ဂျန်ဇက် (NSS) - ဒီဇင်ဘာ ၇

ကုလသမဂ္ဂအဖွဲ့အတွင်းရေးမှူးချုပ် ဂူတာရက်စ်ဟာ ကုလသမဂ္ဂကြေညာစာတမ်း အပိုဒ် ၉၉ ကို သူရဲ့သက်တမ်းအတွင်း ပထမဆုံးအကြိမ် သတ်မှတ်လုပ်ကိုင်ဖို့တောင်းဆိုလိုက်ကြောင်း သိရပါတယ်။ 

ကုလသမဂ္ဂအတွင်းရေးမှူးချုပ်ဟာ ဂါဇာဒေသမှာ လူသားချင်းဆိုင်ရာစာနာမှုအကူအညီတွေ ပေးပို့ကူညီနိုင်ရေးနဲ့ပတ်သက်ပြီး အခက်ခဲရှိလာခဲ့ပြီးနောက် အခုလိုမျိုးတောင်းဆိုခဲ့တာဖြစ်ပါတယ်။ ဂူတာရက်စ်က "ကုလသမဂ္ဂ အတွင်းရေးမှူးချုပ်အဖြစ် တာဝန်ယူတဲ့သက်တမ်းအတွင်း ပထမဆုံးအကြိမ်အနေနဲ့ ကုလသမဂ္ဂ ကြေညာစာတမ်း အပိုဒ် ၉၉ ကို အသုံးပြုခွင့်ပေးဖို့ လုပ်ဆောင်ခဲ့တာပါ။ ကုလသမဂ္ဂလုံခြုံရေးကောင်စီဟာ ဂါဇာဒေသမှာ လူသားချင်း ဆိုင်ရာစာနာမှုအကူအညီပေးနိုင်ဖို့အတွက် အကူအညီပေးဖို့ တောင်းဆိုတိုက်တွန်းပါတယ်" လို့ ပြောပါတယ်။

အဆိုပါ အပိုဒ် ၉၉ ကို အသုံးမပြုတာ နှစ်ပေါင်းများစွာကြာမြင့်နေပြီး လက်ရှိအချိန်မှာ ပြန်လည်ကျင့်သုံးဖို့ စီစဉ်ခဲ့ တာဖြစ်ကြောင်း ကုလသမဂ္ဂအဖွဲ့ပြောရေးဆိုခွင့်ရှိသူ စတီဖန်ဒူဂျာရစ်က ပြောပါတယ်။ ကုလသမဂ္ဂ အတွင်းရေးမှူးချုပ် ဂူတာရက်စ် ပေးပို့တဲ့စာနဲ့ပတ်သက်ပြီး ကုလသမဂ္ဂဆိုင်ရာအမေရိကန်သံတမန်အဖွဲ့ကတော့ တစ်စုံတစ်ရာ မှတ်ချက်ပြုပြောဆိုခြင်းမရှိကြောင်း သိရပါတယ်။

အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မက်သရူးမီလာက အမေရိကန်အစိုးရဟာ ဂူတာအပြင် ကုလသမဂ္ဂလုံခြုံရေးကောင်စီအဖွဲ့ဝင်နိုင်ငံတွေနဲ့ တိုင်ပင်ဆွေးနွေးသွားမယ်လို့ ပြောပါတယ်။ ကုလသမဂ္ဂအဖွဲ့ ကြေညာစာတမ်းအပိုဒ် ၉၉ ထဲမှာ ကုလသမဂ္ဂအတွင်းရေးမှူးချုပ်ဟာ  နိုင်ငံတကာလုံခြုံရေးနဲ့ ငြိမ်းချမ်းရေးကို ထိန်းသိမ်းနိုင်ဖို့ ခြိမ်းခြောက်နေတယ်လို့ ထင်မြင်ယူစရာရှိတဲ့ကိစ္စတွေကို ကုလသမဂ္ဂလုံခြုံရေးကောင်စီ  ပါဝင် ဆောင်ရွက်ခွင့်နိုင်အောင် လုပ်ပိုင်ခွင့်အာဏာပေးဖို့ သတ်မှတ်ထားခြင်းဖြစ်ပါတယ်။

ကုလသမဂ္ဂလုံခြုံရေးကောင်စီဟာ ဂါဇာဒေသစစ်ပွဲနဲ့ပတ်သက်ပြီး အပစ်ခတ်ရပ်စဲရေးဆုံးဖြတ်ချက်တွေကို လက်တွေ့အကောင်ထည်ဖော်ဖို့ လုပ်ဆောင်နိုင်ခြင်းမရှိသေးကြောင်း၊ လုံခြုံရေးကောင်စီအနေနဲ့ ဂါဇာဒေသစစ်ပွဲ မှာ ပါဝင်ဆောင်ရွက်ဖို့ တိုက်တွန်းတောင်းဆိုလိုကြောင်း ဂူတာရက်စ်က သတင်းထုတ်ပြန်ထားပါတယ်။