တောင်တရုတ်ပင်လယ်အရေး အငြင်းပွားမှုတွေရှိနေချိန်မှာပဲ တရုတ်သင်္ဘောတွေက ဖိလစ်ပိုင်လှေတွေကို မီးသတ်ပိုက်နဲ့ ထပ်မံထိုးပြီး မောင်းထုတ်
ဂျန်ဇက် (NSS) - ဒီဇင်ဘာ ၉
တောင်တရုတ်ပင်လယ်မှာ ပိုင်နက်နယ်မြေအငြင်းပွားမှုတွေမြင့်တက်နေချိန်မှာပဲ ဖိလစ်ပိုင် နဲ့ တရုတ်နိုင်ငံကြား တင်းမာမှုတွေ၊ အငြင်းပွားမှုတွေတစ်ကျော့ပြန်ထပ်မံဖြစ်လာခဲ့ကြောင်းသိရပါတယ်။
တရုတ်ကမ်းခြေစောင့်တပ်ဖွဲ့ သင်္ဘောတွေဟာ ဖိလစ်ပိုင်အစိုးရပိုင်လှေများကို မီးသတ်ပိုက်များနဲ့ထိုးခဲ့ပြီး မောင်းထုတ်ခဲ့ကြောင်း ဖိလစ်ပိုင်အစိုးရက စွပ်စွဲပြောဆိုခဲ့ပါတယ်။ တောင်တရုတ်ပင်လယ်ရှိ တရုတ်အစိုးရ ထိန်းချုပ်ထားတဲ့ ကျောက်တန်းတွေနားကိုရောက်ရှိလာတဲ့ ဖိလစ်ပိုင် ငါးဖမ်းလှေတွေကို လိုအပ်တဲ့ပစ္စည်းတွေ လွှဲပြောင်းပေးဖို့ သွားရောက်ခဲ့တဲ့ ဖိလစ်ပိုင် အစိုးရလှေသုံးစင်းဟာ မီးသတ်ပိုက်နဲ့အထိုးခံရပြီး ဟန့်တားခံရကြောင်း ဖိလစ်ပိုင်အစိုးရက ဆိုပါတယ်။
ဖိလစ်ပိုင်အစိုးရက "တရုတ်ကမ်းခြေစောင့်သင်္ဘောတွေဟာ ငါးဖမ်းလှေတွေကို အစားအစာနဲ့ လောင်စာဆီတွေပေးဖို့ လာရောက်တဲ့ ဖိလစ်ပိုင်အစိုးရလှေသုံးစင်းကို ဟန့်တားနှောက်ယှက်ခဲ့တယ်"လို့ပြောပါတယ်။
ဖိလစ်ပိုင် နဲ့ တရုတ်နိုင်ငံတို့ဟာ ပြီးခဲ့တဲ့လပိုင်းများကလည်း တောင်တရုတ်ပင်လယ်အတွင်း အငြင်းပွားမှုများဖြစ်ခဲ့ပြီး တရုတ်စစ်သင်္ဘောက ဖိလစ်ပိုင်ကမ်းခြေစောင့်လှေကို ဝင်တိုက်ခဲ့ကြောင်းသိရပါတယ်။ တရုတ်နိုင်ငံဟာ တောင်တရုတ်ပင်လယ်အတွင်းမှာ အာဆီယံဒေသအတွင်းရှိ နိုင်ငံအချို့နဲ့ပိုင်နက်နယ်မြေအငြင်းပွားနေကြောင်းသိရပါတယ်။ တရုတ်နိုင်ငံက တောင်တရုတ်ပင်လယ်အတွင်းရှိ ပိုက်နက်နယ်မြေအားလုံးရဲ့ ၈၀ ရာခိုင်နှုန်းကို ၎င်းတို့ပိုင်နက်ကြောင်းပြောဆိုထားသလို ဖိလစ်ပိုင်၊ ဗီယက်နမ်၊ အင်ဒိုနီးရှား နဲ့ မလေးရှားနိုင်ငံတို့ကလည်း တောင်တရုတ်ပင်လယ်အတွင်းမှာ ၎င်းတို့ပိုင်နက်တွေရှိနေကြောင်း ပြောဆိုထားပါတယ်။
တရုတ် နဲ့ ဖိလစ်ပိုင်ကြား ပိုင်နက်နယ်မြေအငြင်းပွားမှုများနဲ့ပတ်သက်ပြီး နိုင်ငံတကာခုံရုံးအထိ ရောက်ရှိခဲ့ဖူးပြီး နိုင်ငံတကာခုံရုံးက တရုတ်အစိုးရရဲ့ပြောဆိုချက်တွေကို ငြင်းဆန်ပယ်ချထားပါတယ်။ နိုင်ငံတကာ ခုံရုံးဟာ တောင်တရုတ်ပင်လယ် အငြင်းပွားမှုနဲ့ပတ်သက်ပြီး ဖိလစ်ပိုင်နိုင်ငံကို အနိုင်ပေးခဲ့ကာ တရုတ်နိုင်ငံရဲ့တင်ပြချက်တွေကို ငြင်းဆန်ထားပါတယ်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ပေါင်မြို့နယ်တွင် အိမ်စီးကားက သုံးဘီးဆိုင်ကယ်နှင့် သစ်ပင်ကိုဝင်တိုက်မှု ကြောင့် ယာဉ်မောင်းဖြစ်သူ ပြင်းထန်စွာဒဏ်ရာရ
RELATED POSTS
21 Sep 2024 | အထွေထွေ,ပြည်တွင်း
21 Sep 2024 | အထွေထွေ,နိုင်ငံတကာ
20 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း