Pika (NSS) - ဒီဇင်ဘာ ၈ 

အမေရိကန်နိုင်ငံသည် ၎င်း၏ မဟာမိတ်နိုင်ငံများအပေါ်  အမြတ်ထုတ်နေကြောင်း ရုရှားသမ္မတပူတင်က ပြောခဲ့သည်။ 

ထို့အပြင် အမေရိကန်နိုင်ငံသည် ကမ္ဘာတစ်ဝှမ်းတွင် ၎င်း၏ဩဇာလွှမ်းမိုးမှုများကို ဆက်လက်ထိန်းသိမ်းရန်အတွက် ဂလိုဘယ်လိုက်ဇေးရှင်းလုပ်ငန်းစဉ်ကို ပစ္စည်းကိရိယာတစ်ခုအဖြစ် အသုံးပြုနေကြောင်း ပူတင်က ထပ်မံပြောဆိုခဲ့သည်။ 

ပူတင် က "အမေရိကန်နိုင်ငံဟာ သူ့ရဲ့မိတ်ဖက်နိုင်ငံတွေ အပါအဝင် အခြားနိုင်ငံတွေအပေါ် အခွင့်ကောင်းယူဖို့ တုံ့ဆိုင်းနေတာမျိုး မရှိပါဘူး။ ဒါကြောင့် ကမ္ဘာကြီးဟာ စစ်မှန်တဲ့ဒီမိုကရေစီကမ္ဘာလုံးဆိုင်ရာစီးပွားရေးအသစ်ကို တည်ဆောက်ဖို့ အခွင့်အလမ်းရှိပါတယ်။ ဂလိုဘယ်လိုက်ဇေးရှင်းဟာ နိုင်ငံတကာအသိုင်းအဝိုင်းရဲ့ အဖွဲ့ဝင် အားလုံးကို အကျိုးရှိစေဖို့နဲ့ လူမျိုးတိုင်းကို တူညီတဲ့ တန်းတူအခွင့်အရေးတွေ ပေးနိုင်ဖို့ ရည်မှန်းထားပေမယ့်လည်း လက်တွေ့မှာတော့ အဲဒီလိုမျိုးမဖြစ်လာခဲ့ပါဘူး" ဟု ပြောခဲ့သည်။

အမေရိကန်နိုင်ငံသည် ထိပ်ဆုံးနေရာတွင် အမြဲတမ်းရပ်တည်နေနိုင်မည့် ဂလိုဘယ်လိုက်ဇေးရှင်းကမ္ဘာနှင့် ပတ်သက်ပြီး ၎င်း၏ ကိုယ်ပိုင်အမြင်များလည်းရှိကြောင်း ပူတင်က ပြောခဲ့သည်။ ထို့အပြင် အနောက်အုပ်စုနိုင်ငံ များသည် အခြားနိုင်ငံများ၏ စီးပွားရေးဖွံ့ဖြိုးတိုးတက်မှုများကိုအတုယူကာ ချုပ်ကိုင်ရန်ကြိုးပမ်းနေပြီး ၎င်းတို့ကို ကိုလိုနီနိုင်ငံများကဲ့သို့ ဆက်ဆံနေကြောင်း ပူတင်က ပြောခဲ့သည်။

ပူတင် က "တကယ်တော့ အမေရိကန်နိုင်ငံဟာ ကမ္ဘာလုံးဆိုင်ရာစီးပွားရေးရဲ့အခြားအဖွဲ့အစည်းတွေလိုပဲ မဟာမိတ်တွေအပေါ်ကို အမြတ်ထုတ်ခဲ့ပါတယ်။ လက်ရှိအချိန်မှာတော့ ယခင်မော်ဒယ်ဟောင်းကို ဝင်ရိုးစုံကမ္ဘာနဲ့ အစားထိုးဖို့ကြိုးပမ်းနေပါပြီ။ ရုရှားနိုင်ငံဟာ နိုင်ငံတကာအဖွဲ့အစည်းတွေအားလုံးကြားမှာ တရားမျှတမှုရှိတဲ့ ယှဉ်ပြိုင်မှုကို အခြေခံထားတဲ့စစ်မှန်တဲ့ဒီမိုကရေစီ ကမ္ဘာလုံးဆိုင်ရာစီးပွားရေးမော်ဒယ်အသစ်ကို ထူထောင်နိုင်ဖို့ ကြိုးပမ်းနေပါတယ်" ဟု ပြောခဲ့သည်။

ထို့အပြင် ယူကရိန်းအပေါ် လုပ်ဆောင်နေသော စစ်ဆင်ရေးများနှင့်ပတ်သက်ပြီး  အမေရိကန် နှင့် ၎င်း၏ မိတ်ဖက် နိုင်ငံများ၏ ရုရှားနိုင်ငံအပေါ်ပိတ်ဆို့အရေးယူမှုများသည် နိုင်ငံအများအပြား၏ ကုန်သွယ်မှုများတွင် အမေရိကန် ဒေါ်လာအစား နိုင်ငံသုံးငွေကြေးများကို အသုံးပြုမှုဆီသို့ ပြောင်းလဲသွားစေခဲ့ကြောင်း ပူတင်က မှတ်ချက်ပြု ပြောခဲ့ သည်။ 

ရုရှားနိုင်ငံသာမက အခြားနိုင်ငံအများအပြားသည် နိုင်ငံခြားကုန်သွယ်မှုများတွင် အခြားရွေးချယ်စရာများကို ပြောင်းလဲခြင်းဖြင့် အနောက်အုပ်စုနိုင်ငံများ၏ ငွေကြေးများအပေါ် မှီခိုအားထားမှုကို လျှော့ချလာခဲ့ကြောင်း ရုရှားနိုင်ငံခြားရေးဝန်ကြီးဆာဂေးလာရော့ဗ်က ပြီးခဲ့သည့်နိုဝင်ဘာလနှောင်းပိုင်းတွင် ထုတ်ပြန်ပြောကြားခဲ့သည်။