ဂျန်ဇက် (NSS) - ဒီဇင်ဘာ ၁ဝ

အစ္စရေးအစိုးရဟာ ဂါဇာဒေသတောင်ပိုင်းရဲ့အဓိကမြို့တစ်မြို့ဖြစ်တဲ့ ခန်ယူနစ်မြို့မှာ နေထိုင်နေတဲ့အရပ်သားတွေကို ဘေးလွှတ်ရာကိုပြောင်းရွှေ့ဖို့ အမိန့်ပေးလိုက်ကြောင်း သိရပါတယ်။

အမေရိကန်အစိုးရဟာ ပြီးခဲ့တဲ့ရက်ပိုင်းက ကျင်းပခဲ့တဲ့ ကုလသမဂ္ဂလုံခြုံရေးကောင်စီအစည်းအဝေးမှာ ဂါဇာဒေသ အပစ်ခတ်ရပ်စဲရေးတောင်းဆိုချက်တွေကို ငြင်းဆန်ပယ်ချခဲ့ပြီးနောက် အစ္စရေးက အခုလိုမျိုး တိုက်တွန်းတောင်းဆိုခဲ့တာဖြစ်ပါတယ်။

အစ္စရေးစစ်တပ်အနေနဲ့ ဂါဇာဒေသကို မြေပြင်ထိုးစစ်ဆင်နွှဲချိန်အတွင်း လက်ရှိအချိန်အထိ ဟားမက်စ်လက်နက် ကိုင်အဖွဲ့တပ်မှူးတွေ အပါအဝင် ဟားမက်စ်အဖွဲ့ဝင်ပေါင်း ၇ဝဝဝ ကျော်ကို သုတ်သင်နိုင်ခဲ့ကြောင်း အစ္စရေး အမျိုးသားလုံခြုံရေးအကြံပေးအရာရှိဖြစ်သူ Tzachi Hanegbi က ပြောပါတယ်။

အစ္စရေးစစ်တပ်အကြီးအကဲဖြစ်သူ ဗိုလ်ချုပ်ကြီး ဟာလီဗီကလည်း ဂါဇာဒေသကို အစ္စရေးရဲ့တိုက်ခိုက်မှုတွေကို ပိုမို အရှိန်မြင့်တိုက်ခိုက်ဖို့ လိုအပ်ကြောင်း ပြောပါတယ်။ ဒါပေမယ့် ပါလက်စတိုင်းကျန်းမာရေးဝန်ကြီးဌာနက အစ္စရေးရဲ့တိုက်ခိုက်မှုတွေကြောင့် ပါလက်စတိုင်းပြည်သူအနည်းဆုံး ၁၇၇ဝဝ ဦး သေဆုံးခဲ့ပြီး သေဆုံးသူတွေရဲ့ ၄ဝ ရာခိုင်နှုန်းက အသက် ၁၈ နှစ်အောက်ဖြစ်ကြောင်း ပြောပါတယ်။

ခန်ယူနစ်မြို့မှာ နေထိုင်နေတဲ့သူတွေဟာ ဘေးလွှတ်ရာကိုရွှေ့ပြောင်းပေးဖို့ တောင်းဆိုထားကြောင်း၊ စစ်ဆင်ရေး ထပ်မံလုပ်ဆောင်မှာဖြစ်တဲ့အတွက် ထပ်မံပြီးနေရပ်စွန့်ခွာရွှေ့ပြောင်းပေးဖို့ တောင်းဆိုချက်တွေ ထပ်မံဖြစ်လာမှာ ကို စိုးရိမ်မိကြောင်း ပါလက်စတိုင်းဒေသခံတစ်ဦးက ပြောပါတယ်။

အစ္စရေးဟာ ဟားမက်စ်လက်နက်ကိုင်အဖွဲ့နဲ့ရရှိထားတဲ့ ယာယီအပစ်ခတ်ရပ်စဲရေးဟာ ဒီဇင်ဘာလအစောပိုင်းမှာ ရပ်တန့်သွားခဲ့ပြီးနောက် ဂါဇာဒေသကို တစ်ကျော့ပြန်တိုက်ခိုက်ခဲ့ရာ သေဆုံးသူအရေအတွက် မြင့်တက်လာနေကြောင်း သိရပါတယ်။

ကုသလမဂ္ဂအတွင်းရေးမှူးချုပ်ဂူတာရက်စ်ရဲ့တောင်းဆိုချက်တွေအရ ဒီဇင်ဘာ ၈ ရက်က ကုလသမဂ္ဂလုံခြုံရေးကောင်စီအရေးပေါ်အစည်းအဝေး ကျင်းပခဲ့ပြီး ဂါဇာဒေသစစ်ပွဲ အပစ်ခတ်ရပ်စဲဖို့ တောင်းဆိုခဲ့ရာ အမေရိကန်အစိုးရက ဗီတိုအာဏာသုံး ငြင်းဆန်ပယ်ချခဲ့ကြောင်း သိရပါတယ်။