ကျော်(NSS) - ဒီဇင်ဘာ ၄

AA အနေဖြင့် ဌာနဆိုင်ရာပိုင်ကား(၉)စီးကို ခြိမ်းခြောက်၍ အဓမ္မယူဆောင်သွားခြင်းသည် ရခိုင်ပြည်သူ များကိုတိုက်ရိုက်စော်ကားခြင်းဖြစ်ကြောင်း နစက ပြောခွင့်ရပုဂ္ဂိုလ် ဗိုလ်ချုပ်ဇော်မင်းထွန်းကပြော သည်။

၎င်းက ယမန်နေ့(ဒီဇင်ဘာလ ၃ ရက်)၊ ညပိုင်းတွင် နိုင်ငံအတွင်း ဖြစ်ပွားနေသောအခြေအနေများနှင့်ပတ်သက်၍ မီဒီယာများကို ရှင်းလင်းပြောကြားရာ၌ အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

AA အဖွဲ့ဝင်များသည် ရခိုင်ပြည်နယ်၊ မြောက်ဦးမြို့၊ ထမ္မရာဇ်ရပ်ကွက်ရှိ ခရိုင်ဖွံ့ဖြိုးမှုကြီးကြပ်ရေးရုံးရှိ ဌာနပိုင်ကား(၂)စီးကို နိုဝင်ဘာလ ၂၆ ရက်၊ ညနေ ၅ နာရီ ၄၀ မိနစ်ခန့်က သေနတ်ပြခြိမ်းခြောက်၍ အဓမ္မယူဆောင်သွားခဲ့ကြကြောင်း ၎င်းကပြောသည်။

ထို့ပြင် နိုဝင်ဘာလ ၂၈ ရက်၊ နေ့လယ် ၁ နာရီခွဲခန့်တွင်လည်း မြောက်ဦးမြို့၊ အလယ်ဈေးရပ်ကွက်ရှိ ရှေးဟောင်းသုတေသနဦးစီးဌာန၊ ကမ္ဘာ့အမွေအနှစ်စီမံခန့်ခွဲရေးရုံးရှိ ဌာနပိုင်ကား(၃)စီးကို သေနတ်ပြခြိမ်းခြောက်၍ အဓမ္မယူဆောင်သွားခဲ့ကြကြောင်း ၎င်းကဆက်လက်ပြောသည်။

ထို့အတူ နိုဝင်ဘာလ ၂၉ ရက်၊ မွန်းတည့် ၁၂ နာရီ ၄၅ မိနစ်ခန့်တွင် မြောက်ဦး-စစ်တွေ ကားလမ်းမကြီးဘေးရှိ မြို့နယ်ကျေးလက်ဖွံ့ဖြိုးရေးဦးစီးဌာနပိုင်ကား(၂)စီးကိုလည်း သေနတ်ပြခြိမ်းခြောက်ကာ အဓမ္မယူဆောင်သွားခဲ့ကြကြောင်း သိရသည်။

ထို့ပြင် နိုဝင်ဘာလ ၃၀ ရက်၊ နံနက် ၈ နာရီ ၄၅ မိနစ်ခန့်တွင်လည်း မြောက်ဦးမြို့၊ ခရိုင်သာသနာရေးဝန်ကြီးဌာနပိုင်ကား(၁)စီး၊ နံနက် ၉ နာရီခွဲခန့်တွင် မြောက်ဦးမြို့ ခရိုင်ရွေးကောက်ပွဲရုံးရှိ ဌာနပိုင်ကား(၁) စီးတို့ကို သေနတ်ပြခြိမ်းခြောက်၍ အဓမ္မယူဆောင်သွားခဲ့ကြကြောင်း နစက၏ သတင်းထုတ်ပြန်ရေးအဖွဲ့မှ သိရသည်။

"ဌာနပိုင်ကား ၉ စီးကို သေနတ်နဲ့ခြိမ်းခြောက်ရယူသွားပြီး သူတို့အဖွဲ့အကျိုးအတွက် အသုံးပြုနေတယ်။ မြောက်ဦးခရိုင်ဆိုတာ ရှေ့ဟောင်းသုတေသနအဖွဲ့ရဲ့ ကမ္ဘာ့အမွေအနှစ်စာရင်းဝင်အောင်လုပ်ဆောင်နေတဲ့နေရာဖြစ်ပါတယ်။ ဒီလုပ်ငန်းတွေကိုလုပ်ဆောင်နေတဲ့ကားတွေကိုယူသွားပြီး အဖွဲ့အကျိုးအတွက်အသုံးချတာ၊ အဖွဲ့အကျိုးအတွက် ဆောင်ရွက်တာဟာ ရခိုင်ပြည်သူ လူထုကို တိုက်ရိုက်ထိပါးစော်ကားခြင်းဖြစ်ပါတယ်"ဟု နစက၏သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကတုံ့ပြန်ပြောကြားထားသည်။

ထိုသို့ AA အဖွဲ့ အဓမ္မယူဆောင်သွားခဲ့သည့် ဌာနဆိုင်ရာပိုင်ကား(၉)စီးပြန်လည်ရရှိရေးနှင့်ဒေသတည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက အကြမ်းဖက်မှုချေမှုန်းမှုများကို ဆက်လက်ဆောင်ရွက်လျက်ရှိကြောင်း သိရသည်။

ရခိုင်ပြည်နယ်အတွင်းရှိ တပ်မတော်စခန်းများနှင့်ရဲတပ်ဖွဲ့စခန်းများအား နိုဝင်ဘာလ ၁၃ ရက်မှစတင်၍ ယနေ့အချိန်အထိ ULA/AA အဖွဲ့က ဝင်ရောက်တိုက်ခိုက်မှုများပြုလုပ်လျက်ရှိသည်။