Pearl (NSS) - အောက်တိုဘာ ၂၅

နိုင်ငံတကာအလယ်တွင် မြန်မာနိုင်ငံ၊ မြန်မာလူမျိုးဟု ဂုဏ်သိက္ခာရှိရှိ ရပ်တည်နိုင်ရေးအတွက် မြန်မာ့အမျိုးသားယဉ်ကျေးမှုကို ဆက်လက်မြှင့်တင်ထိန်းသိမ်းသွားရန် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောကြားသည်။

၎င်းက  အောက်တိုဘာလ(၂၄)တွင် နေပြည်တော်၌ ကျင်းပသော (၂၄) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး ပြိုင်ပွဲဖွင့်ပွဲ အခမ်းအနား၌ အထက်ပါကဲ့သို့ထည့်သွင်းပြောကြားခဲ့ခြင်းဖြစ်သည်။ 

အဆိုပါအခမ်းအနား၌ နစကဥက္ကဋ္ဌက မြန်မာ့ရှေးဟောင်းမြို့ပြနိုင်ငံများမှတွေ့ရသည့် စိတ်ပိုင်း နှင့် ရုပ်ပိုင်းဆိုင်ရာ ယဉ်ကျေးမှု အမွေအနှစ် အထောက်အထားများ၊ စာပေအထောက်အထားများနှင့် အိမ်နီးချင်းနိုင်ငံများ၏ခေတ်ပြိုင်မှတ်တမ်းများ အရ မြန်မာလူမျိုးများသည် သမိုင်းကြောင်းတစ်လျှောက်တွင် ဘာသာတရားဆိုင်ရာအဆုံးအမများ၊ ယဉ်ကျေးမှုထုံးဓလေ့များ၊ အနုသုခုမပညာရပ်များနှင့် ကိုယ်ပိုင်အမျိုးသားယဉ်ကျေးမှုကို ခြေခြေမြစ်မြစ်ထူထောင်ခဲ့ကြပြီး အမျိုးဂုဏ်၊ ဇာတိဂုဏ်မြင့်မားစွာ နေထိုင်ခဲ့ကြသည့် လူမျိုးဖြစ်ကြောင်း ခိုင်မာစွာတွေ့ရှိရသည်ဟု ပြောသည်။ 

မိမိတို့၏ကိုယ်ပိုင်အမျိုးသားယဉ်ကျေးမှုများ မှေးမှိန်ပျောက်ကွယ်သွားပါက အမျိုးသားရေးအားမာန်များ ခန်းခြောက်လာမည်ဖြစ်ပြီး ခန်းခြောက်လာသည်နှင့်အမျှ နိုင်ငံ၏အချုပ်အခြာအာဏာကို နှောင့်ယှက်ထိပါးလာကြမည်ဖြစ်ကြောင်း ၎င်းက ထည့်သွင်းပြောကြားထားသည်။ 

ထို့ပြင် မြန်မာတို့၏ အစဉ်အလာများနှင့် အမျိုးဂုဏ်ဇာတိဂုဏ် ပိုမိုထွန်းတောက်ရေး၊ နိုင်ငံတကာ အလယ်တွင် မြန်မာနိုင်ငံ၊ မြန်မာလူမျိုးဟု ဂုဏ်သိက္ခာရှိရှိရပ် တည်နိုင်ရေးအတွက် အမျိုးသားရေး အသိ ၊ အမျိုးသားရေးသတိမြဲမြံစွာဖြင့် အမျိုးသားယဉ်ကျေးမှုကို ဆက်လက်မြှင့်တင်ထိန်းသိမ်းရန်  ဗိုလ်ချုပ်မှူးကြီး မင်းအောင်လှိုင်က တိုက်တွန်းပြောကြားခဲ့သည်။ 

အလားတူ တိုင်းတစ်ပါးယဉ်ကျေးမှုများ ထိုးဖောက်ဝင်ရောက်လာမှုအန္တရာယ်ကို ခုခံကာကွယ်ရန် နှင့် ဘိုးဘွားတို့၏ ယဉ်ကျေးမှုအမွေအနှစ်များကို လက်ဆင့် ကမ်းအမွေဆက်ခံမည့် မျိုးဆက်သစ်လူငယ်များ အမျိုးသားရေးစိတ်ဓာတ် ကိုယ်ခံအားခိုင်မာစေရန် အပါအဝင် မြန်မာနိုင်ငံတော်ကြီး ကမ္ဘာတည်သရွေ့ ဝင့်ထည်စွာတည်တံ့စေရေးအတွက်ဦးတည်ပြီး အမျိုးသားယဉ်ကျေးမှုအဆင့်အတန်း မြင့်မားရေးအတွက် အနုပညာစွမ်းအားဖြင့် ဖော်ထုတ်ထိန်းသိမ်းမြှင့်တင်ရန် ၎င်းက တိုက်တွန်းမေတ္တာရပ်ခံထားသည်။ 

နိုင်ငံတိုင်း၌ ကိုယ်ပိုင်အမျိုးသားယဉ်ကျေးမှု စရိုက်လက္ခဏာများ၊ အမျိုးသားရေးစံနှုန်းများနှင့် အနှစ်သာရများ ပျောက်ကွယ်သွားခြင်းမရှိရန်  နှင့် အမျိုးသားရေးစိတ်ဓာတ်ခိုင်မြဲရန်ထိန်းသိမ်းလျက်ရှိပြီး မြန်မာနိုင်ငံအနေဖြင့်လည်း နိုင်ငံနှင့်လူမျိုးတို့၏ ကောင်းမြတ်သည့်ဂုဏ်ဒြပ်နှင့်အစဉ်အလာ၊ အမျိုးသားရေးစံနှုန်းများကိုတည်တံ့စေရန် အမျိုးသားယဉ်ကျေးမှုအမွေအနှစ်များ ဖော်ထုတ်ထိန်းသိမ်းမြှင့်တင်ရေးများကို နိုင်ငံတော်က အလေးထား ဆောင်ရွက်လျက်ရှိကြောင်း သိရသည်။