ပုံစာ - တိုက်ပွဲဖြစ်ပွားမှုကြောင့် ပျက်စီးမှုများဖြစ်ပေါ်နေသော ချပ်သင်းကျေးရွာအတွင်းရှိ လူနေအိမ်များကို တွေ့ရစဉ်

မြူနစ် (NSS) - အောက်တိုဘာ ၂၁

ကန့်ဘလူမြို့နယ်၊ ကူတောင်ဘုန်းကြီးကျောင်းရှိ ဆန်၊ ဆီ၊ စားနပ်ရိက္ခာနှင့် ဆိုင်ကယ်များကို PDF အဖွဲ့ဝင်များက အတင်းအဓမ္မ ယူဆောင်သွားကြောင်း ဒေသခံများထံမှ သိရသည်။

လူအင်အား(၂၀)ခန့်ရှိသော PDF အဖွဲ့ဝင်များသည် ယနေ့(အောက်တိုဘာလ ၂၁ ရက်)၊ နံနက် ၉ နာရီအချိန်ခန့်တွင် စစ်ကိုင်းတိုင်း၊ ကန့်ဘလူမြို့နယ်၊ ချပ်သင်းကျေးရွာရှိ ကူတောင်ဘုန်းကြီးကျောင်းသို့ လာရောက်ခဲ့ကြောင်း သိရသည်။

ထိုသို့လာရောက်ပြီးနောက် ဆွမ်းစားကျောင်းဆောင်အတွင်းရှိ ဆန်၊ ဆီ၊ ဆပ်ပြာများနှင့် ဆိုင်ကယ်များကို အတင်းအဓမ္မယူ ဆောင်သွားခဲ့ကြောင်း သိရသည်။

“ဆိုင်ကယ်လည်း အနည်းဆုံး အစီး(၃၀)လောက်ပါတယ်။ ဆပ်ပြာ၊ ဆန်၊ ဆီကလည်း လှည်း(၂)စီးတိုက်စာလောက် ပါသွားတယ်။ ဆန်က အိတ်အားဖြင့် ပြောရမယ်ဆိုရင်တော့ (၁၅)အိတ်၊ အိတ်(၂၀)လောက် ယူသွားတာပေါ့။ အတင်း အဓမ္မနိုင်ထက်စီးနင်းလုပ်ပြီး ယူသွားတာပေါ့” ဟု ချပ်သင်းကျေးရွာဒေသခံတစ်ဦးက NSS ကို ပြောသည်။

အဆိုပါ ဆန်၊ ဆီအပါအဝင် စားနပ်ရိက္ခာများကို PDF အဖွဲ့ဝင်များက လှည်းတစ်စီးဖြင့် (၂)ကြိမ်တိတိ သယ်ဆောင်ကာ ယူဆောင်သွားခြင်းဖြစ်ပြီး လှည်းနှင့် နွား(၂)ကောင်ကိုလည်း ပြန်လည်ပို့ပေးခြင်း မရှိသေးကြောင်း ဒေသခံများက ထပ်မံပြောသည်။

ထို့ပြင် PDF အဖွဲ့ဝင်များသည် ချပ်သင်းကျေးရွာအတွင်းရှိ ပြည်သူလူထုကိုလည်း (၃)ရက်အတွင်း ရွာထဲမှထွက်ခွာသွားရန် ခြိမ်းခြောက်ပြောဆိုမှုများ ရှိခဲ့သည်ဟု ဒေသခံများက ပြောသည်။

“ရပ်ကွက်အတွင်းမှာ ရှိတဲ့လူထုတွေကို (၃)ရက်အတွင်းထွက်။ (၃)ရက်အတွင်း မထွက်ရင် အသက်တာဝန်မယူဘူး ပြောသွားတယ်။ ရပ်ကွက်ထဲက လူတွေကို ခေါ်ပြီးတော့ အဲဒီလို ပြောသွားတယ်။ ဖမ်းဆီးခေါ်ဆောင်သွားတာမျိုးတော့ မရှိဘူး”ဟု ချပ်သင်းရွာခံတစ်ဦးက ပြောသည်။

ချပ်သင်းကျေးရွာ၊ ကူတောင်ဘုန်းကြီးကျောင်းရှိ စားနပ်ရိက္ခာများကို ကံကြီးရွာမှ PDF ခေါင်းဆောင် ကိုကံမြင့်က ဦးဆောင်ကာ ၎င်း၏အဖွဲ့ဝင်များနှင့်အတူ အတင်းအဓမ္မယူဆောင်သွားခဲ့ခြင်းဖြစ်ကြောင်း ဒေသခံများက ဆက်လက်ပြောသည်။

အဆိုပါ ချပ်သင်းကျေးရွာတွင် လုံခြုံရေးစခန်းတစ်ခုရှိသော်လည်း ကျေးရွာနေပြည်သူများ၏ အသက်အိုးအိမ်စည်းစိမ်ကို အကာအကွယ်ပေးနိုင်ခြင်းမရှိကြောင်းလည်း ဒေသခံများက ဝေဖန်ထားသည်။

အလားတူ လွန်ခဲ့သော သြဂုတ်လ ၂၈ ရက်တွင်လည်း စစ်ကိုင်းတိုင်း၊ ကလေးဝမြို့နယ်၊ သစ္စာပန်းတောင်းကျေးရွာအနီးရှိ မဟာမြိုင်တောရဘုန်းကျောင်းကြီးမှ ဆွမ်းဆန်နှင့် စားနပ်ရိက္ခာများကို PDF အဖွဲ့ဝင်များက ကုန်ကား(၂)စီးဖြင့် အတင်းအဓမ္မယူဆောင်လုယက်သည့်ဖြစ်စဉ် ဖြစ်ပွားခဲ့ဖူးသည်။