မျိုးကြီး (NSS) - ဒီဇင်ဘာ ၁ဝ

စင်ကာပူနိုင်ငံထံမှ တစ်လလျှင် စက်သုံးဆီ မက်ထရစ်တန် (၅)သန်း တင်သွင်းလျက်ရှိပြီး ယခု ဒီဇင်ဘာလအတွင်း သင်္ဘော (၂၇)စင်းဖြင့် ထပ်မံတင်သွင်းရန် ညှိနှိုင်းထားပြီးဖြစ်ကြာင်း သိရသည်။

စက်သုံးဆီတင်သွင်းသိုလှောင်ဖြန့်ဖြူးမှုနှင့်ပတ်သက်၍ နစက၏ စက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ယမန်နေ့တွင် ရှင်းလင်းပြောဆိုရာ၌ အထက်ပါကဲ့သို့ ပြောဆိုခဲ့ခြင်းဖြစ်သည်။

လက်ရှိတွင် ပြည်တွင်းစက်သုံးဆီသုံးစွဲမှုပမာဏ၏ ၉ဝ ရာခိုင်နှုန်းကျော်ကို စင်ကာပူနိုင်ငံထံမှ အဓိက ဝယ်ယူ တင်သွင်းသိုလှောင်ကာ ဖြန့်ဖြူးပေးနေခြင်းဖြစ်သည်။

“လက်ရှိအခြေအနေမှာ တစ်လပျမ်းမျှ မက်ထရစ်တန် ၅ ဒသမ ဝ သန်းဝန်းကျင် တင်သွင်းဖြန့်ဖြူးပေးနေပါတယ်။ လစဉ် ပြည်တွင်းမှာ ဖူလုံစွာသုံးစွဲနိုင်ဖို့လိုအပ်တဲ့ စက်သုံးဆီအမျိုးအစားအလိုက် ပမာဏကိုတွက်ချက်ပြီး အဲဒီ ပမာဏအတိုင်း သင်္ဘောတွေကို ခန့်မှန်းရောက်ရှိလာမယ့်အချိန်၊ ဆိုက်ကပ်ရမယ့် Jetty တွေရဲ့အခြေအနေ၊ Terminal တွေရဲ့ သိုလှောင်နိုင်မှု ပမာဏ၊ ဘောက်ဆာတွေ ဝင်/ထွက် ထုတ်ယူဖြန့်ဖြူးပေးနိုင်မှုအခြေအနေတို့နဲ့ ကိုက်ညှိပြီး ပြည်ပနိုင်ငံက ဆီတင်သင်္ဘောတွေအတွက် Shipment Plan ကို ရေးဆွဲတင်သွင်းနေတာဖြစ်ပါတယ်” ဟု အဆိုပါကော်မတီမှ အတွင်းရေးမှူး ဦးသန်းဇော်က ပြောသည်။

ဒီဇင်ဘာ ၈ ရက်အထိ သီလဝါသိုလှောင်ကန်စခန်း၊ အခြားသိုလှောင်ကန်စခန်းနှင့် သီလဝါဒေသရှိ Jetty များတွင် ဆီတင်သင်္ဘော (၆)စင်း ဆိုက်ကပ်ထားပြီး ပင်လယ်ဝ Pilot Stataion တွင်လည်း ဆီတင်သင်္ဘော (၉)စင်း ဆိုက်ကပ်ထားကြောင်း ကော်မတီက ဆိုသည်။

ထို့ပြင် စင်ကာပူနိုင်ငံမှတစ်ဆင့် ဆီတင်သင်္ဘောတစ်စင်းသည်လည်း စက်သုံးဆီများတင်ဆောင်ကာ ထွက်ခွာလာ လျက်ရှိသည့်အပြင် ယခုဒီဇင်ဘာလအတွင်း၌ သင်္ဘော (၂၇)စင်းဖြင့် စက်သုံးဆီများ ထပ်မံတင်သွင်းရန် Supplier များဖြင့် ညှိနှိုင်းဆောင်ရွက်ထားပြီးဖြစ်ကြောင်း အတွင်းရေးမှူးဦးသန်းဇော်က ထုတ်ဖော်အသိပေးထားသည်။

လက်ရှိတွင် သီလဝါဆိပ်ကမ်း၌ ဆီသင်္ဘော (၆)စင်း ဆိုက်ကပ်ကာ ဓာတ်ဆီတန်ချိန် (၂၄၃၁၉)တန် နှင့် ဒီဇယ်ဆီ တန်ချိန် (၅၃၃၁၅) တန်ကျော်ကို သက်ဆိုင်ရာသိုလှောင်ကန်များမှ ဆီချပေးနေပြီဖြစ်ကြောင်း သိရသည်။

“ပြည်ပမှာလည်း မြန်မာနိုင်ငံအတွက် ဝယ်ယူထားပြီးဖြစ်တဲ့စက်သုံးဆီတွေကို ဆီတင်သင်္ဘောတွေပေါ် တင်ဆောင် ဖြည့်တင်းလျက်ရှိတဲ့အပြင် ဆီဖြည့်တင်းပြီး လာရောက်ဆဲဆီတင်သင်္ဘောတွေလည်း ရှိနေပါတယ်။ မြန်မာနိုင်ငံ အတွက် စက်သုံးဆီဝယ်ယူထားပြီး ဆီတင်သင်္ဘောတွေပေါ် တင်ဆောင်တာ၊ လမ်းခရီးသယ်ယူတာ၊ မြန်မာနိုင်ငံ ပင်လယ်ဝမှာ အသင့်စောင့်ဆိုင်းတာနဲ့ ဆိပ်ကမ်းတွေမှာ ဆိုက်ကပ်ချယူတဲ့လုပ်ငန်းစဉ်တွေ စဉ်ဆက်မပြတ်ရှိနေ တယ်ဆိုတာကိုလည်း အသိပေးလိုပါတယ်” ဟု ဦးသန်းဇော်က ထပ်မံပြောသည်။

သီလဝါဆိပ်ကမ်းရှိ သိုလှောင်ကန်စခန်း (၈)ခုမှတစ်ဆင့် စက်သုံးဆီများကို နိုင်ငံအတွင်း၌ အဓိကဖြန့်ဖြူးပေးနေ လျက်ရှိပြီး တစ်နေ့လျှင် ဆီဘောက်ဆာကားအစီးရေ (၁၅ဝဝ)မှ (၁၈ဝဝ)ကြားဖြင့် ဖြန့်ဖြူးပေးနေကြောင်း သိရသည်။

ထို့ကြောင့် စက်သုံးဆီနှင့်ပတ်သက်၍ စနစ်တကျလုပ်ဆောင်နေသည့်အတွက် ပြည်သူများအနေဖြင့် စက်သုံးဆီ ပြတ်လပ်မည်ကို စိုးရိမ်ပူပန်နေစရာမလိုကြောင်းလည်း အဆိုပါကော်မတီက အသိပေးထားသည်။