ယွန်း (NSS) - ဒီဇင်ဘာ ၁ဝ

စက်သုံးဆီများကို လိုအပ်မှုထက် ပိုမိုဝယ်ယူကာ တရားမဝင်သိုလှောင်ရောင်းချပါက ထောင်ဒဏ်တစ်နှစ်အထိ ပြစ်ဒဏ်ချမှတ်ခံရနိုင်ကြောင်း နစကမှ အသိပေးပြောထားသည်။

နစက၏ စက်သုံးဆီသိုလှောင်ဖြန့်ဖြူးခြင်းလုပ်ငန်းကြီးကြပ်‌ရေးကော်မတီ အတွင်းရေးမှူး ဦးသန်းဇော်က ယမန်နေ့ (ဒီဇင်ဘာ ၉ ရက်) တွင် မီဒီယာများမှတစ်ဆင့် အထက်ပါကဲ့သို့ အသိပေးပြောထားခြင်းဖြစ်သည်။

စက်သုံးဆီပြတ်လပ်တော့မည်ဆိုသည့် ကောလဟာလသတင်းများနှင့် မမှန်ကန်သည့်သတင်းများကြောင့် ပြည်သူများအနေဖြင့် စိုးရိမ်စိတ်များဖြင့် ပုံမှန်သုံးစွဲမှုပမာဏထက် ကျော်လွန်ဝယ်ယူနေကြပြီး စက်သုံးဆီဆိုင်များတွင် တန်းစီဝယ်ယူမှုများဖြစ်နေ‌ပေါ်ရကြောင်း ဦးသန်းဇော်က သုံးသပ်ပြောကြားထားသည်။

ထို့ပြင် CNG Taxi များအနေဖြင့်လည်း စက်သုံးဆီမလိုအပ်သော်လည်း အခြားနည်းအသုံးပြုရန် ဝယ်ယူမှုများရှိနေကြောင်း သိရသည်။

၂ဝ၁၇ ခုနှစ် ရေနံနှင့်ရေနံထွက်ပစ္စည်းဆိုင်ရာ ဥပဒေပုဒ်မ ၃ဝ အရ “မည်သူမျှ ဤဥပဒေအရ လိုင်စင်ရယူရန် လိုအပ်သည့်လုပ်ငန်း (သို့မဟုတ်) ဆောင်ရွက်မှုတစ်ခုကို သက်ဆိုင်ရာလိုင်စင်ရယူခြင်းမရှိဘဲ လုပ်ကိုင်ဆောင်ရွက် ခြင်းမပြုရ” ဟု ပြဋ္ဌာန်းထားကြောင်း သိရသည်။

“ကျွန်တော့်အနေနဲ့ပြောကြားချင်တာက စက်သုံးဆီတွေကို လိုအပ်တာထက်ပိုမိုဝယ်ယူပြီး တရားမဝင်သိုလှောင် ထားတာ၊ တစ်ဆင့်ပြန်လည်ရောင်းချတာ၊ အခေါက်ခေါက် တန်းစီဝယ်ယူတာမျိုး မပြုကြဖို့နဲ့ မိမိတို့လိုအပ် သလောက်ကိုသာ စိတ်အေးချမ်းသာစွာ ဝယ်ယူ သုံးစွဲကြပါလို့ ပြောလိုပါတယ်။ ဒီလို တရားမဝင်သိုလှောင်ထား တာ၊ တစ်ဆင့်ပြန်လည်ရောင်းချတာတွေက ဥပဒေနဲ့မညီတဲ့အပြင် မီးဘေးအန္တရာယ်အတွက်လည်း အင်မတန် စိုးရိမ်စရာဖြစ်တဲ့အတွက် မိမိအကျိုးစီးပွားကြောင့် အများပြည်သူထိခိုက်နစ်နာမှာကို မပြုလုပ်ကြဖို့ မေတ္တာရပ်ခံလို ပါတယ်” ဟု  ဦးသန်းဇော်က အကြံပြုပြောထားသည်။

အဆိုပါဥပဒေအရ စက်သုံးဆီများကို လိုင်စင်မဲ့သယ်ယူပို့ဆောင်ခြင်း၊ သိုလှောင်ခြင်း၊ ရောင်းချခြင်းများ စစ်ဆေး တွေ့ရှိပါက အနည်းဆုံးဒဏ် ငွေကျပ် သုံးသိန်းမှ အများဆုံးဒဏ်ငွေကျပ်သိန်း (၅ဝ)အထိ ငွေဒဏ်ဖြစ်စေ၊ တစ်နှစ် ထက် မပိုသော ထောင်ဒဏ်ဖြစ်စေ ပြစ်ဒဏ်အပြင် ပြစ်ဒဏ်နှစ်ရပ်လုံး စီရင်ခံရမည့်အပြင် ပြစ်မှုကျူးလွန်ခြင်း နှင့် သက်ဆိုင်သည့်ပစ္စည်းများကိုလည်း ပြည်သူ့ဘဏ္ဍာအဖြစ် သိမ်းဆည်းခြင်းခံရနိုင်ကြောင်း ၎င်းက ဆက်လက်ပြော သည်။

ထို့ကြောင့် စက်သုံးဆီများကို လိုင်စင်မဲ့ရောင်းချခြင်း၊ နေအိမ်၊ ခြံဝင်းများအပြင် မည်သည့်နေရာတွင်မဆို လိုင်စင်မဲ့ ‌ရောင်းချခြင်းများကို စစ်ဆေးကြပ်မတ်ကာ ဥပဒေနှင့်အညီ အရေးယူဆောင်ရွက်မည်ဖြစ်ကြောင်း သတိပေးထားသည်။

လက်ရှိတွင် လူမှုကွန်ယက်စာမျက်နှာများ၌ စက်သုံးဆီများနှင့်ပတ်သက်၍ တစ်လီတာလျှင် ငွေကျပ်(၄ဝဝဝ)မှ (၅ဝဝဝ) ကျပ်နှုန်းဖြင့် ဂါလံပေါင်းထောင်နှင့်ချီကာ ရေးသားရောင်းချနေမှုများကို တွေ့ရသည့်အပြင် စက်သုံးဆီ မှောင်ခိုဈေးကွက်များလည်း ဖြစ်ပေါ်လာနေကြောင်း တွေ့ရှိရသည်။

“မနက်အစောကြီးထဲက ဆီရဖို့ကိုလာစောင့်နေရတာ။ တန်းစီရတာအကြာကြီးပဲ။ ကားတွေလည်း‌တော်တော်များ တယ်။ ကြားထဲမှာ ဆီကုန်သွားလို့ နောက်ထပ် ဆီဘောက်ဆာ ကားတစ်စီးကိုလည်း ထပ်စောင့်ရသေးတယ်။ အခုလိုအချိန်အများကြီးပေးပြီး တန်းစီစောင့်ရတာအဆင်တော့မပြေဘူးပေါ့” ဟု ရန်ကုန်မြို့ရှိ တက္ကစီယာဉ်မောင်း တစ်ဦးက ပြောသည်။

ရန်ကုန်မြို့ရှိ စက်သုံးဆီအရောင်းဆိုင်များတွင် ကားအများအပြား တန်းစီစောင့်ဆိုင်းကာ စက်သုံးဆီ ဝယ်ယူနေရသည့်ဖြစ်စဉ်များ ဆက်လက်ဖြစ်ပေါ်နေလျက်ရှိသည်။