သန့်ဇင် (NSS) - နိုဝင်ဘာ ၁၆

ရှမ်းပြည်နယ်(တောင်ပိုင်း)၊ ပင်လောင်းမြို့နယ်တွင် ငွေကျပ်သိန်း(၇၀၀၀)ကျော် တန်ဖိုးရှိ မူးယစ်ဆေးဝါးများအား TOYOTA HIACE ကားပေါ်မှ ဖမ်းဆီးရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ သိရသည်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က ပြီးခဲ့သော(နိုဝင်ဘာလ ၈ ရက်)၊ နံနက် ၉နာရီက ပင်လောင်းမြို့နယ်၊ လိန်းလီကျေးရွာအနီးတွင် အထက်ပါကဲ့သို့ ဖမ်းဆီးရမိခဲ့ခြင်းဖြစ် သည်။

အဆိုပါကျေးရွာအနီးတွင် ပင်လောင်းဘက်မှ တပ်ကုန်းဘက်သို့ မောင်မောင်းဝင်း မောင်းနှင်ကာ ဇေယျာကျော်၊ အာကာမင်းမြတ်ကျော်နှင့် လေးမြင့်တို့ လိုက်ပါလာသည့် TOYOTA HIACE ကားကို ရှာဖွေစစ်ဆေးခဲ့ရာ ငွေကျပ်သိန်း(၇၁၀၀)တန်းဖိုးရှိ စိတ်ကြွရူးသွပ်ဆေးပြား ၁၂ ဒသမ ၇ သိန်း နှင့် အိုက်စ်(မက်သ်အဖက်တမင်း) ၅ ကီလိုတို့ကို ဖမ်းဆီးရမိခဲ့ကြောင်း သိရသည်။

ထို့ပြင် စစ်ဆေးချက်များအရ ညနေ ၅ နာရီတွင် မူးယစ်ဆေးဝါးများသယ်ဆောင်ရာ၌ ပူးပေါင်းပါဝင်သူ မျိုးအောင်(ခ)သီလအား ပဲခူးမြို့၊ ဥဿမြို့သစ်၊ ရပ်ကွက်ကြီး(၇)၊ နွယ်သာကီလမ်းရှိ ၎င်း၏နေအိမ်တွင် ထပ်မံဖမ်းဆီးရမိခဲ့ကြောင်း သိရသည်။

အဆိုပါမူးယစ်ဆေးဝါးများအား ရှမ်းပြည်နယ်မှ သယ်ဆောင်လာကာ မွန်ပြည်နယ်တွင် ရောင်းချသွားမည်ဖြစ်ကြောင်း ဖော်ထုတ်သိရှိခဲ့ရသည်ဟု ထုတ်ပြန်ထားသည်။

ထို့ကြောင့် ၎င်းတို့(၅)ဦးအား သက်ဆိုင်ရာမြို့မရဲစခန်းများတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အမှုဖွင့်အရေးယူထားပြီး ကွင်းဆက်များအား ဖမ်းဆီးရမိရေး စုံစမ်းစစ်ဆေးလျက်ရှိကြောင်း သိရသည်။