သန့်ဇင် (NSS) - နိုဝင်ဘာ ၁ဝ

ရန်ကုန်တိုင်းရှိ မြို့နယ်(၆)ခု၌ စိတ်ကြွရူးသွပ်ဆေးပြားများ နှင့် ဘိန်းဖြူများ ဖမ်းဆီးရမိခဲ့ကြောင်း မြန်မာနိုင်ငံ မူးယစ်ဆေးဝါးတားဆီး နှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။

ပြီးခဲ့သော (နိုဝင်ဘာ ၈ ရက်)၊ ညနေ ၅ နာရီ ၃ဝ မိနစ်တွင် မရမ်းကုန်းမြိုနယ်၊ (၅)ရပ်ကွက်၊ အောင်ဇေယျလမ်းတွင် စတင် ဖမ်းဆီးရမိခဲ့ခြင်းဖြစ်ကြောင်း သိရသည်။

အဆိုပါလမ်းတွင် လမ်းလျှောက်လာသူ ကိုကောင်းမြတ်(၄၃)နှစ်အား မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က စစ်ဆေးရှာဖွေခဲ့ရာ လွယ်အိတ်အတွင်းမှ ငွေကျပ်သိန်း(၁ဝ၆)သိန်းတန်ဖိုးရှိ စိတ်ကြွရူးသွပ်ဆေးပြား(၁ဝ၆ဝဝ) ပြား သိမ်းဆည်းရမိခဲ့ကြောင်း သိရသည်။

ဆက်လက်ဖော်ထုတ်ချက်အရ ညနေ ၄ နာရီ ၄၅ မိနစ်တွင် ကိုမင်းမင်းသန့်(၄၂)နှစ် နှင့် မအိသန္တာဆွေ (၂၂)နှစ် တို့အား  (၅)ရပ်ကွက်တွင် TOYOTA CALDINA ကားတစ်စီး နှင့် ငွေကျပ်(၂၆)သိန်းတန်ဖိုးရှိ စိတ်ကြွရူးသွပ်ဆေးပြား ၂၆ဝဝဝ ပြားတို့ ထပ်မံသိမ်းဆည်းရမိခဲ့ကြောင်း သိရသည်။

ထို့ပြင် ညနေ ၆ နာရီ ၃ဝ မိနစ်တွင် ကိုကောင်းမြတ်ငှားရမ်းနေထိုင်သည့် ကြည့်မြင်တိုင်မြို့နယ်၊ မကျည်းတန်း မြောက်/အရှေ့ရပ်ကွက်၊ ကမ်းနားလမ်းရှိ နေအိမ်တွင်းမှ ကိုမျိုးမင်းထွန်း(ခ)ကိုမျိုး(၄၁)နှစ်နှင့်အတူ နေအိမ် အတွင်းမှ ငွေကျပ်(၄)သိန်းတန်ဖိုးရှိ ဘိန်းဖြူ (၁ဝ)ဂရမ် နှင့် ငွေကျပ်(၈)သိန်း တန်ဖိုးရှိ စိတ်ကြွရူးသွပ် ဆေးပြား(၈ဝဝ)ပြားတို့ ထပ်မံ သိမ်းဆည်းရမိခဲ့ကြောင်း သိရသည်။

အလားတူ ယမန်နေ့(နိုဝင်ဘာ ၉ ရက်) နံနက် ၁၁ နာရီ ၄၅ မိနစ်တွင် မင်္ဂလာတောင်ညွှန့်မြို့နယ်၊ စက်ဆန်း ရပ်ကွက်၊ အထက်ပုဇွန်တောင် လမ်းတွင် စည်သူဝင်း(ခ)စည်သူ(၂၉)နှစ် မောင်းနှင်လာသည့် HARRIER ကားအား စစ်ဆေးရှာဖွေခဲ့ရာ ငွေကျပ်(၃၇၂)သိန်းတန်ဖိုးရှိ အက်တက်စီဆေးပြား ၉၃ဝ ပြား နှင့် ငွေကျပ်(၂၁.၂၅)သိန်း တန်ဖိုးရှိ ကက်တမင်းအလေးချိန် ၄၂.၅ ဂရမ် သိမ်းဆည်းရမိခဲ့ကြောင်း သိရသည်။

