ယွန်း (NSS) - ဒီဇင်ဘာ ၇

နိုင်ငံတော်တာဝန်ထမ်းဆောင်စဥ် အကြမ်းဖက်သတ်ဖြတ်ခံရမှု အပါအဝင် ထိခိုက်သေဆုံးခဲ့သော နိုင်ငံ့ဝန်ထမ်းများကို ထောက်ပံ့ငွေပေးရန် စီစဥ်သွားမည်ဖြစ်ကြောင်း သိရသည်။

နစကဒုဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်းက ဒီဇင်ဘာလ(၆)ရက်တွင် နေပြည်တော်ရှိ နစကဥက္ကဋ္ဌရုံး အစည်းအဝေးခန်းမ၌ ကျင်းပခဲ့သည့် ၂၀၂၄ ခုနှစ်အတွက် ဂုဏ်ထူးဆောင်ဘွဲ့များ၊ ဂုဏ်ထူးဆောင်တံဆိပ်များ ချီးမြှင့်အပ်နှင်းရန် စိစစ်ရေးအဖွဲ့အစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

နစကအနေဖြင့် နိုင်ငံတော်ကို ထူးကဲစွာအကျိုးပြုသည့် ဂုဏ်ပြုချီးမြှင့်ထိုက်သူ သာသနာ့အာဇာနည်များ၊ လူပုဂ္ဂိုလ်များ၊ တပ်မတော်သားများ၊ မြန်မာ နိုင်ငံရဲတပ်ဖွဲ့ဝင်များနှင့် နိုင်ငံ့ဝန်ထမ်းများကို ဂုဏ်ထူးဆောင်တံဆိပ်များ၊ ဘွဲ့တံဆိပ်များ စနစ်တကျစိစစ်ပြီး ချီးမြှင့်သွားမည်ဖြစ်ကြောင်း သိရသည်။

ထို့ပြင် နိုင်ငံတော်ဝန်ကြီးချုပ်၏ လမ်းညွှန်ချက်နှင့်အညီ နိုင်ငံတော်တာဝန်ထမ်းဆောင်စဥ် ထိခိုက်၊ဒဏ်ရာရ၊ သေဆုံး၊ကျဆုံးခဲ့သည့် နိုင်ငံ့ဝန်ထမ်းများကို ထောက်ပံ့ငွေများပေးအပ်နိုင်ရန် ထည့်သွင်းစိစစ်သွားမည်ဖြစ်ကြောင်းလည်း နစကဒုဥက္ကဋ္ဌက ပြောသည်။

၂၀၂၁ ခုနှစ်၊ ဖေဖော်ဝါရီလမှစ၍ မြန်မာနိုင်ငံ၌ တပ်မတော်က နိုင်ငံတော်အာဏာရယူခဲ့ပြီးနောက်ပိုင်းတွင် အကြမ်းဖက်အဖွဲ့များ၏ လုပ်ကြံသတ် ဖြတ်မှုကြောင့် သေဆုံးသူ(၆၇၀၀)ကျော်ရှိခဲ့ကြောင်း နစက၏ သတင်းအချက်အလက်များအရ သိရသည်။

ထိုသို့အကြမ်းဖက်သတ်ဖြတ်ခံရသူများထဲတွင် ရဟန်းသံဃာ၊ နိုင်ငံ့ဝန်ထမ်းများဖြစ်သည့် ဆရာ၊ဆရာမ၊ ဆရာဝန်၊ ရဲတပ်ဖွဲ့ဝင်၊ မီးသတ်တပ်ဖွဲ့ဝင်၊ လျှပ်စစ်ဝန်ထမ်း၊ လ.ဝ.ကဝန်ထမ်းများ အပါအဝင် အုပ်ချုပ်ရေးမှူးများနှင့် အရပ်သားများ ပါဝင်ကြောင်း သိရသည်။ 

“သူ့တာဝန်သူ တာဝန်သိစွာနဲ့ ထမ်းဆောင်နေရတဲ့အချိန်မှာ အသတ်ခံလိုက်ရတာတွေရှိပါတယ်။ ထိခိုက်ဒဏ်ရာရခဲ့တာတွေလည်းရှိတယ်။  ထောက်ပံ့ ကြေးပေးမယ်ဆိုတော့လည်း ကောင်းတာပေါ့။ သူတို့မိသားစုတွေအတွက်လည်းအားဆေးလိုဖြစ်တာပေါ့။ မီးသတ်ဝန်ထမ်းဆိုတာ ရတဲ့လစာနဲ့ ခြိုးခြိုးခြံခြံစားရတဲ့သူတွေကြီးပဲ။ အချိန်ပြည့်တာဝန်ထမ်းဆောင်ရတာ အပြင်အလုပ်လည်းထွက်လုပ်လို့ရတာမဟုတ်ဘူး။ တခြားဝန်ထမ်းတွေဆို ပိတ်ရက်တွေရှိတယ်။ ကျွန်တော်တို့မှာပိတ်ရက်လည်းမရှိဘူး။ အဲဒီတော့ တာဝန်ထမ်းဆောင်ရင်းထိခိုက်သေဆုံးသွားတဲ့သူတွေကို ထောက်ပံ့ပေးတယ်ဆိုရင်တော့ အရမ်းကောင်းတာပေါ့”ဟု မြန်မာနိုင်ငံမီးသတ်ဦးစီးဌာနမှ အရာရှိတစ်ဦးက NSS ကိုပြောသည်။

နိုင်ငံတော်တာဝန်ထမ်းဆောင်စဥ် ရဲတပ်ဖွဲ့ဝင်(၄၄၅)ဦး၊ ရစဖမှူး(၆၉၁)ဦး၊  ပညာရေးဝန်ထမ်းများဖြစ်သည့် ဆရာ၊ ဆရာမ(၁၀၀)နီးပါး၊ ကျန်းမာရေးဝန်ထမ်း(၁၆)ဦးနှင့် အခြားဝန်ထမ်း(၂၅၁)ဦးတို့သည် လက်ရှိနစကလက်ထက်၌ အကြမ်းဖက်သတ်ဖြတ်ခံခဲ့ရသည်။