ထိုင်းနိုင်ငံ ဘန်ကောက်မြို့မှာဖြစ်ပွားခဲ့တဲ့ ပစ်ခတ်မှုအတွင်း မြန်မာအမျိုးသမီး သေဆုံး
ဂျန်ဇက် (NSS) - အောက်တိုဘာ ၄
ထိုင်းနိုင်ငံ ဘန်ကောက်မြို့ရှိ Siam Paragon ရှော့ပင်းမောမှာ အောက်တိုဘာလ ၃ ရက်၊ ညနေပိုင်းက သေနတ်ပစ်ခတ်မှုများဖြစ်ပွားခဲ့ပြီး မြန်မာအမျိုးသမီးတစ်ဦးသေဆုံးခဲ့ကြောင်း ထိုင်းရဲတပ်ဖွဲ့က သတင်းထုတ်ပြန်လိုက်ပါတယ်။
ထိုင်းရဲချုပ် Torsak Sukvimol က အဆိုပါရှော့ပင်းမောတွင် အသက် ၁၄ နှစ်အရွယ်ရှိ လူငယ်တစ်ဦးက ပစ်ခတ်မှုကျူးလွန်ခဲ့တာဖြစ်ပြီးနောက်ပိုင်းမှာ လက်နက်ချအဖမ်းခံခဲ့ကြောင်း၊ ပစ်ခတ်မှုများကြောင့် နှစ်ဦးသေဆုံးပြီး ငါးဦးဒဏ်ရာရခဲ့ကြောင်း ပြောပါတယ်။သေဆုံးခဲ့သူနှစ်ဦးအနက် တစ်ဦးက တရုတ်နိုင်ငံသား ခရီးသွားတစ်ဦးဖြစ်ပြီး အခြားတစ်ဦးက ရှော့ပင်းမောမှာအလုပ်လုပ်နေတဲ့ မြန်မာအမျိုးသမီးတစ်ဦးဖြစ်ကြောင်း ထိုင်းရဲချုပ်ကပြောပါတယ်။
ဒါ့ပြင် ဒဏ်ရာရသူငါးဦးထဲမှာ တရုတ်နိုင်ငံသားတစ်ဦး၊ လာအိုနိုင်ငံသား တစ်ဦးနဲ့ ထိုင်းနိုင်ငံ သားသုံးဦးတို့ပါဝင်ခဲ့ပြီး နှစ်ဦးကစိုးရိမ်ရတဲ့အခြေအနေမျိုးရှိနေကြောင်း ထိုင်းရဲတပ်ဖွဲ့ကပြောပါတယ်။ ဒဏ်ရာရသူ ငါးဦးကို ချူလာလောင်ကွန် ဆေးရုံ၊ ထိုင်းရဲဆေးရုံ နဲ့ ဘန် ကောက်မြို့ရှိ ခရစ်ယာန်ဆေးရုံတို့မှာ ပြုစုကုသပေးနေကြောင်းသိရပါတယ်။
ပစ်ခတ်မှုကျူးလွန်သူဟာ စိတ်ပိုင်းဆိုင်ရာ ရောဂါရှိနေသူဖြစ်ပြီး အသက် ၁၄နှစ်အရွယ်သာရှိသေးကြောင်း၊ ၎င်းဟာ BB gun ကိုအသုံးပြုပစ်ခတ်ခဲ့ခြင်းဖြစ်ပြီး ၎င်းရဲ့နေအိမ်ကို စစ်ဆေးချိန်မှာလည်း ကျည်ဆံတွေ နဲ့ ပစ္စတိုသေနတ်တွေကို ထပ်မံတွေ့ရှိခဲ့ကြောင်း ထိုင်းရဲတပ်ဖွဲ့ကပြောပါတယ်။ အဆိုပါအသက် ၁၄နှစ်အရွယ်ရှိ ထိုင်းနိုင်ငံသားဟာ ရှော့ပင်းမော မြေညီထဲမှာ ပစ်ခတ်မှုစတင်လုပ်ဆောင်ခဲ့ပြီးနောက် ဒုတိယအထပ် နဲ့ တတိယအထပ်တွေကိုလည်း သွားရောက်ခဲ့ကာ နောက်ပိုင်းမှာ ရဲတပ်ဖွဲ့ထံ လက်နက်ချအညံခံခဲ့တာဖြစ်ကြောင်း ထိုင်းသတင်းတွေမှာဖော်ပြထားပါတယ်။
ထိုင်းရဲတပ်ဖွဲ့ဟာ လက်ရှိအချိန်မှာ ပစ်ခတ်မှုကျူးလွန်တဲ့ ထိုင်းလူငယ်ကို Pathumwan ရဲစခန်းကို လွှဲပြောင်းပေးထားကြောင်းသိရပါတယ်။ ပစ်ခတ်မှုကျူးလွန်တဲ့လူငယ်ဟာ ရှော့ပင်းမော အနီးမှာရှိနေတဲ့ စာသင်ကျောင်းမှာ ကျောင်းတက်ရောက်နေသူဖြစ်ကြောင်း၊Rajvithi ဆေးရုံမှာ စိတ်ပိုင်းဆိုင်ရာ ရောဂါကို ပြုစုကုသခဲ့ရပေမယ့် နောက်ပိုင်းမှာ ဆေးသောက်တာတွေကို ရပ်တန့်ခဲ့ကြောင်းသိရပါတယ်။ The Essence အမည်ရှိ ပုဂ္ဂလိက စာသင်ကျောင်းက ပစ်ခတ်မှုကျူးလွန်သူဟာ ၎င်းတို့ကျောင်းကဖြစ်ပြီး ရဲတပ်ဖွဲ့ နဲ့ ပူးပေါင်းဆောင်ရွက်သွားမယ်လို့ သတင်းထုတ်ပြန်ထားပါတယ်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
သတင်းနှင့်စာနယ်ဇင်းလုပ်ငန်း၌ လစ်လပ်နေသော ရာထူးနေရာ(၂၀)အတွက် တာဝန်ထမ်းဆောင်ရန် ဝန်ထမ်းများခေါ်ယူ
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