မြူနစ် (NSS) - နိုဝင်ဘာ ၂၈

ရှမ်းပြည်နယ်၊ မူဆယ် (၁၀၅)မိုင်ကုန်သွယ်ရေးဇုန်အနီးဖြစ်ပွားနေသော တိုက်ပွဲကြောင့် အရပ်သားထိခိုက်သေဆုံးမှု မြင့်တက်လျက်ရှိပြီး ဒေသခံပြည်သူ (၈၀)ရာခိုင်နှုန်းခန့် နေရပ်စွန့်ခွာခဲ့ကြောင်း သိရသည်။

တအာင်းလက်နက်ကိုင် TNLA ပူးပေါင်းအဖွဲ့သည် ကုန်သွယ်ရေးဇုန်အနီးရှိ တပ်မတော်၏ (၁၀၅)မိုင်ဗျူဟာကုန်းစခန်းကို Drop ဗုံးအများအပြားအသုံးပြုကာ ပြီးခဲ့သောရက်ပိုင်းမှစ၍ တိုက်ခိုက်နေခြင်းဖြစ် သည်။

ထိုသို့ တိုက်ခိုက်နေမှုများကြောင့် ဗျူဟာကုန်းစခန်းအနီးရှိ မိုင်းယုကျေးရွာ နှင့် (၁၀၅)မိုင်ကုန်သွယ်ရေးဇုန်အတွင်းသို့ Drop ဗုံးအပါအဝင် လက်နက်ကြီး၊ လက်နက်ငယ်များ ကျရောက်ပေါက်ကွဲမှုများ ရှိခဲ့ကြောင်း သိရသည်။

“အခြေအနေက တော်တော်လေးကို ဆိုးနေတာပါ။ မနေ့ကတည်းက ဒုန်းတွေနဲ့ ဗုံးတွေ တအားပစ်တာ။ ကျွန်မတို့ မိုင်းယုရွာရဲ့ လမ်းဘေးမှာ ကုန်သွယ်ရေးဇုန်ရှိတယ်လေ။ ပြီးတော့ စစ်တပ်ကုန်းရှိတယ်လေ။ အရင်ရက်တွေတုန်းက တောက်လျှောက် ဒရုန်းတွေနဲ့ ဗုံးတွေ တအားပစ်တာပေါ့။ ဗုံးတွေက ကုန်သွယ် ရေးဇုန်ထဲကိုလည်း ကျတယ်။ ကုန်သွယ်ရေးဇုန်မှာလည်း မီးတွေ လောင်တယ်။ မနေ့ကလမ်းမှာ သွားတဲ့လူတွေလည်း သေနတ်တွေ ထိတယ်။ ဘယ်သူက ဘယ်လိုပစ်မှန်းမသိဘူး။ ကျွန်မရဲ့တူလေးလည်း ထိသွားလို့ အခုဆေးရုံရောက်နေတယ်”ဟု မူဆယ်မြို့ခံတစ်ဦးက NSS ကို ပြောသည်။

အဆိုပါတိုက်ပွဲများကြောင့် အရပ်သားထိခိုက်သေဆုံးနေမှုသည် မြင့်တက်လျက်ရှိပြီး မူဆယ်ပြည်သူ့ဆေးရုံးတွင်လည်း ထိခိုက်ဒဏ်ရာရရှိသူ အများအပြားရောက်ရှိနေကြောင်း သိရသည်။

“လူတွေလည်း တအားပဲ ဆေးရုံကို ရောက်နေတာ။ ညကလည်း ရောက်တယ်။ ဆေးရုံရောက်မှ သေသွားတဲ့ လူတွေလည်း ရှိနေတယ်။ ဒီမနက်ဆိုရင်လည်း ဆေးရုံကို လူနာတွေ အများကြီးရောက်လာတယ်။ မနေ့ကဆိုရင်လည်း ကုန်သွယ်ရေးဇုန်နားမှာ ပွဲချင်းပြီး နှစ်ယောက်သေသွားတယ်။ ဆေးရုံရောက်တော့ နောက်တစ်ယောက် ထပ်သေတယ်။ ဒီလိုမျိုးသေနေတာတွေ့တော့ ရင်ထဲမှာ မကောင်းဘူးပေါ့။ ရင်ထဲမှာ ငိုချင်တာပါပဲ။ တစ်ယောက်နဲ့တစ်ယောက် သူတို့ရဲ့ အတ္တတွေ၊ လောဘတွေကြောင့် ပြည်သူတွေ မညှာမတာသေနေရတာ စိတ်မကောင်းဖြစ်တာပေါ့”ဟု မူဆယ်မြို့ခံက ဆက်လက်ပြောသည်။

လက်ရှိတွင် ကုန်သွယ်ရေးဇုန်အနီးရှိ မိုင်းယုကျေးရွာအတွင်းသို့ လက်နက်ကိုင်အဖွဲ့များ ဝင်ရောက်လာကာ မိုင်းထောင်သည်ဟု ယူဆရသည့်အပြုအမူများ ရှိနေကြောင်းလည်း ဒေသခံများကပြောသည်။

ထို့ပြင် ယခုကဲ့သို့ ဖြစ်ပွားနေသည့်တိုက်ပွဲများကြောင့် မူဆယ် (၁၀၅)မိုင်ကုန်သွယ်ရေးဇုန်အပါအဝင် အနီးနားရှိ ကျေးရွာများမှ ဒေသခံပြည်သူ (၈၀)ရာခိုင်နှုန်းခန့်သည် မူဆယ်မြို့သို့ လာရောက်ကာ နေရပ်စွန့်ခွာစစ်ဘေးရှောင်နေရကြောင်း သိရသည်။

“မနေ့ကတော့ (၅၀)(၆၀)ရာခိုင်နှုန်းလောက်တော့ မူဆယ်ကိုထပ်ပြီး ပြောင်းကြတယ်။ ဒီနေ့မှာတော့ တစ်ဖက်အဖွဲ့အစည်းတွေက ရွာနားအထိ ရောက်နေကြတော့ ကျန်တဲ့သူတွေလည်း ပြောင်းကြတယ်။ အကုန်လုံးဆိုရင်တော့ ၈၀ ရာခိုင်နှုန်းလောက် မူဆယ်ကိုပြောင်းရွှေ့သွားကြပါပြီ။ လူဦးရေပမာဏနဲ့ပြောရင်တော့ (၅၀၀၀)အထက်လောက်တော့ရှိပြီ။ စပြီး ဖြစ်ကတည်းက နည်းနည်းစီပြောင်းနေကြတာပေါ့။ တချို့အစောင့်လောက်ပဲကျန်ခဲ့ကြတာပေါ့။ ဗုံးခိုကျင်းတွေရှိတဲ့ အိမ်တွေ၊ RC ရှိတဲ့အိမ်တွေကတော့ မပြောင်းကြဘူး”ဟု မိုင်းယုကျေးရွာခံတစ်ဦးက NSS ကို ပြောသည်။

လက်ရှိတွင် (၁၀၅)မိုင်ကုန်သွယ်ရေးဇုန်အနီးတစ်ဝိုက်၌ တပ်မတော် နှင့် TNLA ပူးပေါင်းအဖွဲ့များကြားတွင် စစ်ရေးဆက်လက်တင်းမာလျက်ရှိကြောင်း ဒေသခံများက ပြောသည်။