Pika (NSS) - နိုဝင်ဘာ ၁ဝ 

နိုဝင်ဘာလ(၉)ရက် ညက Toulouse အသင်းကို (၃)ဂိုး-(၂)ဂိုးဖြင့် ရှုံးနိမ့်ခဲ့သော ယူရိုပါလိဂ်ပွဲစဉ်ရလဒ်မှာ လီဗာပူးလ်အသင်း နှင့် ထိုက်တန်ကြောင်း လီဗာပူးလ်နည်းပြယာဗင်ကလော့ က ထုတ်ဖော်ပြောခဲ့သည်။ 

သို့သော်လည်း လီဗာပူးလ်အသင်းသည် ယူရိုပါလိဂ်ကစားပွဲ လေးပွဲကစားထားပြီး (၃)ပွဲနိုင် (၁)ပွဲရှုံးကာ ရမှတ်(၉) မှတ်ဖြင့် အုပ်စု E တွင် ထိပ်ဆုံးမှာရပ်တည်နေဆဲဖြစ်ကြောင်း သိရသည်။ 

လီဗာပူးလ်နည်းပြယာဗင်ကလော့ က "Toulouse အသင်းကို ရှုံးနိမ့်မှုက ကျွန်တော်တို့နဲ့ ထိုက်တန်တယ်လို့ ထင်ပါတယ်။ Toulouse အသင်းဟာ ပြတ်သားတဲ့ဆုံးဖြတ်ချက်တွေ အကောင်းဆုံးကစားနိုင်စွမ်းတွေနဲ့ ကျွန်တော် တို့ကို အနိုင်ယူခဲ့တာပါ။ ကျွန်တော်တို့မှာ ဂိုးသွင်းနိုင်ဖို့ အခွင့်အရေးတွေ အများကြီးရခဲ့ပေမယ့် အဲဒါကို ကျွန်တော် တို့ အသုံးမချနိုင်ခဲ့ပါဘူး။ ကျွန်တော်တို့ ဂိုးသွင်းယူနိုင်ခဲ့ခြင်းမျိုး မရှိခဲ့ပါဘူး" ဟု ပြောခဲ့သည်။

လီဗာပူးလ်အသင်းသည် နိုဝင်ဘာလ(၅)ရက်က လူတန်တောင်းအသင်းနှင့်ကစားခဲ့သော ပရီးမီးယားလိဂ်ပွဲတွင် သရေကျခဲ့ပြီးနောက် သီတင်းပတ်တစ်ပတ်အတွင်း နောက်ထပ်စိတ်ပျက်စရာ ရလဒ်များရှိခဲ့သော်လည်း အသင်းကစားသမားများအပေါ် စိတ်ဆိုးဒေါသထွက်ခြင်းမျိုးမရှိကြောင်း ယာဗင်ကလော့ က ပြောခဲ့သည်။

ယာဗင်ကလော့ က "ကျွန်တော် မစိုးရိမ်ပါဘူး။ နောက်ဆုံးမှာတော့ ကျွန်တော်တို့ ပိုမိုကောင်းမွန်လာပြီး အကောင်းဆုံးခြေစွမ်းပြကစားနိုင်ခဲ့ပါတယ်။ အဓိကပြဿနာကတော့ ကစားပွဲအတွင်းမှာ မှန်ကန်တဲ့ ဆုံးဖြတ်ချက် တွေကို ပြတ်ပြတ်သားသား လုပ်ဖို့ပါပဲ။ ဒီလိုပေးခဲ့ရတဲ့ ဂိုးမျိုးတွေ ထပ်ပြီးပေးရအောင် ကျွန်တော်တို့ ဘယ်တော့မှ လုပ်မှာ မဟုတ်ပါဘူး" ဟု ပြောခဲ့သည်။