စော (NSS) - နိုဝင်ဘာ ၂၄

Naypyitaw State Academy ၌ ဆေးသိပ္ပံပညာမဟာဌာနကို စတင်ဖွင့်လှစ်ခဲ့ကြောင်း နစက၏သတင်းအချက်အလက်အရ သိရသည်။

နေပြည်တော်ရှိ Naypyitaw State Academy ၌ ယမန်နေ့(နိုဝင်ဘာလ ၂၃ ရက်)တွင် ဆေးသိပ္ပံပညာမဟာဌာန(Faculty of Medicine)ကို စတင်ဖွင့်လှစ်ခဲ့ခြင်းဖြစ်သည်။

အဆိုပါ ဆေးသိပ္ပံပညာမဟာဌာနကို ပညာရေးဝန်ကြီးဌာန နှင့် ကျန်းမာရေးဝန်ကြီးဌာနတို့ ပူးပေါင်း၍ စတင်ဖွင့်လှစ်ခဲ့ခြင်းဖြစ်ပြီး လက်ရှိတွင် ဆေးပညာပထမနှစ်သင်တန်းကို ကျောင်းသား/ကျောင်းသူ (၃၁) ဦး စတင်တက်ရောက်နေကြောင်း သိရသည်။

အဆိုပါ ဆေးသိပ္ပံပညာမဟာဌာနတွင် ဆေးပညာသင်ကြားရေးပိုင်းအတွက် ခေတ်မီနည်းပညာ နှင့် အရည်အသွေးမြင့်သည့် သင်ထောက်ကူပစ္စည်းများကိုလည်း ဖြည့်ဆည်းပေးထားကြောင်း သိရသည်။

ထို့ပြင် ‌ဆေးလက်တွေ့လေ့လာမှုများအတွက် အတွေ့အကြုံရင့်ကျက်သည့် ဘာသာရပ်ဆိုင်ရာ ပါမောက္ခ/ ဌာနမှူးများ၊ အထူးကုဆရာဝန်ကြီးများက သင်ကြားသွားမည်ဖြစ်ပြီး အဆောင်နေလိုသည့် ကျောင်းသား/ကျောင်းသူများအတွက် အဆောင်များစီစဉ်ထားကြောင်း သိရသည်။

Naypyitaw State Academy ကို မဟာဌာနကြီးခုနစ်ခုဖြင့် ပြီးခဲ့သည့် ၂၀၂၂ ခုနှစ် နိုဝင်ဘာလ (၉)ရက်တွင် ဖွင့်လှစ်ခဲ့ပြီး Comprehensive University အဖြစ် မြန်မာနိုင်ငံတွင် ပထမဦးဆုံး ဖွင့်လှစ်နိုင်ခဲ့သည့် တက္ကသိုလ်ဖြစ်ကြောင်း သိရသည်။

အဆိုပါ မဟာဌာနကြီး ခုနှစ်ခုတွင် ဝိဇ္ဇာပညာမဟာဌာန၊ သိပ္ပံပညာမဟာဌာန၊ စီးပွားရေးပညာမဟာဌာန၊ ဥပဒေပညာမဟာဌာန၊ ဆေးသိပ္ပံပညာမဟာဌာန၊ လူမှုရေးပညာမဟာဌာန၊ အားကစားပညာမဟာဌာနတို့ ပါဝင်ကြောင်း သိရသည်။