုင်ငံ့ဝန်ထမ်း ဆရာ၊ ဆရာမတွေဆိုရင်လည်း သူတို့ကျရာ တာဝန်တွေမှာ မသွားနိုင်ဘူး။ သွားလို့လည်း မရဘူး။ အဲဒီတော့  ဒီပညာရေးဇုန်တွေ အားလုံးက ရပ်တန့်နေတယ်။ မြို့တွေလောက်ပဲ နည်းနည်းပါးပါးဖွင့်နိုင်တယ်။ ကျေးလက်တွေဆိုရင်လည်း မဖွင့်နိုင်တော့ဘူး။ ဖွင့်ပါ တယ်ဆိုတဲ့ဟာတွေကလည်း သူတို့စနစ်တကျ ဘာမှ မသင်နိုင်ဘူး" ဟုIBEC ဆရာတော် ဦးသောဘိတက မိန့်ကြားထားသည်။

ပညာရေး၊ ကျန်းမာရေးကိစ္စများသည် တပ်မတော် နှင့် မဆိုင်သကဲ့သို့ NUG နှင့်လည်း မသက်ဆိုင်ကြောင်း၊ ပညာရေးသည် လူထုနှင့်သာ သက်ဆိုင်ပြီး မည်သည့်အဖွဲ့အစည်းကမျှ အနှောက်အယှက်ပေး၍ မရကြောင်း ဆရာတော် ဦးသောဘိတက မိန့်သည်။

လက်ရှိနစကအစိုးရလက်ထက်တွင် NUG လက်အောက်ခံ PDF အဖွဲ့များ၏ သတ်ဖြတ်မှုကြောင့် ဆရာ၊ ဆရာမ ပညာရေးဝန် ထမ်း (၈၈)ဦးအထိ  သေဆုံးခဲ့ရသည်ဟု နစကဘက်က ထုတ်ပြန်ထားသည်။