Pika (NSS) - အောက်တိုဘာ ၂၂

အစ္စရေးနှင့် ဟားမက်လက်နက်ကိုင်အဖွဲ့တို့ကြားဖြစ်ပွားနေသောစစ်ပွဲသည် ဒေသတွင်းရှိအခြားနိုင်ငံများအထိ ပျံ့နှံ့လာပါက  နိုင်ငံတကာဈေးကွက်သို့ အရှေ့အလယ်ပိုင်းဒေသမှ ရေနံထောက်ပံ့ပေးမှုများ ပြတ်တောက်သွားနိုင်ကြောင်း အီရတ်ဝန်ကြီးချုပ် Mohammed Shia al-Sudani က သတိပေးပြောဆိုခဲ့သည်။

Mohammed Shia al-Sudani က "အစ္စရေး-ဟားမက်စစ်ပွဲဟာ ကမ္ဘာ့လုံခြုံရေးကို ထိခိုက်စေခြင်း၊ ဒေသအတွင်း ပဋိပက္ခကို တိုးမြင့်လာစေခြင်း၊ စွမ်းအင်ထောက်ပံ့မှုကို ထိခိုက်စေခြင်းနဲ့ စီးပွားရေးအကျပ်အတည်းကို ဆိုးဝါး လာစေမယ့်အပြင် နောက်ထပ်ပဋိပက္ခတွေကိုလည်း ဖြစ်ပွားစေနိုင်ပါတယ်" ဟု ပြောခဲ့သည်။

အစ္စရေး-ဟားမက်စစ်ပွဲကို ရပ်တန့်ရန်အတွက် အပစ်အခတ် ချက်ချင်းရပ်စဲရေး နှင့် အကျဉ်းသားလဲလှယ်ခြင်းများ ကို လုပ်ဆောင်ရန် Mohammed Shia al-Sudani က တောင်းဆိုခဲ့ကြောင်း သိရသည်။ Mohammed Shia al-Sudani သည် အစ္စရေး၏ ဗုံးကြဲတိုက်ခိုက်မှုများအတွင်း ဂါဇာကမ်းမြောင်ဒေသမှ အရပ်သားများကို ခေါ်ယူပေးရန် ငြင်းဆိုခဲ့ကြောင်းလည်း သိရသည်။

၎င်းက "ပါလက်စတိုင်းတွေမှာ အခြားနေစရာနေရာမရှိပါဘူး၊၊ ဒါဟာ သူတို့ရဲ့မြေပါပဲ" ဟု ပြောခဲ့သည်။ ပါလက်စတိုင်းနယ်မြေတွင် အစ္စရေး၏ အခြေချရေးမူဝါဒများကို ဆန့်ကျင်သည့် ကုလသမဂ္ဂလုံခြုံရေးကောင်စီ၏ ဆုံးဖြတ်ချက်များကို လေးစားလိုက်နာပါက လက်ရှိဖြစ်ပွားနေသောပဋိပက္ခကို ရှောင်ရှားနိုင်မည်ဖြစ်ကြောင်း Mohammed Shia al-Sudani က အကြုံပြုပြောခဲ့သည်။

သို့သော်လည်း အစ္စရေးသည် ဂါဇာကမ်းမြောင်ဒေသရှိ ၎င်း၏ အခြေချမှုများကို ၂ဝဝ၅ ခုနှစ်တွင် ဖျက်သိမ်းခဲ့ ကြောင်းသိရသည်။ ဟားမက်လက်နက်ကိုင်အဖွဲ့သည် ဂါဇာကမ်းမြောင်ဒေသကို ၂ဝဝ၆ ခုနှစ်ကတည်းက ထိန်းချုပ် ထားခဲ့ပြီး အဆိုပါအချိန်မှစတင်ကာ ဂါဇာကမ်းမြောင်ဒေသတွင် ရွေးကောက်ပွဲအသစ်များ ကျင်းပခဲ့ခြင်းမျိုး မရှိခဲ့ ကြောင်း သိရသည်။

ဂါဇာကမ်းမြောင်ဒေသကို အစ္စရေးမြေပြင်ထိုးစစ်ဆင်မှုများအား လက်တုံ့ပြန်သည့်အနေဖြင့် အရှေ့အလယ်ပိုင်း ဒေသနိုင်ငံများသည် အနောက်အုပ်စုနိုင်ငံများသို့ ရေနံတင်ပို့မှုများ ဖြတ်တောက်နိုင်သည်ဆိုသည့် စိုးရိမ်မှုများရှိနေ သည့်အချိန်တွင် Mohammed Shia al-Sudani ၏ သတိပေးချက်ထွက်ပေါ်လာခြင်းဖြစ်သည်။

အောက်တိုဘာလ(၁၈)ရက်တွင် အီရန်နိုင်ငံခြားရေးဝန်ကြီး Hossein Amir-Abdollahian သည် အစ္စရေးနိုင်ငံအပေါ် ရေနံတင်ပို့မှုများကို ရပ်တန့်ရန် မွတ်စလင်နိုင်ငံများကိုတောင်းဆိုခဲ့ပြီး စွမ်းအင်ဈေးကွက်ကို ဝေဖန်ပြောဆိုမှုများ လုပ်ဆောင်ခဲ့ကြောင်းလည်း သိရသည်။

နိုင်ငံတကာစွမ်းအင်အေဂျင်စီအမှုဆောင်ဒါရိုက်တာ Fatih Birol က "နိုင်ငံတကာရေနံဈေးကွက်တွေဟာ မတည်မငြိမ်ဖြစ်နေပါတယ်။ ပြီးတော့ အစ္စရေး-ဟားမက်စစ်ပွဲကြောင့် ရေနံဈေးနှုန်းတွေလည်း မြင့်တက်လာနိုင်ပါ တယ်။ ဒါဟာ ငွေကြေးဖောင်းပွမှုတွေအတွက် သတင်းဆိုးတစ်ခုပါပဲ။ သွင်းကုန်ရေနံစိမ်းနဲ့ ရေနံထွက်ကုန်တွေ အပေါ် မှီခိုနေရတဲ့ဖွံ့ဖြိုးဆဲနိုင်ငံတွေဟာ ထိခိုက်မှုအများဆုံးဖြစ်လာမှာပါ" ဟု ပြောခဲ့သည်။

နိုင်ငံတကာရေနံဈေးကွက်စံချိန်မှီ Brent ရေနံစိမ်းသည် လက်ရှိအချိန်တွင် တစ်စည်ကို အမေရိကန်ဒေါ်လာ (၉၃) ဒေါ်လာထိမြင့်တက်နေကြောင်း အစ္စရေးနှင့် ဟားမက်တို့စစ်ပွဲစတင်ခဲ့သည့်  အောက်တိုဘာလ(၇)ရက် မတိုင်မီက Brent ရေနံစိမ်းတစ်စည်ကို အမေရိကန်ဒေါ်လာ(၈၅)ဒေါ်လာသာ ရှိကြောင်း သိရသည်။