မြူနစ် (NSS) - နိုဝင်ဘာ ၁၃

စစ်ကိုင်းတိုင်း၊ အင်းတော်မြို့နယ်ရှိ ပညာရေးဝန်ထမ်း ဆရာ၊ ဆရာမ (၁၀)ဦးထက်မနည်းကို PDF အဖွဲ့ဝင်များက ဖမ်းဆီးထားကြောင်း ပညာရေးဝန်ထမ်းအသိုင်းအဝိုင်းက NP News ကိုပြောသည်။

အင်းတော်မြို့ရှိ အခြေခံပညာကျောင်းများ၌ တွဲဖက်သင်ကြားပေးနေသော မော်လူးဒေသတွင် နေထိုင်သည့် ဆရာမ(၁၃)ဦးသည် ယခုရက်ပိုင်းအတွင်း PDF အဖွဲ့၏ ဖမ်းဆီးခြင်းကိုခံခဲ့ရသည်ဟု အထက်ပါအသိုင်းအဝိုင်းက ‌ပြောသည်။

“အင်းတော်မြို့ပေါ်မှာတွဲထားတဲ့ ဆရာမတွေပါ။ မော်လူးဘက်ကလို့ပြောပါတယ်။ မော်လူးဘက် အပြန်လမ်းမှာ အင်းတော်နဲ့ မော်လူးကြားမှာရှိတဲ့ ပင်ဝယ်ဆိုတဲ့ရွာနားမှာ အဖမ်းခံရတယ်လို့ သိရပါတယ်။ စုစုပေါင်း ဆရာမ(၁၃)ဦး အဖမ်းခံရတာလို့ သိရတယ်”ဟု အင်းတော်မြို့ရှိ ပညာရေးဝန်ထမ်းတစ်ဦးက NSS ကို ပြောသည်။

ထို့ပြင် ကသာမြို့၊ အင်းတော်မြို့နှင့် ဗန်းမောက်မြို့ရှိ ပညာရေးဝန်ထမ်းများအနေဖြင့် စိုးရိမ်မှု၊ မလုံခြုံမှုများနှင့် ရင်ဆိုင်ဖြတ်သန်းနေရလျက်ရှိကြောင်းလည်း ၎င်းက ထပ်မံပြောသည်။

အလားတူ PDF အဖွဲ့သည် အင်းတော်နှင့် ဗန်းမောက်တို့ရှိ ပညာရေးဝန်ထမ်း ဆရာ၊ ဆရာမများကိုလည်း ခြိမ်းခြောက်နေမှုများရှိကြောင်း သိရသည်။

“သတင်းတွေ ထပ်ကြားရတာတော့ မကောင်းဘူး။ အင်းတော်မှာ အဖမ်းခံရတဲ့ ဆရာ၊ ဆရာမစာရင်းက (၃၀)ကျော်သွားပြီလို့လည်း သိရတယ်။ ဗန်းမောက်မှာလည်း Non CDM ဆရာ၊ ဆရာမတွေကို ဖမ်းမယ်သတင်းထွက်နေလို့ တော်တော်များများက နေရာပြောင်းအိပ်နေကြရတယ်”ဟု ဗန်းမောက်မြို့မှ ထွက်ပြေးတိမ်းရှောင်နေရသည့် ကျောင်းဆရာတစ်ဦးက NSS ကို ပြောသည်။

ထိုသို့ ဖမ်းဆီးခံရသည့် ပညာရေးဝန်ထမ်း ဆရာ၊ ဆရာမများ၏ အခြေအနေနှင့်ပတ်သက်၍ နစကဘက်က တစ်စုံတစ်ရာ သတင်းထုတ်ပြန်ပြောခြင်းမျိုး မရှိသေးပေ။

အလားတူ ပြီးခဲ့သော ရက်ပိုင်းအတွင်း၌ စစ်ကိုင်းတိုင်း၊ ကလေးဝမြို့နယ်ရှိ ဆရာမ (၄)ဦးနှင့် အမျိုးသား (၆)ဦးသည်လည်း PDF အဖွဲ့၏ ဖမ်းဆီးခြင်းကို ခံခဲ့ရသည်။

လက်ရှိ နစကအစိုးရလက်ထက်၌ အကြမ်းဖက်သမားများ၏ လုပ်ကြံသတ်ဖြတ်မှုများကြောင့် ပညာရေးဝန်ထမ်း ဆရာ၊ ဆရာမ (၁၀၀)နီးပါးခန့် သေဆုံးခဲ့ရသည်။