Pearl (NSS) - နိုဝင်ဘာ ၂၆

ရန်ကုန်မြို့သို့ ပို့လွှတ်ပေးနေသော သဘာဝဓာတ်ငွေ့ပိုက်လိုင်းကို KNU၊ PDF ပူးပေါင်းအဖွဲ့တို့က မိုင်းထောင် ဖောက်ခွဲခဲ့သဖြင့် လျှပ်စစ်ဓာတ်အား ၅၅ မဂ္ဂါဝပ် လျော့နည်းခဲ့ရကြောင်း နစက ယမန်နေ့ (နိုဝင်ဘာ ၂၅ ရက်) တွင် သတင်းထုတ်ပြန်ထားသည်။ 

ပြီးခဲ့သည့် နိုဝင်ဘာ (၂၃) ရက်၊ ည (၇) နာရီ ၃ဝ မိနစ်ခန့်တွင်    ရန်ကုန်မြို့မှ သဘာဝဓာတ်ငွေ့သုံး လျှပ်စစ် ဓာတ်အားပေးစက်ရုံများသို့ ပို့လွှတ်ရန် သွယ်တန်းထားသည့် သဘာဝဓာတ်ငွေ့ပိုက်လိုင်းအား မွန်ပြည်နယ်၊ သထုံ မြို့နယ်၊ ညောင်ချောင်းကျေးရွာအနီးတွင် အကြမ်းဖက်သမားများက မိုင်းထောင်ဖောက်ခွဲဖျက်ဆီးခဲ့သဖြင့် ပိုက်လိုင်းပေါက်ကွဲပျက်စီးခဲ့ကြောင်း သိရသည်။ 

ပိုက်လိုင်းပေါက်ကွဲပျက်စီးမှုကြောင့် ရန်ကုန်မြို့ရှိ  လှော်ကားဓာတ်အားပေးစက်ရုံသည် ရပ်တန့်ခဲ့ရသဖြင့် ၅၅ မဂ္ဂါဝပ် ဆုံးရှုံးခဲ့ရပြီး ရန်ကုန်တိုင်း နှင့် မွန်ပြည်နယ်၊  ကရင်ပြည်နယ်များရှိ ပြည်သူများအသုံးပြုရန်အတွက်  လျှပ်စစ်ဓာတ်အားကို လျှော့နည်း၍ ဖြန့်ဖြူးခဲ့ရကြောင်း နစကက ဆိုသည်။ 

"ရန်ကုန်ကို ပို့နေတဲ့ သဘာဝဓာတ်ငွေ့များ လျော့နည်းပြီး ရန်ကုန်ကို ပေးပို့နေတဲ့ လျှပ်စစ်ဓာတ်အား ၅၅ မဂ္ဂါဝပ်ခန့် လျော့နည်းခဲ့ကြောင်း တွေ့ရပါတယ်။ အမြန်ပြုပြင်ရေး၊ လုံခြုံရေးဆောင်ရွက်နိုင်ရေး ဆောင်ရွက်လျက်ရှိပါတယ်။ ဒီအကြမ်းဖက်အဖွဲ့တွေအနေနဲ့ ပြည်သူလူထုကို ဖြန့်ဖြူးနေတဲ့ စီးပွားရေးလုပ်ငန်းတွေ၊ အဓိကကျတဲ့ လျှပ်စစ် ဓာတ်အား ကဏ္ဍကို အဓိကထားပြီး နောက်ပိုင်းမှာ တိုက်ခိုက်လာတာရှိပါတယ်" ဟု ဗိုလ်ချုပ်ဇော်မင်းထွန်းက ပြောသည်။

လက်ရှိတွင် ပိုက်လိုင်းပျက်စီးခဲ့သည့်နေရာတစ်ဝိုက်အား လုံခြုံရေးတပ်ဖွဲ့ဝင်များက လိုအပ်သည့် လုံခြုံရေး လုပ်ငန်းများ ဆောင်ရွက်လျက်ရှိပြီး မြန်မာ့ရေနံ နှင့် သဘာဝဓာတ်ငွေ့လုပ်ငန်းဝန်ထမ်းများက ပြန်လည်ပြုပြင်နိုင်ရေး ဆောင်ရွက်လျက်ရှိကြောင်း သိရသည်။ 

