ဂျန်ဇက် (NSS) - အောက်တိုဘာ ၁ဝ

လက်ဘနွန်အခြေစိုက်ဟစ်ဘိုလာအဖွဲ့ဟာ အစ္စရေးရဲ့အမြှောက်များနဲ့ပစ်ခတ်မှုကြောင့်  အဖွဲ့ဝင်သုံးဦး သေဆုံးခဲ့ပြီးနောက် အစ္စရေးနိုင်ငံမြောက်ပိုင်းကို ရောကက်ဒုံးကျည်များနဲ့ အောက်တိုဘာ ၉ ရက်က ထပ်မံပစ်ခတ်တိုက်ခိုက်ခဲ့ကြောင်း သိရပါတယ်။

ဟစ်ဘိုလာအဖွဲ့ရဲ့ပစ်ခတ်မှုတွေကြောင့် လက်ရှိအချိန်မှာ အစ္စရေးနဲ့ ပါလက်စတိုင်းလက်နက်ကိုင်အဖွဲ့ ဟာမက်ကြားဖြစ်ပွားနေတဲ့စစ်ပွဲ ပိုမိုကျယ်ပြန့်လာဖွယ်ရှိနေကြောင်း သိရပါတယ်။ အီရန်နိုင်ငံ အထောက်အပံ့ရထားတဲ့ ဟစ်ဘိုလာအဖွဲ့ နဲ့ အစ္စရေးနိုင်ငံကြား ၂ဝဝ၆ ခုနှစ်က လနဲ့ချီပြီး စစ်ပွဲဖြစ်ပွားခဲ့ဖူးကြောင်း သိရပါတယ်။

ပါလက်စတိုင်းအခြေစိုက်ဟာမက်အဖွဲ့ဟာလည်း အီရန်ကျောထောက်နောက်ခံပေးထားတဲ့ လက်နက်ကိုင်အဖွဲ့ဖြစ် ကြောင်း သိရပါတယ်။ ဟစ်ဘိုလာအဖွဲ့က ၎င်းတို့အနေနဲ့ အောက်တိုဘာ ၉ ရက်မှာ Galilee အရပ်ဒေသရှိ အစ္စရေး စစ်အခြေစိုက်စခန်းနှစ်ခုကို ရောကက်ဒုံးကျည်တွေနဲ့ ပစ်ခတ်တိုက်ခိုက်ခဲ့ကြောင်း သတင်းထုတ်ပြန်ထားပါတယ်။ အစ္စရေးစစ်ဘက်ကလည်း လက်ဘနွန်နိုင်ငံထဲကနေ အစ္စရေးပိုင်နက်ထဲကို ရော့ကတ်၊ မော်တာတွေနဲ့ ပစ်ခတ်တိုက်ခိုက်မှုတွေ ရှိခဲ့ပေမယ့် ဒဏ်ရာရသူမရှိခဲ့ကြောင်း ပြောပါတယ်။

အောက်တိုဘာလ ၇ ရက်မှာ အစ္စရေးနဲ့ ပါလက်စတိုင်းစစ်ပွဲ စတင်ခဲ့ပြီးနောက် မကြာမီ ဟစ်ဘိုလာလက်နက်ကိုင်အဖွဲ့တွေဟာ အစ္စရေးပိုင်နက်ဘက်ကို ရော့ကတ်ဒုံးကျည်တွေနဲ့ ပစ်ခတ်တိုက်ခိုက်ခဲ့ရာ အစ္စရေးဘက်က လက်တုံ့ပြန်တိုက်ခိုက်မှုတွေ ရှိခဲ့ဖူးကြောင်း သိရပါတယ်။ အစ္စရေးစစ်ဘက်က နယ်စပ်ဖြတ်ကျော်ဖို့ ကြိုးပမ်းတဲ့ဟစ်ဘိုလာလက်နက်ကိုင်အဖွဲ့ဝင်နှစ်ဦးကို ရဟတ်ယာဉ်ပေါ်ကနေ အစ္စရေးစစ်သားတွေက ပစ်သတ်ခဲ့ကြောင်း ပြောပါတယ်။ 

ဟစ်ဘိုလာအဖွဲ့ကတော့ ၎င်းတို့အနေနဲ့ နယ်စပ်ဖြတ်ကျော်တိုက်ခိုက်ခြင်းမရှိခဲ့ကြောင်း ပြောဆိုထားပါတယ်။ အစ္စရေးနဲ့ ပါလက်စတိုင်းစစ်ပွဲဟာ အောက်တိုဘာ ၇ ရက်နေ့က စတင်ခဲ့ပြီးနောက် ဒီနေ့ အောက်တိုဘာ ၁ဝ ရက်မှာလည်း တိုက်ခိုက်မှုတွေ ဆက်လက်ဖြစ်ပွားနေပြီး အစ္စရေးက လေကြောင်းကနေ ဂါဇာကမ်းမြောင်ဒေသရှိ နေရာအများအပြားကို ဗုံးကြဲတိုက်ခိုက်မှုတွေ လုပ်ဆောင်နေကြောင်း သိရပါတယ်။

ဟစ်ဘိုလာနဲ့ အစ္စရေးတို့ ၂ဝဝ၆ ခုနှစ်နောက်ပိုင်းကတည်းက အပြန်အလှန်ပစ်ခတ်တိုက်ခိုက်မှုတွေ မကြာခဏရှိခဲ့ကြောင်း သိရပါတယ်။ ဟစ်ဘိုလာနဲ့ အစ္စရေးတို့ဟာ အောက်တိုဘာ ၈ ရက်က အမြှောက်တွေနဲ့ အပြန်အလှန်ပစ်ခတ်တာမျိုးတွေ ရှိခဲ့ကြောင်း သိရပါတယ်။