ဂျန်ဇက် (NSS) - ဒီဇင်ဘာ ၁၃ 

အစ္စရေးနိုင်ငံမြောက်ပိုင်းကို ရော့ကက်ဒုံးကျည်များဖြင့် ပစ်ခတ်တိုက်ခိုက်ခံရပြီးနောက် အစ္စရေးနိုင်ငံသည် ဒီဇင်ဘာ ၁၃ ရက်တွင် လက်ဘနွန်နိုင်ငံအခြေစိုက် ဟစ်ဘိုလာအုပ်စု နှင့် ဆီးရီးယားနိုင်ငံ လက်နက်ကိုင်အဖွဲ့အစည်းများကို လက်တုံ့ပြန်တိုက်ခိုက်ခဲ့ကြောင်း အစ္စရေးစစ်တပ်က သတင်းထုတ်ပြန်ထားသည်။ 

အစ္စရေးစစ်တပ်သည် ဆီးရီးယားနိုင်ငံရှိ စစ်ဘက်ဆိုင်ရာအခြေခံအဆောက်အဦး နှင့် ဟစ်ဘိုလာလက်နက်ကိုင် အဖွဲ့၏ ရော့ကက်လောင်ချာ ပစ်သောနေရာများကို ပစ်မှတ်ထားတိုက်ခိုက်ခဲ့ခြင်းဖြစ်ကြောင်း သိရသည်။ အစ္စရေး နှင့် လက်ဘနွန်လက်နက်ကိုင်အဖွဲ့ဖြစ်သော ဟစ်ဘိုလာအုပ်စုကြား အပြန်အလှန်ပစ်ခတ်တိုက်ခိုက်မှုများသည် ဒီဇင်ဘာလအစောပိုင်းတည်းက အရှိန်ပိုမိုမြင့်တက်လာနေကြောင်း သိရသည်။ 

အစ္စရေး နှင့် ဟားမက်စ်လက်နက်ကိုင်အဖွဲ့ကြား စစ်ပွဲစတင်ခဲ့ပြီးနောက်ပိုင်း ဟစ်ဘိုလာအုပ်စုသည် အစ္စရေးနိုင်ငံ ဘက်ခြမ်းကို ပစ်မှတ်ထားကာ ရော့ကက်ဒုံးကျည်များဖြင့် ပစ်ခတ်တိုက်ခိုက်ခဲ့သည်။ ဟစ်ဘိုလာအုပ်စု၏ တိုက်ခိုက်မှုများနှင့်ပတ်သက်ပြီး အမေရိကန်အစိုးရ နှင့် အစ္စရေးအစိုးရတို့က သတိပေးပြောဆိုထားပြီး လက်ဘနွန်နိုင်ငံက ဒုတိယစစ်မျက်နှာဖြစ်လာဖွယ်ရှိနေကြောင်း သိရသည်။ 

အစ္စရေးစစ်တပ်က တင့်ကားများ၊ လေကြောင်းမှ ဗုံးကြဲတိုက်ခိုက်ခဲ့ခြင်းကြောင့် ဆီးရီးယားနိုင်ရှိ စစ်ဘက်ဆိုင်ရာ အခြေခံအဆောက်အဦးများ ထိမှန်ပျက်စီးခဲ့ရသလို ဟစ်ဘိုလာအုပ်စု၏ ရော့ကက်ဒုံးကျည် ပစ်ခတ်နေသည့်နေရာ များလည်း ထိမှန်ခဲ့ကြောင်း သတင်းထုတ်ပြန်ထားသည်။ 

လက်ဘနွန်အခြေစိုက် ဟစ်ဘိုလာအုပ်စုက ၎င်းတို့သည် လက်ဘနွန်နိုင်ငံအတွင်းမှ အစ္စရေးနိုင်ငံဘက်ခြမ်းကို ရော့ကတ်၊ ဒုံးကျည်အများအပြားဖြင့် ပစ်ခတ်တိုက်ခိုက်ခဲ့ကြောင်း ဝန်ခံထားသည်။ ထို့အပြင် အီရန်နိုင်ငံ၏ အထောက်ပံ့ကိုရရှိထားသော ဆီးရီးယားနိုင်ငံအဖွဲ့စည်းကလည်း အစ္စရေးနိုင်ငံဘက်ခြမ်းကို ရော့ကက် သုံးစင်းဖြင့် ပစ်ခတ်တိုက်ခိုက်ခဲ့ကြောင်း အတည်ပြုထားသည်။ အစ္စရေး နှင့် ဟားမက်စ်လက်နက်ကိုင်အဖွဲ့ကြား တိုက်ပွဲများ စတင်ဖြစ်လာခဲ့ပြီးနောက် အရှေ့အလယ်ပိုင်းဒေသရှိ လက်နက်ကိုင်အဖွဲ့အစည်းများသည် အီရန်နိုင်ငံကို ပစ်မှတ်ထား တိုက်ခိုက်နေခဲ့ပြီး လက်ရှိအချိန်တွင် တိုက်ပွဲအရှိန် ပိုမိုမြင့်တက်လာနေကြောင်း သိရသည်။