Pika (NSS) - အောက်တိုဘာ ၁၁ 

ထိုင်းနိုင်ငံ ဘန်ကောက်မြို့ရှိ နေအိမ်တစ်ခုတွင် နေထိုင်သော ဒိန်းမတ်နိုင်ငံဆိုင်ရာ ထိုင်းသံအမတ်ကြီးဟောင်းကို သတ်ကာ ထွက်ပြေးတိမ်းရှောင်နေသော မြန်မာနိုင်ငံသားကို ဖမ်းဆီးရာတွင် ကူညီပေးရန် မြန်မာအာဏာပိုင်များကို ထိုင်းလူဝင်မှုကြီးကြပ်ရေးရဲတပ်ဖွဲ့က  တောင်းဆိုခဲ့ကြောင်း သိရသည်။

အသက်(၆၃)နှစ်အရွယ်ရှိ ထိုင်းသံအမတ်ကြီးဟောင်း Vichit Chitvimarn ကို သတ်ဖြတ်ခဲ့သည့် အသက်(၁၉)နှစ် အရွယ်ရှိ စိုင်းမြတ်မိုးကို ရာဇဝတ်တရားရုံးက ဖမ်းဝရမ်းထုတ်ထားကြောင်းလည်း သိရသည်။ စိုင်းမြတ်မိုးသည် ချင်းရိုင်ပြည်နယ်ရှိ  မယ်ဆိုင်နယ်စပ် စစ်ဆေးရေးဂိတ်ကို ဖြတ်ကာ မြန်မာနိုင်ငံတွင်းသို့ထွက်ပြေးခဲ့ပြီးနောက် ၎င်း၏ မွေးရပ်မြေဖြစ်သည့် ရန်ကုန်မြို့သို့ သွားမည့် လေယာဉ်လက်မှတ်ကိုဝယ်ယူခဲ့ကြောင်း ချင်းရိုင်လူဝင်မှုကြီး ကြပ်ရေးရုံးအကြီးအကဲ Khemmachart Wattananaphakasem က ပြောကြားခဲ့သည်။

စိုင်းမြတ်မိုးအား ရှာဖွေဖမ်းဆီးနိုင်ရန်အတွက် မြန်မာနိုင်ငံရှိ တာဝန်ရှိသူများထံမှ ပူးပေါင်းဆောင်ရွက်မှုများကို တောင်းခံထားကြောင်း Khemmachart Wattananaphakasem က ပြောခဲ့သည်။ စိုင်းမြတ်မိုးသည်  Vichit Chitvimarn ကို ဓါးဖြင့် ထိုးသတ်ခဲ့ပြီးနောက် ချင်းရိုင်ပြည်နယ်သို့ ထွက်ပြေးသွားခဲ့ပြီး စက်တင်ဘာလ (၂၉)ရက် တွင် မယ်ဆိုင်နယ်စပ်စစ်ဆေးရေးဂိတ်ကိုဖြတ်ကာ မြန်မာနိုင်ငံ တာချီလိတ်မြို့သို့ ထွက်ပြေးသွားခဲ့ခြင်းဖြစ် ကြောင်း သိရသည်။ 

လုံခြုံရေးကင်မရာမှတ်တမ်းများအရ စိုင်းမြတ်မိုးသည် စက်တင်ဘာလ(၂၉)ရက် နံနက်(၆)နာရီ (၅၅)မိနစ်တွင် မယ်ဆိုင်မြို့သို့ ရောက်ရှိလာသည့် Bangkok-Nan ဘတ်စ်ကားတစ်စီးဖြင့် လိုက်ပါလာခဲ့ခြင်းဖြစ်ကြောင်း သိရသည်။ 

ထို့နောက် ၎င်းသည် နံနက်(၇)နာရီ (၁၂)မိနစ်တွင် မော်တော်ဆိုင်ကယ်အငှားယာဉ်ဖြင့် နယ်စပ်စစ်ဆေးရေးဂိတ်ကို ဖြတ်ကာ မြန်မာနိုင်ငံသို့ ထွက်ပြေးသွားခဲ့ခြင်းဖြစ်ကြောင်း ထိုင်းရဲတပ်ဖွဲ့က ပြောကြားခဲ့သည်။ မယ်ဆိုင်မြို့ ကားဂိတ် မှ အသက်(၃၂)နှစ်အရွယ်ရှိ မော်တော်ဆိုင်ကယ်အငှားယာဉ်မောင်း သီယာဖန်က ၎င်းသည် အဆိုပါ မြန်မာနိုင်ငံသားကို Mae Sai တံတားအမှတ်(၁)ရှိ နယ်စပ်စစ်ဆေးရေးဂိတ်သို့ ပို့ဆောင်ပေးခဲ့ခြင်းဖြစ်ကြောင်း ပြောခဲ့သည်။

သီယာဖန် က "ယာဉ်စီးခဘတ်(၆ဝ)နဲ့ ကျွန်တော်သူ့ကို နယ်စပ်စစ်ဆေးရေးဂိတ်ကို ပို့ပေးခဲ့တာပါ။ အဲဒီ အမျိုးသား က စကားတစ်ခွန်းမှ မပြောခဲ့တဲ့အတွက်လည်း သံသယအနည်းငယ်တော့ဖြစ်ခဲ့ပါတယ်" ဟု ပြောခဲ့သည်။