အလားတူ မြိုင်ကလေးဓာတ်ငွေ့ထိန်းဖြန့်စခန်းမှတစ်ဆင့် Gas Turbine (သထုံ) သို့ ဓာတ်ငွေ့ပို့လွတ်လျက် ရှိသော   ပိုက်လိုင်းအား  နိုဝင်ဘာ (၁၆) ရက်၊ ညနေ (၃)နာရီခန့်တွင် ကရင်ပြည်နယ်၊ ဘားအံမြို့နယ်၊ ဆယ်မိုင်ကုန်းကျေးရွာ အနီးတွင် အကြမ်းဖက်သမားများက မိုင်းထောင်ဖောက်ခွဲဖောက်ခွဲခဲ့သဖြင့် ပိုက်လိုင်းပေါက်ကွဲမှုဖြစ်ပွားခဲ့ကြောင်း နစကက သတင်းထုတ်ပြန်ထားသည်။ 

အဆိုပါ ပိုက်လိုင်းပေါက်ကွဲမှုကြောင့် Gas Turbine (သထုံ) သည် ရပ်ဆိုင်းခဲ့ရပြီး ရန်ကုန်တိုင်း နှင့်  မော်လမြိုင် မြို့နယ်၊  သထုံမြို့နယ်တို့ရှိ ပြည်သူများထံသို့ လျှပ်စစ်ဓာတ်အားကိုလျော့နည်း၍ ဖြန့်ဖြူးခဲ့ရကြောင်း သိရသည်။ 

ပိုက်လိုင်းပျက်စီးခဲ့သည့်နေရာသို့ တာဝန်ရှိသူများက ပြုပြင်ဆောင်ရွက်ခဲ့ရာ နိုဝင်ဘာ (၁၈) ရက်တွင် ဆောင်ရွက် ပြီးစီးခဲ့သဖြင့်  Gas Turbine(သထုံ) သို့ ဓာတ်ငွေ့များ ပုံမှန်အတိုင်း ပြန်လည်ပို့လွှတ်ဖြန့်ဖြူးနိုင်ပြီဖြစ်ကြောင်း သိရသည်။

"ဒါတွေဟာ ပြည်သူလူထုရဲ့အကျိုးစီးပွားကို တိုက်ရိုက်ထိခိုက်အောင် လုပ်နေခြင်းဖြစ်ပါတယ်။ ဒါတွေကို ပြည်သူ လူထုတစ်ရပ်လုံးက သိရှိပြီး လုံခြုံရေးတပ်ဖွဲ့ဝင်များနဲ့အတူ ပူးပေါင်းပြီး အမြစ်ပြတ်ချေမှုန်းသွားရမှာဖြစ်ကြောင်း ပြောလိုပါတယ် " ဟု  ဗိုလ်ချုပ် ဇော်မင်းထွန်းက ပြောသည်။ 

အကြမ်းဖက်သမားများ၏ စစ်ရေးနှင့်မသက်ဆိုင်သည့် အကြမ်းဖက်လုပ်ရပ်များကြောင့်  ပြည်သူလူထုတို့၏ လူမှုစီးပွားဘဝ များစွာထိခိုက်နစ်နာမှုဖြစ်ပေါ်ခဲ့ရပြီး လုံခြုံရေးတပ်ဖွဲ့ဝင်များအနေဖြင့် ဒေသတည်ငြိမ်အေးချမ်းရေး အတွက် အကြမ်းဖက်မှု ချေမှုန်းရေး စစ်ဆင်ရေးကို ဆက်လက်ဆောင်ရွက်သွားမည်ဖြစ်ကြောင်း သိရသည်။