မြူနစ် (NSS) - ဒီဇင်ဘာ ၆

နိုင်ငံခြားငွေလဲလှယ်နှုန်းကို ဗဟိုဘဏ်က သတ်မှတ်ပေးတော့မည်မဟုတ်ဘဲ AD လိုင်စင်ရဘဏ်များအနေဖြင့် လွတ်လပ်စွာ ဆောင်ရွက်နိုင်ကြောင်း အသိပေးကြေညာလိုက်သည်။

မြန်မာနိုင်ငံတော်ဗဟိုဘဏ်က ယမန်နေ့(ဒီဇင်ဘာလ ၅ ရက်)တွင် နိုင်ငံခြားငွေလဲလှယ်နှုန်းကိစ္စနှင့်ပတ်သက်၍ လိုင်စင်ရဘဏ်များကို အထက်ပါကဲ့သို့ အသိပေးအကြောင်းကြားခဲ့ခြင်းဖြစ်သည်။

နိုင်ငံခြားသုံးငွေများ ရောင်းဝယ်ဖောက်ကားသည့်လုပ်ငန်း (AD)လိုင်စင်ရဘဏ်များအနေဖြင့် နိုင်ငံခြားငွေကြေးဈေးကွက် (Online Trading)တွင် အရောင်းအဝယ်ပြုလုပ်ရာ၌ ငွေလဲလှယ်နှုန်းကို မြန်မာနိုင်ငံတော်ဗဟိုဘဏ်က သတ်မှတ်ပေးမည် မဟုတ်ကြောင်း အကြောင်းကြားထားသည်။

ထို့ကြောင့် ဈေးကွက်အတွင်း၌ နိုင်ငံခြားငွေရောင်းချလိုသူ နှင့် ဝယ်ယူလိုသူတို့မှတင်သွင်းသော ငွေလဲလှယ်နှုန်းပေါ်မူတည်၍ Market rate အတိုင်း လွတ်လပ်စွာ ဆောင်ရွက်နိုင်ကြောင်း ဗဟိုဘဏ်က ပြောသည်။

သို့သော် ဈေးကွက်အတွင်း ဝယ်ယူရရှိခဲ့သော နိုင်ငံခြားငွေအား ပြည်ပသို့ လွှဲပြောင်းရာတွင် နိုင်ငံခြားသုံးငွေကြီးကြပ်မှုကော်မတီက သတ်မှတ်ထားသည့်လုပ်ထုံးလုပ်နည်းများနှင့်အညီ လွှဲပြောင်းပေးရန်လိုအပ်ကြောင်းလည်း ဗဟိုဘဏ်က ထုတ်ပြန်ထားသည်။

“ဒီလိုဖွင့်ပေးလိုက်တဲ့အတွက် ပို့ကုန်ပိုင်းမှာ များလာနိုင်တယ်။ အဲဒီတော့ export များလာရင်တော့ ဒေါ်လာက ဝင်လာနိုင်တာပေါ့။ ဝင်လာရင်တော့ ပြည်တွင်းမှာ လိုအပ်ချက်အတွက် အထောက်အကူဖြစ်နိုင်တယ်။ အခုလို စက်သုံးပြဿနာတွေ လျော့သွားနိုင်တယ်”ဟု စီးပွားရေးလုပ်ငန်းရှင်တစ်ဦးက NSS ကို သုံးသပ်ပြောကြားသည်။

ဗဟိုဘဏ်အနေဖြင့် ယခုကဲ့သို့ နိုင်ငံခြားငွေလဲလှယ်နှုန်းအား လွတ်လပ်စွာဆောင်ရွက်ခွင့်ပေးခဲ့သည့်အတွက် အကြောင်းအမျိုးမျိုးဖြင့် သိမ်းဆည်းထားသော နိုင်ငံခြားငွေဒေါ်လာသည် ဈေးကွက်အတွင်းသို့ ပြန်လည်ဝင်ရောက် လာနိုင်ကြောင်း လုပ်ငန်းရှင်များက သုံးသပ်ထားသည်။

“ဒေါ်လာကို float လုပ်ပေးလိုက်တဲ့အတွက် ဒီထက်တော့ ပိုကောင်းနိုင်တယ်။ တစ်ပတ်လောက်ဆိုရင်တော့ ထူးခြားသွားမှာပါ။ ဒါပေမယ့် ဒီနေရာမှာ ဘယ်လောက်အထိ float လွတ်လွတ်လပ်လပ်ပေးလုပ်တာလဲ။ သို့တည်းမဟုတ် ဈေးတွေ တက်မှာစိုးလို့ဆိုပြီးတော့ ဘယ်သူက ဘယ်ဈေးနဲ့ ဘာကြောင့်ရောင်းတာလဲဆိုပြီးတော့ ခေါ်စစ်ရင်တော့ ဈေးကွက်က သိပ်မ ကောင်းလှဘူးထင်တယ်။ ဒါကတော့ သူတို့ဘယ်လို ကိုင်တွယ်မလဲတော့ မသိဘူး” ဟု စီးပွားရေးလုပ်ငန်းရှင်တစ်ဦးက  ပြောသည်။

ထို့ပြင် ပို့ကုန်ရငွေ နိုင်ငံခြားငွေများသည်လည်း ပြည်တွင်းသို့ ပိုမိုဝင်ရောက် လာနိုင်သည့်အပြင် ပြည်ပရောက်မြန်မာလုပ်သားများ၏ နိုင်ငံခြားငွေဖြင့် ရရှိသော လစာများသည်လည်း ပိုမိုဝင်ရောက်လာနိုင်သည်ဟု လုပ်ငန်းရှင်များက သုံးသပ်ထားသည်။

နစက၏ ဗဟိုဘဏ်အနေဖြင့် ပြီးခဲ့သောကာလအတွင်း၌ နိုင်ငံခြားငွေလဲလှယ်နှုန်း အမေရိကန်တစ်ဒေါ်လာလျှင် ၂၁၀၀ ကျပ်နှုန်း သတ်မှတ်ခဲ့ပြီး Online Trading ဈေးကွက်တွင် တစ်ဒေါ်လာလျှင် ကျပ် ၂၉၀၀ ကျော်သတ်မှတ်ခဲ့သည်။