ယူကရိန်းကို နောက်ထပ်အကူအညီများ ပေးပို့ပေးမည်ဆိုသည့် ကတိများမပေးနိုင်ကြောင်း အမေရိကန်အစိုးရ ထုတ်ဖော်ပြော
Pika (NSS) - ဒီဇင်ဘာ ၈
အမေရိကန်လွှတ်တော်ထံမှ အတည်ပြုချက်များ မရရှိမချင်း ယူကရိန်းအစိုးရသည် အမေရိကန်နိုင်ငံထံမှ နောက်ထပ်ရန်ပုံငွေများကို မမျှော်လင့်သင့်ကြောင်း အမေရိကန်အမျိုးသားလုံခြုံရေးကောင်စီပြောရေးဆိုခွင့်ရှိသူ ဂျွန်ကာဘိုင်က ထုတ်ဖော်ပြောခဲ့သည်။
ဒီဇင်ဘာလ(၆)ရက်တွင် အမေရိကန်အထက်လွှတ်တော်သည် ယူကရိန်းသို့ အကူအညီအဖြစ် အမေရိကန်ဒေါ်လာ (၆ဝ) ဘီလျံကျော် ခွဲဝေပေးမည့် အမေရိကန်ဒေါ်လာ(၁၁၁)ဘီလျံ အသုံးစရိတ်ဥပဒေမူကြမ်းကို အတည်ပြုပေးရန် ငြင်းဆိုခဲ့ကြောင်းလည်း သိရသည်။
အဆိုပါအသုံးစရိတ်ဥပဒေမူကြမ်းကို အတည်မပြုပေးခြင်းသည် အမေရိကန်၏ ခေါင်းဆောင်မှုပိုင်းနှင့် ဂုဏ်သိက္ခာ တို့ကို ထိခိုက်စေနိုင်ကြောင်း အမေရိကန်သမ္မတဂျိုးဘိုင်ဒန်က ပြောဆိုခဲ့သော်လည်း အထက်လွှတ်တော်က ယခုကဲ့သို့ ငြင်းဆိုခဲ့ခြင်းဖြစ်ကြောင်း သိရသည်။
ဂျွန်ကာဘိုင် က "ယူကရိန်းကို ကတိပေးနိုင်မယ့်အနေအထားမျိုးမှာ ကျွန်တော်တို့ မရှိပါဘူး" ဟု ပြောခဲ့သည်။ အမေရိကန်နိုင်ငံသည် ယူကရိန်းသို့ နောက်ထပ်ရန်ပုံငွေများ ပံ့ပိုးပေးခြင်းနှင့်ပတ်သက်ပြီး အာခံချက်များ ရှိ/မရှိ ဆိုသည့်မေးခွန်း မေးခံရချိန်တွင် ဂျွန်ကာဘိုင်က ယခုကဲ့သို့ တုံ့ပြန်ပြောဆိုခဲ့ခြင်းဖြစ်သည်။
ရုရှားက ယူကရိန်းအပေါ် ကျူးကျော်တိုက်ခိုက်မှုများ စတင်လုပ်ဆောင်ခဲ့သည့် ၂ဝ၂၂ ခုနှစ် ဖေဖော်ဝါရီလ နောက်ပိုင်းကတည်းက အမေရိကန်လွှတ်တော်သည် ယူကရိန်းသို့ အကူအညီများပေးပို့ရန်အတွက် အမေရိကန် ဒေါ်လာ(၁၂ဝ)ဘီလျံကျော် အတည်ပြုပေးခဲ့ကြောင်းလည်း သိရသည်။ အဆိုပါ အကူအညီများထဲတွင် ယူကရိန်း အစိုးရအတွက် ငွေသားပေးမှုများအပြင် အမေရိကန်ဒေါ်လာ(၄၄)ဘီလျံ တန်ဖိုးရှိ စစ်လက်နက်ပစ္စည်းများ၊ ခဲယမ်း မီးကျည်များ နှင့် အမေရိကန်စစ်ဌာနချုပ်ပင်တဂွန်၏ သိုလှောင်မှုများထဲမှ စစ်လက်နက်ပစ္စည်းများလည်း ပါဝင် ကြောင်း သိရသည်။
