Pika (NSS) - ဒီဇင်ဘာ ၆ 

အစ္စရေးအစိုးရသည် ပါလက်စတိုင်းနယ်မြေအတွင်း ကုန်ပစ္စည်းများ ခိုးထုတ် (သို့မဟုတ်) တင်သွင်းရန်အတွက် ဟားမက်လက်နက်ကိုင်များ အသုံးပြုနေသည့် ဂါဇာကမ်းမြောင်ဒေသရှိ ဥမင်လှိုဏ်ခေါင်းများ ဖျက်ဆီးရန်အတွက် ပင်လယ်ရေကိုအသုံးပြုရန် စဉ်းစားနေကြောင်း သတင်းရင်းမြစ်များကို ကိုးကားပြီး Wall Street Journal က ဖော်ပြခဲ့သည်။

အစ္စရေးစစ်တပ်သည် ဂါဇာကမ်းမြောင်ဒေသအနောက်မြောက်ပိုင်းရှိ  Al-Shati ဒုက္ခသည်စခန်းနှင့် မနီးမဝေးနေရာ တစ်ခုတွင် ရေလွှမ်းမိုးမှုများဖြစ်ပွားအောင် လုပ်ဆောင်မည့်စနစ်တစ်ခုကို ပြီးခဲ့သည့်နိုဝင်ဘာလလယ်က တပ်ဆင်ခဲ့ ကြောင်း အမေရိကန်အရာရှိများ၏ ပြောကြားချက်အရ သိရသည်၊၊

အဆိုပါစနစ်တွင် မြေထဲပင်လယ်မှ တစ်နာရီလျှင် ရေကုဗမီတာထောင်ချီ စုပ်ယူနိုင်စေမည့် ရေစုပ်စက်(၅)လုံး ပါဝင် ပြီး သီတင်းပတ်အနည်းငယ်အတွင်း ဥမင်လှိုဏ်ခေါင်းများအားလုံးကို ရေလွှမ်းမိုးမှုများဖြစ်ပွားအောင် လုပ်ဆောင် နိုင်ဖွယ်ရှိနေကြောင်း သိရသည်။

ပြီးခဲ့သည့်လတွင် အစ္စရေးအစိုးရသည် ၎င်း၏ မိတ်ဖက်နိုင်ငံဖြစ်သော အမေရိကန်နိုင်ငံကို အဆိုပါအစီအစဉ်အား အကြောင်းကြားခဲ့ပြီး ယင်းအစီအစဉ်က ဖြစ်နိုင်ခြေရှိ/မရှိဆိုသည့်အချက်များအပြင် အားသာချက်နှင့် အားနည်းချက်တို့ကို ငြင်းခုံမှုများရှိခဲ့ကြောင်း WSJ က ဖော်ပြခဲ့သည်။

သို့သော်လည်း အဆိုပါအစီအစဉ်ကို လုပ်ဆောင်ရန် နောက်ဆုံး ဆုံးဖြတ်ချက်များကို မချမှတ်ရသေးကြောင်း နှင့် အစီအစဉ်ကို အကောင်အထည်ဖော်ရန်အတွက် အစ္စရေးက အသင့်ရှိ/မရှိ ဆိုသည့်အချက်တို့ကို လက်ရှိအချိန်အထိ ရှင်းရှင်းလင်းလင်းမသိရှိရသေးကြောင်း အဆိုပါအမေရိကန်အရာရှိများက မှတ်ချက်ပြုပြောခဲ့သည်။ 

အဆိုပါအစီအစဉ်သည် ဟားမက်လက်နက်ကိုင်အဖွဲ့ကို  ကီလိုမီတာရာနှင့်ချီရှည်လျားသော ဥမင်လှိုဏ်ခေါင်းများ အတွင်းမှ မောင်းထုတ်နိုင်ပြီး အချို့သောဥမင်လှိုဏ်ခေါင်းများမှာ အီဂျစ်နိုင်ငံအထိ ရောက်ရှိနိုင်ကြောင်း အစီရင်ခံစာတွင် ဖော်ပြထားသည်။

ဂါဇာကမ်းမြောင်ဒေသအောက်ရှိ ဥမင်လှိုဏ်ခေါင်းများသည် ဟားမက်လက်နက်ကိုင်အဖွဲ့နှင့် ဒေသတွင်း အစ္စလာမ်မစ်လက်နက်ကိုင်အဖွဲတို့ကို ဒုံးကျည်ဖြင့် တိုက်ခိုက်ခြင်းမှ ကာကွယ်ပေးနိုင်ပြီး အစ္စရေး၏ ပိတ်ဆို့မှုများ ကိုလည်း ရှောင်လွှဲမှုများလုပ်စေနိုင်ရန်အတွက် အကူအညီဖြစ်စေကြောင်း သိရသည်။

အချို့ဥမင်လှိုဏ်ခေါင်းများသည် သာမန်လူတစ်ဦးမတ်တပ်ရပ်နိုင်သည့် အမြင့်အထိရှိပြီး ကွန်ကရစ်များဖြင့် တည်ဆောက်ထားခြင်းဖြစ်ကြောင်း သိရသည်။ သို့သော်လည်း အစ္စရေး၏ အစီအစဉ်နှင့်ပတ်သက်ပြီး သံသယများရှိကြောင်း အမေရိကန်အရာရှိအချို့က ပြောခဲ့သည်။ ၎င်းတို့ က "ဒီဥမင်လှိုဏ်ခေါင်းတွေနဲ့ မြေပြင် ပတ်ဝန်းကျင်အခြေအနေတွေကို ဘယ်သူကမှ အသေးစိတ်မသိတာကြောင့် ပင်လယ်ရေတွေကို စုပ်ပြီး ရေလွှမ်းမိုးမှုတွေဖြစ်အောင်လုပ်တာက အောင်မြင်မှာလားဆိုတာ မသေချာသေးပါဘူး"  ဟု ပြောခဲ့သည်။

အစ္စရေး နှင့် ဟားမက်လက်နက်ကိုင်အဖွဲ့ကြားစစ်ပွဲသည် ပြီးခဲ့သည့်အောက်တိုဘာလ(၇)ရက်က စတင်ဖြစ်ပွားခဲ့ ခြင်းဖြစ်ပြီး လက်ရှိအချိန်အထိ အစ္စရေးဖက်မှ လူ(၁)ထောင်ကျော် သေဆုံးခဲ့ကာ ပါလက်စတိုင်းဖက်မှ လူ(၁)သောင်းခွဲကျော် သေဆုံးထားကြောင်း သိရသည်။