ဆက်လက်စစ်ဆေးဖော်ထုတ်ချက်အရ မွန်းလွဲ ၂ နာရီ ၃ဝ မိနစ်တွင် ကမာရွတ်မြို့နယ်၊ (၅)ရပ်ကွက်၊ အောင်ချမ်း သာလမ်းရှိ ၎င်းနေထိုင်သည့် နေအိမ်အတွင်းမှ ငွေကျပ်(၁.၅)သိန်းတန်ဖိုးရှိ ကက်တမင်းအလေးချိန် ၃ ဂရမ်နှင့် ငွေကျပ်(၂၅.၂)သိန်းတန်ဖိုးရှိ Happy Water အလေးချိန် ၈၄ ဂရမ် အား ထပ်မံသိမ်းဆည်းရမိခဲ့ကြောင်း သိရသည်။

အလားတူ မွန်းလွဲ ၁ နာရီ ၃ဝ မိနစ်တွင် သာကေမြို့နယ်၊ ၁ဝ/မြောက်ရပ်ကွက်၊ သန်လျင်ချည်းကပ်လမ်းတွင် လမ်းလျှောက်လာသူ ဇော်ဝင်း(ခ) အိုစမန်အား စစ်ဆေးရှာဖွေခဲ့ရာ ငွေကျပ်(၁၅.၅၅)သိန်း တန်ဖိုးရှိ ဘိန်းဖြူ အလေးချိန် ၄၅ ဂရမ် သိမ်းဆည်းရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးတပ်ဖွဲ့က ဆက်လက်ထုတ်ပြန် ထားသည်။

ထို့နောက် စစ်ဆေးချက်အရ မွန်းလွဲ ၂ နာရီ ၃ဝ မိနစ်တွင် ၎င်းနေထိုင်သည့် သန်လျင်မြို့နယ်၊ သောက်တော်တွင်း ရပ်ကွက်ရှိ နေအိမ်အတွင်းမှ ငွေကျပ်(၃၁.၅)သိန်းတန်ဖိုးရှိ ဘိန်းဖြူအလေးချိန် ၉ဝ ဂရမ် နှင့် ငွေကျပ်သိန်း (၆ဝ) တန်ဖိုးရှိ စိတ်ကြွရူးသွပ်ဆေးပြား ၆ဝဝဝ ပြားတို့ သိမ်းဆည်းရမိခဲ့ကြောင်း သိရသည်။

ထို့ကြောင့် ၎င်းတို့(၆)ဦးအား သက်ဆိုင်ရာနယ်မြေရဲစခန်းများတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အမှုဖွင့် အရေးယူထားပြီး ကွင်းဆက်များအား ဖော်ထုတ်စစ်ဆေးလျက်ရှိကြောင်း မြန်မာနိုင်ငံမူးယစ်ဆေးဝါးတားဆီး နှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။

အဆိုပါမူးယစ်ဆေးဝါးဖမ်းဆီရမိမှုသည် ရန်ကုန်တိုင်းရှိ မရမ်းကုန်းမြို့နယ်၊ ကြည့်မြင်တိုင်မြို့နယ်၊ မင်္ဂလာတောင် ညွှန်မြို့နယ်၊ ကမာရွတ်မြို့နယ်၊ သာကေတမြို့နယ်နှင့် သန်လျင်မြို့နယ်တို့တွင် (၂)ရက်အတွင်း မူးယစ်ဆေးဝါးများ သယ်ဆောင်သည့် ကားများနှင့်အတူ ဖမ်းဆီးရမိခဲ့ခြင်းဖြစ်သည်။