အမေရိကန်အောက်လွှတ်တော်တွင် ဥက္ကဋ္ဌသစ်ကို ရွေးချယ်ရန်အတွက် ကြိုးပမ်းနေချိန်အတွင်း ပြီးခဲ့သည့် အောက်တိုဘာလလယ်တွင် အမေရိကန်သမ္မတဂျိုးဘိုင်ဒန်သည် နောက်ထပ်ရန်ပုံငွေ အမေရိကန်ဒေါ်လာ (၆ဝ) ဘီလျံကျော်ကို တောင်းခံခဲ့ကြောင်းလည်း သိရသည်။
သို့သော်လည်း အမေရိကန်အစိုးရသည် အဆိုပါတောင်းဆိုမှုကို အစ္စရေး၊ ထိုင်ဝမ် နှင့် အမေရိကန်-မက္ကဆီကို နယ်စပ်သို့ အကူအညီများပေးမည့်အစီအစဉ်တစ်ခုအဖြစ် ရွေးချယ်ခဲ့ကြောင်းလည်း သိရသည်။ ရန်ပုံငွေ ခွဲဝေမှု ကိစ္စများနှင့်ပတ်သက်ပြီး လွှတ်တော်ကိုယ်စားလှယ်များကြားတွင် သဘောထားကွဲလွဲမှုများရှိလာခဲ့သလို အမေရိကန်ကာကွယ်ရေးဌာနကလည်း ၎င်းတို့တွင် ယူကရိန်းသို့ပေးပို့ပေးနိုင်မည့် လက်နက်ခဲယမ်းမီးကျည်များ မရှိတော့ကြောင်း ပြောခဲ့သည်။
ပင်တဂွန်တာဝန်ရှိသူဆာဘရီနာဆင်းဂျ် က "ကျွန်မတို့ရင်ဆိုင်နေရတဲ့အကြီးမားဆုံးပြဿနာကတော့ ကိုယ်ပိုင် သိုလှောင်မှုတွေကို ပြန်လည်ဖြည့်တင်းနိုင်ဖို့ ငွေကြေးအလုံအလောက်မရှိတာပါပဲ။ ဒါကြောင့် ယူကရိန်းလိုအပ်တဲ့ အရာတွေကို ကျွန်မတို့ဆက်လက်ကူညီပံ့ပိုးပေးနိုင်မှာ မဟုတ်တော့ပါဘူး။ ကျွန်မတို့ရဲ့ လက်နက်တွေ၊ စွမ်းရည် တွေ၊ စနစ်တွေကို သိုလှောင်မှုတွေထဲကနေ ထုတ်ပြီး ယူကရိန်းကိုပေးပို့နေတာဖြစ်တဲ့အတွက် ပြန်လည်ဖြည့်တင်း မှုတွေ မလုပ်ဆောင်နိုင်ဘူးဆိုရင် ကျွန်မတို့ရဲ့အသင့်အနေအထားနဲ့ပြင်ဆင်မှုတွေအပေါ် အကျိုးသက်ရောက်မှုတွေ ရှိလာနိုင်ပါတယ်" ဟု ပြောခဲ့သည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ရန်ကုန်မြို့တွင် ရပ်ထားသည့်သဲကားအား TOWN ACE ကားမှအရှိန်လွန်ဝင်တိုက်မိခဲ့ရာ အမျိုးသားတစ်ဦး ထိခိုက်ဒဏ်ရာရ
RELATED POSTS
04 Oct 2024 | နိုင်ငံရေး,ပြည်တွင်း
02 Oct 2024 | နိုင်ငံရေး,နိုင်ငံတကာ
02 Oct 2024 | နိုင်ငံရေး,ပြည်တွင်း
01 Oct 2024 | နိုင်ငံရေး,နိုင်ငံတကာ