Pika (NSS) - နိုဝင်ဘာ ၂၉

ထိုင်းနိုင်ငံသည် ၂ဝ၂၃ ခုနှစ် အင်္ဂလိပ်ဘာသာစကားကျွမ်းကျင်မှုညွှန်းကိန်းအရ ကမ္ဘာ့အဆင့်တွင် အဆင့်(၁ဝ၁) နေရာမှာ ရပ်တည်နေပြီး အာဆီယံတွင် အဆင့်(၈)နေရာတွင် ရပ်တည်နေကြောင်း သိရသည်။

ထိုင်းနိုင်ငံ၏ အင်္ဂလိပ်စကားပြောစွမ်းရည်သည် စင်ကာပူ၊ ဖိလစ်ပိုင် နှင့် မလေးရှားနိုင်ငံတို့သာမက ဗီယက်နမ်၊ အင်ဒိုနီးရှား၊ မြန်မာ နှင့် ကမ္ဘောဒီးယားနိုင်ငံတို့ထက်ပင် ကျဆင်းနေကြောင်း အဆိုပါညွှန်းကိန်းထဲတွင် အကြုံပြု ဖော်ပြထားသည်။

အင်္ဂလိပ်ဘာသာစကားကျွမ်းကျင်မှုညွှန်းကိန်း ၂ဝ၂၃ ကို နိုင်ငံနှင့် ဒေသ စုစုပေါင်း(၁၁၃)ခုမှ အရွယ်ရောက်ပြီးသူ (၂ ဒသမ ၂) သန်း၏ စာမေးပွဲရလဒ်များအပေါ် အခြေခံထားကြောင်း သိရသည်။ အဆိုပါညွှန်းကိန်းတွင် ထိုင်းနိုင်ငံက ရမှတ် (၄၁၆)မှတ်ဖြင့် အဆင့်(၁ဝ၁) တွင် ရပ်တည်နေကြောင်း သိရသည်။ 

၂ဝ၂၃ ခုနှစ် အင်္ဂလိပ်ဘာသာစကားကျွမ်းကျင်မှုညွှန်းကိန်းကို ကမ္ဘာတစ်ဝန်းရှိ လူသိများသော အင်္ဂလိပ်စာ သင်ကြားရေးအဖွဲ့အစည်း EF က ပြုလုပ်ခဲ့ခြင်းဖြစ်ကြောင်း သိရသည်။ စင်ကာပူနိုင်ငံသည် ရမှတ်(၆၃၁)မှတ်ဖြင့် အာဆီယံတွင် အဆင့်(၁)နေရာမှာ ရပ်တည်နေပြီး  ကမ္ဘာ့အဆင့်တွင် အဆင့်(၂)နေရာတွင် ရှိနေကြောင်း သိရသည်။ 

ဖိလစ်ပိုင်နိုင်ငံသည် ရမှတ်(၅၇၈)မှတ်ဖြင့် အာဆီယံတွင် အဆင့်(၂)နေရာမှာ ရပ်တည်နေပြီး ကမ္ဘာတစ်ဝန်းတွင် အဆင့်(၂၀)နေရာမှာရှိနေကြောင်း သိရသည်။

မလေးရှားနိုင်ငံသည် ရမှတ်(၅၆၈)မှတ်ဖြင့် အာဆီယံတွင် အဆင့်(၃)နေရာတွင်ရှိနေပြီး ကမ္ဘာတစ်ဝှမ်းတွင် အဆင့်(၂၅) နေရာတွင် ရှိနေသည်။ ထို့အပြင် ဗီယက်နမ်နိုင်ငံသည် ရမှတ်(၅ဝ၅) မှတ်ဖြင့် အာဆီယံတွင် အဆင့်(၄) နေရာမှာ ရပ်တည်နေပြီး ကမ္ဘာတစ်ဝန်းတွင် အဆင့်(၅၈)နေရာမှာ ရှိနေကြောင်း သိရသည်။ အင်ဒိုနီးရှားနိုင်ငံသည် ရမှတ်(၄၇၃)မှတ်ဖြင့် အာဆီယံတွင် အဆင့်(၅)နေရာမှာ ရပ်တည်နေကာ ကမ္ဘာတစ်ဝန်းတွင် အဆင့်(၇၉)နေရာမှာ ရှိနေသည်။

မြန်မာနိုင်ငံသည် ရမှတ်(၄၅ဝ)ဖြင့် အာဆီယံတွင် အဆင့်(၆)နေရာမှာရှိနေပြီး ကမ္ဘာတစ်ဝန်းတွင် အဆင့်(၉၀) နေရာမှာ ရပ်တည်နေကြောင်းလည်း သိရသည်။ ကမ္ဘောဒီးယားနိုင်ငံသည် ရမှတ်(၄၂၁)မှတ်ဖြင့် အာဆီယံတွင် အဆင့်(၇)နေရာမှာ ရှိနေကာ ကမ္ဘာတစ်ဝန်းတွင် အဆင့်(၉၈)နေရာတွင် ရှိနေကြောင်း သိရသည်။

ထိုင်းနိုင်ငံသည် ရမှတ်(၄၁၆)မှတ်ဖြင့် အာဆီယံတွင် အဆင့်(၈)နေရာတွင်ရှိနေကာ ကမ္ဘာတစ်ဝန်းတွင် အဆင့်(၁ဝ၁) နေရာတွင် ရပ်တည်နေကြောင်း သိရသည်။