Pika (NSS) - အောက်တိုဘာ ၁၉

တူရကီနိုင်ငံတွင် အစ္စရေး-ဟားမက်စ်စစ်ပွဲနှင့်ဆက်စပ်သည့် ဆန္ဒပြပွဲများ သီတင်းပတ်များစွာ ဖြစ်ပွားနိုင်ခြေရှိသည်ဆိုသည့် ခန့်မှန်းချက်များနှင့်အတူ အမေရိကန်အစိုးရသည် တူရကီနိုင်ငံတောင်ပိုင်းရှိ ၎င်း၏ ကောင်စစ်ဝန်ရုံးကို အကန့်အသတ်မရှိ ပိတ်ပစ်လိုက်ပြီဖြစ် ကြောင်းသိရသည်။

တူရကီရှိ အမေရိကန်သံရုံးက "နောက်ထပ်သတိပေးချက်တွေ မရမချင်း Adana မြို့မှာရှိတဲ့ ကောင်စစ်ဝန်ရုံးကို ပိတ်ထားမှာပါ။ အဲဒီဒေသကို သွားရောက်လည်ပတ်တာမျိုးတွေ ရှောင်ရှားဖို့ အမေရိကန်နိုင်ငံသားတွေကို တိုက်တွန်းထားပါတယ်။ တူရကီမှာ အစ္စရေး-ဟားမက်စစ်ပွဲနဲ့ပတ်သက်တဲ့ ဆန္ဒပြပွဲတွေဟာ သီတင်းပတ်များစွာကြာအောင် ဖြစ်ပွားလာနိုင်ဖွယ်ရှိတယ်လို့ ကျွန်တော်တို့ ခန့်မှန်းထားပါတယ်။ ငြိမ်းချမ်းမှုတွေရစေဖို့ ရည်ရွယ်ပြီး လုပ် ဆောင်တဲ့ ဆန္ဒပြပွဲတွေဟာ အကြမ်းဖက်မှုတွေကို ဖြစ်ပွားလာစေနိုင်ပါတယ်။ ဆန္ဒပြပွဲတွေကြောင့် ရဲတပ်ဖွဲ့ဝင်တွေပိုမိုများပြားလာတာမျိုးတွေ၊ လမ်းပိတ်ဆို့တာမျိုးတွေနဲ့ ယာဉ်ကြောပိတ်ဆို့မှုတွေလည်းဖြစ်လာနိုင်ပါတယ်"ဟု ထုတ်ပြန်ထားသည်။

ယခုလအစောပိုင်းတွင် အစ္စရေးနှင့်ဟားမက်စ်အဖွဲ့ကြား စစ်ပွဲစတင်ဖြစ်ပွားခဲ့ပြီးနောက် ကမ္ဘာတစ်ဝှမ်းရှိ မြို့များတွင် ဆန္ဒပြပွဲများ စတင်ဖြစ်ပွားခဲ့ခြင်းဖြစ်ကြောင်းသိရသည်။ ပါလက်စတိုင်းနယ်မြေရှိ ဆေးရုံတစ်ရုံ ဗုံးကြဲတိုက်ခိုက်ခံရကာ အနည်းဆုံးလူ(၅၀၀)ဦးသေဆုံးပြီးနောက် မွတ်စလင်အများဆုံးနေထိုင်သော နိုင်ငံများတွင် ဆန္ဒပြမှုများ ပိုမိုပြင်းထန်လာခဲ့ကြောင်းသိရသည်။ ဆေးရုံအား ဗုံးကြဲတိုက်ခိုက်ခဲ့ခြင်းကို အစ္စရေးဘက်ကလုပ်ဆောင်ခဲ့ခြင်းဖြစ်ကြောင်း ဂါဇာကမ်းမြောင်ဒေသတာဝန်ရှိသူများကပြောကြားခဲ့သလို အဆိုပါဆေးရုံကို ဟားမက်စ်စစ်သွေးကြွအဖွဲ့က ဒုံးကျည်ဖြင့် ပစ်ခတ်တိုက်ခိုက်ခဲ့ခြင်းဖြစ်ကြောင်း အစ္စရေးဘက်က ပြန်လည်စွပ်စွဲပြောဆိုခဲ့သည်။

လက်ဘနွန်၊ ဂျော်ဒန်နှင့် အီဂျစ်နိုင်ငံတစ်ဝှမ်းရှိ မြို့များအပြင် တူရကီမြို့များဖြစ်သော အစ္စတန်ဘူလ်၊ မာလာတီယာ၊ Gaziantep နှင့် Kayseri မြို့များတွင်လည်း ဆန္ဒပြပွဲများ ဖြစ်ပွားခဲ့ကြောင်းသိရသည်။ လက်ဘနွန်နိုင်ငံ Beirut မြို့တွင် ဆန္ဒပြသူများသည် အမေရိကန်၏ သံတမန်မစ်ရှင်တစ်ခုကို ဝင်ရောက်စီးနင်းမှုများလုပ်ဆောင်ခဲ့ပြီး ရဲများနှင့်ထိပ်တိုက်တွေ့ဆုံမှုများဖြစ်ပွားခဲ့ကြောင်းသိရသည်။ အီဂျစ်နိုင်ငံ ကိုင်ရိုမြို့ရှိ အမေရိကန်သံရုံးသည် ၎င်း၏ နိုင်ငံသားများကို စုဝေးခြင်းများ မပြုလုပ်ရန်နှင့် ကိုယ်ရေးကိုယ်တာအချက်အလက်များကို ထုတ်ဖော်ပြသခြင်းမျိုး မပြုလုပ်ရန် သတိပေးထားကြောင်းသိရသည်။